1 Samuele 9:1-27
-
Samuele waswaanganya Saulo (1-27)
9 Lino kwakali mwaalumi umwi wamusyobo wa Benjamini wazina lyakuti Kisi,+ mwana wa Abiyeli, imwana wa Zerori, imwana wa Bekorati,+ imwana wa Afiya muna Benjamini alimwi iwakavwubide kapati.
2 Wakalijisi mwana mulombe uutegwa Saulo,+ mwana ooyu wakali mubotu kapati–kunyina mwaalumi akati kabana Israyeli iwakali kumwiinda kubota–kuzwa amagwezyo wakali mulamfwu kwiinda bantu boonse.
3 Lino mbongolo* zya Kisi, usyi Saulo nozyakasweeka, Kisi wakaambila mwanaakwe Saulo kuti: “Bweza umwi wababelesi, uunke mukayandaule mbongolo.”
4 Lino bakainda mumalundu aa Efraimu akwiinda munyika ya Salisa, pele tiibakazijana. Mpoonya bakainda munyika ya Saalimu, amwalo tiibakazijana mbongolo pe. Kumane bakainda munyika ya Benjamini, amwalo tiibakazijana pe.
5 Mpoonya bakasika munyika ya Zufi, eelyo Saulo wakaambila mubelesi wakwe ngwaakali limwi kuti: “Koboola, atupiluke buyo kutegwa bataata batataliki kulibilika ndiswe muciindi cambongolo.”+
6 Pele mubelesi wakati: “Swiilila! Kuli muntu wa Leza mumunzi ooyu, alimwi muntu ooyo ulalemekwa kapati. Kufwumbwa ncaamba cilacitika.+ Atuunke kulinguwe lino. Ambweni inga watwaambila nzila njotweelede kutola.”
7 Amvwe boobo Saulo wakaambila mubelesi wakwe kuti: “Ikuti naa tuunke, ino tulamutolela nzi? Tatujisi zyakulya muzibbeeke zyesu; kunyina cipego ncotujisi cakumutolela muntu wa Leza mwini-mwini. Ino tujisi nzi?”
8 Mpoonya mubelesi wakavwiila Saulo alimwi kuti: “Bona! Ndilijisi cipaanzi cane casyekeli* lyansiliva mujanza lyangu. Ndilamupa muntu wa Leza mwini-mwini, eelyo ulatwaambila nzila njotweelede kutola.”
9 (Kaindi mu Israyeli, mboobu mbwaakali kwaamba muntu naa uyanda kubuzya makani kuli Leza: “Amuboole tuunke kumuntu uubona zyakumbele.”+ Nkaambo muntu uutegwa musinsimi mazuba aano, kaindi wakali kwiitwa kuti muntu uubona zyakumbele.)
10 Mpoonya Saulo wakaambila mubelesi wakwe kuti: “Waamba kabotu. Atuunke.” Eelyo bakaunka kumunzi ooko muntu wa Leza mwini-mwini nkwaakabede.
11 Lino nibakali kutanta kumatantilo aamunzi, bakajana basimbi ibakali kuunka kuyooteka maanzi. Aboobo bakababuzya kuti: “Sena muntu uubona zyakumbele+ nkwali mubusena obuno?”
12 Bakabavwiila kuti: “Inzya nkwali. Amubone, uli buyo ambele lyanu. Lino amufwambaane, wasika sunu mumunzi nkaambo bantu sunu batuula+ cipaizyo kucilundu.+
13 Lino mbomutiisikile buyo mumunzi, mulamujana katanaunka kucilundu kuyoolya. Bantu tabakoolya katanasika nkaambo ngonguwe weelede kulongezya cipaizyo. Amana kucita boobo, aabo batambidwe nobatiilye. Aboobo amuunke lino aawa, eelyo mulamujana.”
14 Aboobo bakaunka kumunzi. Lino nibakali afwaafwi kusika akati kamunzi, Samuele wakaboola kubacinga kutegwa baunke kucilundu.
15 Lino buzuba bwakuti juunza Saulo ulaboola, Jehova wakaambila* Samuele kuti:
16 “Juunza aciindi ecino ndiyootuma kulinduwe mwaalumi uuzwa kucisi ca Benjamini.+ Weelede kumunanika kuti abe musololi wabantu bangu bana Israyeli,+ alimwi uyoovwuna bantu bangu kujanza lyaba Filisiti. Nkaambo ndaabona mapenzi aabantu bangu, alimwi kulila kwabo kwandisikila.”+
17 Lino Samuele naakamubona Saulo, Jehova wakamwaambila kuti: “Ooyu ngomuntu ngundakakwaambila kuti, ‘Ngonguwe uuyakweendelezya bantu bangu.’”*+
18 Mpoonya Saulo wakaunka kuli Samuele akati kamulyango wamunzi akumubuzya kuti: “Kondaambila kaka, ino ili kuli ŋanda yamuntu uubona zyakumbele?”
19 Samuele wakavwiila Saulo kuti: “Ndendime muntu uubona zyakumbele. Kosolola tuye kucilundu, alimwi tulalidaamwi sunu.+ Eelyo mafwumofwumo ndiyookuleka kuti ukaunke alimwi ndiyookwaambila zyoonse nzyoyanda kuzyiba.*
20 Lino kujatikizya mbongolo zyanu izyakasweeka mazuba otatwe aainda,+ utalibiliki nkaambo zyajanika. Alimwi ino zintu zyoonse ziyandisi zyamu Israyeli nzizyani? Sena tazili zyako aboonse bamuŋanda yauso?”+
21 Amvwe boobo Saulo wakati: “Sena tandili muna Benjamini, imusyobo muniini kapati akati kamisyobo ya Israyeli,+ alimwi mukwasyi wangu unyina ampuwo akati kamikwasyi yoonse yamusyobo wa Benjamini? Aboobo ino nkaambo nzi ncoondaambila makani aali boobu?”
22 Lino Samuele wakatola Saulo amubelesi wakwe kuŋanda yakulida akubabikka abusena bulemekwa akati kabaabo bakatambidwe; antoomwe kwakali baalumi basika ku 30.
23 Kumane Samuele wakaambila sikujika kuti: “Kondiletela nyama iilya njindakupede akukwaambila kuti, ‘Koibikka ambali.’”
24 Eelyo sikujika wakabweza mweendo akuubikka kumbele lya Saulo. Mpoonya Samuele wakati: “Eeyi njenyama yayobwedwe iyabikkwa kumbele lyako. Kolya, nkaambo yayobwedwe nduwe kuti ulye aciindi ecino. Nkaambo ndabaambila kuti, ‘Ndakatamba beenzu.’” Aboobo Saulo wakalya antoomwe a Samuele buzuba oobo.
25 Kumane bakaselemuka kuzwa kucilundu akuunka kumunzi,+ eelyo Samuele wakazumanana kwaambaula a Saulo atala aaciluli caŋanda.
26 Mpoonya bakabuka kakucili kooko, eelyo mbolyakapaswida buyo zuba, Samuele wakaita Saulo kuzwa atala aaciluli caŋanda kati: “Kolibambila kutegwa uunke.” Aboobo Saulo wakalibambila, eelyo walo a Samuele bakazwa anze.
27 Lino nobakali kuselemuka nkuumanina munzi, Samuele wakaambila Saulo kuti: “Komwaambila mubelesi wako+ kuti asolole kumbele lyesu,” kumane wakasolola. “Pele yebo koima kutegwa ndikwaambile jwi lya Leza.”
Bupanduluzi buyungizyidwe
^ Mu Chihebrayo, “mbongolo zizyazi.”
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
^ Mu Chihebrayo, “wakasinkula kutwi kwa.”
^ Naa “uuyakubona kuti bantu bangu bali mukati kaminyinza.”
^ Mu Chihebrayo, “zyoonse izili mumoyo wako.”
