1 Samuele 8:1-22
8 Lino Samuele naakacembaala wakabikka bana bakwe kuti babe babetesi mu Israyeli.
2 Mwanaakwe mutaanzi wakali Joeli, eelyo wabili wakali Abija;+ bakali babetesi mu Beere-seba.
3 Pele bana bakwe tiibakali kweenda munzila zyakwe pe; bakali kubikkila buyo maano kukujana mpindu cabumpelenge,+ kutambula cisinkamulomo+ alimwi akupilinganya lubeta.+
4 Mukuya kwaciindi, baalu boonse bamu Israyeli bakabungana antoomwe akuunka kuli Samuele ku Rama.
5 Bakamwaambila kuti: “Bona! Yebo wacembaala alimwi bana bako tabeendi munzila zyako. Lino kotubikkila mwami uunootubeteka mbubonya mbuli misyobo iimbi yoonse.”+
6 Pele tiicakamukkomanisya* Samuele nobakaamba kuti: “Kotupa mwami uunootubeteka.” Mpoonya Samuele wakapaila kuli Jehova,
7 eelyo Jehova wakati kuli Samuele: “Swiilila majwi oonse bantu ngobakwaambila; nkaambo toli nduwe ngobakaka pe, pele ndime ngobakaka kuba mwami wabo.+
8 Balacita mbubonya mbobakali kucita kuzwa buzuba nindakabagwisya mu Egepita kusikila buzuba obuno; bazumanana kundikaka+ akubelekela baleza bambi,+ alimwi oobu mbombubo mbobali mukucita akulinduwe.
9 Lino kobaswiilila buyo. Nokuba boobo ubacenjezye cakusinizya; ubaambile eezyo nzyayooyanda kulimbabo mwami uuyoobeendelezya.”
10 Aboobo Samuele wakabaambila bantu ibakali kumulomba mwami majwi oonse aa Jehova.
11 Kumane wakati: “Nzyeezyi mwami uuyoomweendelezya nzyayooyanda kulindinywe:+ Uyoobweza bana banu basankwa+ kuti babe basinkalaki zyakwe+ abasimabbiza bakwe,+ alimwi bamwi banoozuza kumbele lyankalaki zyakwe.
12 Uyoolisalila basilutwe babantu bali zyuulu+ abasilutwe babantu bali makumi aali musanu,+ eelyo bamwi uyoobabikka kuti kabamulimina,+ kabamutebwida+ akumupangila zilwanyo azibelesyo zyankalaki zyakwe.+
13 Uyoobweza bana banu basimbi kuti babe basikusanganya* mafwuta aanunkilila, basikujika abasikupanga zinkwa.+
14 Uyoobweza myuunda yanu mibotu kapati, myuunda yamisaansa alimwi ayamaolifa,+ eelyo uyakwiipa kubabelesi bakwe.
15 Uyoobweza cipaanzi cakkumi camyuunda yamaila yanu alimwi acipaanzi cakkumi camyuunda yamisaansa yanu akucipa basinkuta bakwe ababelesi bakwe.
16 Alimwi uyoobweza babelesi banu baalumi abasimbi, ŋombe zyanu zibotu ambongolo zyanu kuti akazibelesye mumilimo yakwe.+
17 Uyoobweza cipaanzi cakkumi kuzwa kubutanga bwanu bwambelele ampongo,+ eelyo nywebo muyooba babelesi bakwe.
18 Buyoosika buzuba mbomuyoolila akaambo kamwami ngomwakalisalila nobeni,+ pele Jehova takamuvwiili buzuba oobo pe.”
19 Nokuba boobo bantu bakakaka kuswiilila nzyaakabaambila Samuele alimwi bakati: “Peepe, swebo tuyanda mwami kuti atweendelezye.
20 Mpoonya tuyooba mbuli misyobo iimbi yoonse, alimwi mwami wesu unootubeteka akutusololela mukulwana nkondo zyesu.”
21 Samuele naakamana kumvwa majwi oonse ngobakamwaambila bantu, wakaainduluka kuli Jehova.
22 Kumane Jehova wakaambila Samuele kuti: “Kobaswiilila buyo, alimwi kobabikkila mwami kuti abeendelezye.”+ Mpoonya Samuele wakaambila bantu bamu Israyeli kuti: “Kamuya, umwi aumwi kumunzi wakwe.”
