2 Bakorinto 5:1-21
5 Nkaambo tulizyi kuti ikuti ŋanda yesu yaanyika, itente eeli lyamwaigwa,+ tuyoopegwa ŋanda iimbi iizwa kuli Leza iyatakayakwa amaanza aabantu,+ eeyo iinooliko kukabe kutamani kujulu.
2 Nkaambo muŋanda eeyi njotujisi masimpe tulatongela, katulombozya kapati kusama ŋanda yesu, eeyo iizwa kujulu,+
3 ikutegwa twaakwiisama tutakajaniki amantanda.
4 Mubwini, swebo notuli mutente eeli tulatongela, tulalibilika kapati, nkaambo tatuyandi kuti tulisamunune eeli pe, pele tuyanda kusama leelyo limbi+ ikutegwa eeli ilifwa limenwe abuumi.+
5 Lino ooyo wakatubamba kuti tutambule cintu eeci ngu Leza,+ iwakatupa muuya kuti ube cisinizyo cazintu ziboola kumbele.*+
6 Aboobo lyoonse tuli basicamba alimwi tulizyi kuti, notucili mumubili ooyu, tatuko pe ku Mwami,+
7 nkaambo tweenda mulusyomo, ikutali kweelana anzyotubona.
8 Pele tuli basicamba alimwi inga twayanda kuti tuleke kupona mumubili ooyu akuyookkala antoomwe a Mwami.+
9 Aboobo, kufwumbwa naa katuli antoomwe anguwe naa katutali anguwe, tukanzide kuba bantu batambulika kulinguwe.
10 Nkaambo toonse tweelede kuyoolibonya kumbele lyacuuno calubeta ca Kristo, ikutegwa umwi aumwi akapegwe bulumbu kweelana azintu nzyaakacita naakacili kupona mumubili wakwe, kufwumbwa naa nzibotu naa nzibi.+
11 Aboobo mbwaanga tulizyi mbociyandika kuyoowa Mwami, tulazumanana kukwelelezya bantu, pele Leza ulituzyi kabotu.* Nokuba boobo, ndisyoma kuti manjezyeezya aanu anywebo amugwasya kutuzyiba kabotu.*
12 Tatulilumbaizyi alimwi kulindinywe pe, pele tumupa kaambo keelede kumupa kulidunda kujatikizya ndiswe, kutegwa mukonzye kubaingula aabo balidunda kujatikizya mbwaboneka muntu anze+ pele ikutali kujatikizya zili mumoyo.
13 Nkaambo ikuti naa twakali bafwubafwuba,+ twakali boobo akaambo ka Leza; ikuti naa tulibateme, tuli boobo akaambo kandinywe.
14 Nkaambo luyando ndwajisi Kristo lulatukulwaizya, nkaambo tulisinizyide kuti muntu omwe wakafwida bantu boonse;+ aboobo mubwini boonse bakalifwide.
15 Alimwi wakafwida boonse kutegwa aabo bapona kabataciliponeni beni,+ pele kabaponena yooyo iwakabafwida alimwi iwakabusyigwa.
16 Aboobo kuzwa lino tatuboni muntu munzila yakumubili.+ Nokuba kuti Kristo twakalimuzyi munzila yakumubili, masimpe lino tatucimuzyi boobo pe.+
17 Aboobo ikuti muntu uuli woonse kakamantene a Kristo, nkokuti ncilenge cipya;+ zintu zyakaindi zyamana; lino amubone kwaba zintu zipya!
18 Pele zintu zyoonse zizwa kuli Leza, ooyo wakatuyanzanya kulinguwe mwini kwiinda muli Kristo+ akutupa mulimo wakuyanzanya,+
19 nkokuti kwiinda muli Kristo, Leza wakali kuyanzanya nyika kulinguwe mwini,+ katacibapi mulandu wazibi zyabo,+ alimwi wakatupa mulumbe waluyanzano oolu.+
20 Aboobo tuli baiminizi+ ibali mubusena bwa Kristo,+ cili mbuli kuti Leza ulakombelezya kwiinda mulindiswe. Mbotuli mubusena bwa Kristo tumulomba kuti: “Amuyanzane a Leza.”
21 Ooyo iwatakazyi cibi+ Leza wakamupa kuba cibi* akaambo kandiswe, ikutegwa kwiinda mulinguwe tube bululami bwa Leza.+
Bupanduluzi buyungizyidwe
^ Naa “mali aakujatizya cintu (mali aacizuminano); cisinizyo (cisyomezyo) cazintu ziboola kumbele.”
^ Naa “tulalibonya kuli Leza.”
^ Naa “kuti tulibonye kulindinywe.”
^ Naa “cituuzyo cacibi.”
