1 Samuele 7:1-17
7 Aboobo bantu baku Kiriyati-jearimu bakaboola akulibweza Bbokesi lya Jehova akulinjizya muŋanda ya Abinadabu+ iyakali aakalundu, eelyo bakabikka Eleazara mwanaakwe kulindilila Bbokesi lya Jehova.
2 Kwakainda ciindi cilamfwu, nkokuti myaka iili 20 kuzwa buzuba Bbokesi nolyakaboola mu Kiriyati-jearimu, eelyo bana Israyeli boonse bakatalika kumuyandaula* Jehova.+
3 Mpoonya Samuele wakaambila bana Israyeli boonse kuti: “Ikuti naa mwapiluka kuli Jehova amoyo wanu woonse,+ nkokuti amugwisye baleza beenzu+ akati kanu azikozyanyo zya Asitoreti,+ akugamika myoyo yanu cakumaninina kuli Jehova akubelekela nguwe alikke,+ eelyo uyoomuvwuna kumaanza aaba Filisiti.”+
4 Kumane bana Israyeli bakagwisya ba Baala azikozyanyo zya Asitoreti akutalika kubelekela Jehova alikke.+
5 Kumane Samuele wakati: “Amubunganye bana Israyeli boonse ku Mizipa,+ mpoonya ndilamupailila kuli Jehova.”+
6 Aboobo bakabungana antoomwe ku Mizipa. Bakateka maanzi akwaatila kumbele lya Jehova alimwi bakaliimya kulya buzuba oobo.+ Nobakali kooko bakati: “Twabisizya Jehova.”+ Lino Samuele wakatalika kubeleka kali mubetesi+ kubana Israyeli ku Mizipa.
7 Lino ba Filisiti nibakamvwa kuti bana Israyeli babungana antoomwe ku Mizipa, bami baba Filisiti+ bakaunka kuyoolwana bana Israyeli. Nibakamvwa boobo, bana Israyeli bakayoowa akaambo kaba Filisiti.
8 Aboobo bana Israyeli bakati kuli Samuele: “Utaleki kulomba kuli Jehova Leza wesu kuti atugwasye+ akutuvwuna kumaanza aaba Filisiti.”
9 Mpoonya Samuele wakabweza kabelele kacinyonka akukatuula kakali cituuzyo cuumpwa buumbulu+ kuli Jehova; alimwi wakatalika kulombela bana Israyeli lugwasyo kuli Jehova, eelyo Jehova wakamuvwiila.+
10 Samuele naakali kutuula cituuzyo cuumpwa, ba Filisiti bakaboola afwaafwi kuti balwane bana Israyeli. Lino Jehova wakapa kuti kube muzumo mupati+ mubuzuba oobo kuba Filisiti alimwi wakabanyonganya,+ eelyo bakazundwa kubana Israyeli.+
11 Aboobo bana Israyeli bakazwa ku Mizipa akutandaanya ba Filisiti kabayaabubajaya kusikila ku Beti-kara nkoili kumusanza.
12 Mpoonya Samuele wakabweza bbwe+ akuliimika akati ka Mizipa a Jesana akulyuulika kuti Ebenezeri,* nkaambo wakati: “Jehova ucitugwasya kusikila sunu.”+
13 Aboobo ba Filisiti bakazundwa, eelyo tiibakaboola limbi mucilawo ca Israyeli;+ alimwi janza lya Jehova lyakazumanana kulwana ba Filisiti mazuba oonse aa Samuele.+
14 Ayalo minzi yabana Israyeli njobakabwezede ba Filisiti yakapilusyigwa kubana Israyeli, kuzwa ku Ekroni kusikila ku Gati, aboobo bana Israyeli bakaibweza nyika yabo kumaanza aaba Filisiti.
Alimwi kwakaba luumuno akati kabana Israyeli abana Amori.+
15 Samuele wakazumanana kubeteka bana Israyeli buumi bwakwe boonse.+
16 Wakali kweenda mwaka amwaka kazinguluka muminzi ya Beteli,+ Giligala+ a Mizipa+ kabeteka bana Israyeli mumasena oonse aaya.
17 Pele wakali kupiluka alimwi ku Rama+ nkaambo nkokwakali ŋanda yakwe, akwalo ooko wakali kubeteka bana Israyeli. Wakayakila Jehova cipaililo nkukonya ooko.+
