2 Bami 10:1-36
10 Lino Ahabu+ wakajisi bana bali 70 mu Samariya. Aboobo Jehu wakalemba magwalo akwaatuma ku Samariya, kuli basilutwe bamu Jezreeli, baalu+ alimwi abasikulela bana ba Ahabu,* wakati:
2 “Lino aciindi lugwalo oolu lwaakusika kulindinywe, bana basimalelaanu banooli aandinywe alimwi ankalaki zyankondo, mabbiza, munzi uukwabilidwe alimwi azilwanyo zyankondo.
3 Amusale omwe akati kabana basimalelaanu iweelela alimwi uululeme, mpoonya mumubikke acuuno cabwami causyi. Mwamana mulwanine ŋanda yasimalelaanu.”
4 Pele bakayoowa kapati akwaamba kuti: “Amubone! Ikuti bami bobilo tiibakakonzya kwiima kumbele lyakwe,+ sena swebo inga twacikonzya kwiima kulinguwe?”
5 Aboobo mulangizi waŋanda yamwami,* mweendelezi wamunzi, baalu alimwi abasikulela bana ba Ahabu bakatuma mulomo kuli Jehu wakuti: “Tuli babelesi bako alimwi tulazicita zyoonse nzyotiitwaambile. Tatukabikki muntu uuli woonse kuba mwami. Kocita kufwumbwa cibotu mumeso aako.”
6 Kumane wakabalembela lugwalo lwabili lwaamba kuti: “Ikuti muli kulubazu lwangu alimwi akuti mulayanda kutobela malailile aangu, amukosole mitwe yabana basimalelaanu mpoonya cifwumo aciindi nciconya eeci mukaboole kulindime ku Jezreeli.”
Lino bana bamwami ibali 70 bakali antoomwe abapati bamunzi ibakali kubalela.
7 Lino mbolwakasikila buyo lugwalo kulimbabo, bakabweza bana bamwami bali 70+ akubajaya, kumane bakabikka mitwe yabo mumitaanga* akwiituma kulinguwe ku Jezreeli.
8 Mutumwa wakasika akumwaambila kuti: “Baileta mitwe yabana bamwami.” Aboobo wakati: “Amwiilundike muzilwi zyobilo kumulyango wamunzi kusikila mafwumofwumo.”
9 Lino naakazwa anze mafwumofwumo, wakaima kumbele lyabantu boonse akwaamba kuti: “Nywebo tamujisi mulandu.* Inzya, mebo ndakabukila simalelaangu akumujaya,+ pele ino nguni wajaya bantu aaba boonse?
10 Lino amuzyibe kuti, kunyina jwi lya Jehova noliba lyomwe eelyo Jehova ndyaakaamba kujatikizya ŋanda ya Ahabu ilitakazuzikizyigwi,*+ alimwi Jehova wacita ncaakaamba kwiinda mumubelesi wakwe Elija.”+
11 Kuyungizya waawo, Jehu wakabajaya boonse bamuŋanda ya Ahabu ibakasyeede mu Jezreeli antoomwe ababelesi bakwe balupati-pati, beenzinyina alimwi abapaizi bakwe+ kusikila wabamana boonse.+
12 Mpoonya wakanyamuka akuunka ku Samariya. Iŋanda* mobakali kugelela mbelele beembezi yakali munsi aanzila.
13 Ooko Jehu wakaswaangana abanabokwabo a Mwami Ahaziya+ wa Juda, eelyo wakababuzya kuti, “Ino ndinywe bani?” Bakaingula kuti: “Tuli banabokwabo a Ahaziya, alimwi tuunka kuyooswaya bana bamwami abana babanyina mwami.”*
14 Mpoonya aawo wakati: “Amubajate!” Aboobo bakabajata kumane baakubajaya kumugoti uuli kuŋanda yakugelela mbelele. Bakajaya baalumi bali 42 alimwi tiibakasiya naba omwe.+
15 Lino naakali kuunka kuzwa kooko, wakaswaangana a Jehonadabu+ mwana wa Rekabu+ iwakali kuboola kuzooswaangana anguwe. Eelyo naakamwaanzya* wakati kulinguwe: “Sena moyo wako ulimaninide* kulindime mbubonya mbuli moyo wangu mbuumaninide kulinduwe?”
Jehonadabu wakaingula kuti: “Inzya.”
“Ikuti kakuli boobo, kondipa janza lyako.”
Aboobo wakamupa janza lyakwe, kumane Jehu wakamukwelela munkalaki mwaakabede.
16 Mpoonya Jehu wakati: “Atuunke limwi ukabone mbonditalekeleli bantu bakazya* Jehova.”+ Aboobo bakamutolelezya munkalaki yakwe yankondo.
17 Mpoonya wakasika ku Samariya akubajaya boonse bamuŋanda ya Ahabu ibakasyeede mu Samariya kusikila boonse wabanyonyoona,+ kweelana ajwi lya Jehova ndyaakaamba kuli Elija.+
18 Kumane Jehu wakabunganya bantu boonse akubaambila kuti: “Ahabu wakamukomba Baala asyoonto buyo,+ pele Jehu uyoomukomba kwiinda Ahabu.
19 Aboobo amubaite basinsimi ba Baala+ boonse abakombi bakwe boonse alimwi abapaizi bakwe+ boonse kulindime. Kutabi naba omwe uutakoosika, nkaambo ndijisi cipaizyo cipati cakutuulila Baala. Kufwumbwa uutakoosika takoopona pe.” Pele Jehu wakacita calweeno kutegwa anyonyoone bakombi ba Baala.
20 Kumane Jehu wakati: “Amwaambilizye kuti kuli muswaangano uusetekene wa Baala.” Aboobo bakaambilizya.
21 Kuzwa waawo Jehu wakatumya mulomo mu Israyeli yoonse, aboobo bakombi ba Baala boonse bakaboola. Kunyina naba omwe watakaboola. Bakanjila muŋanda* ya Baala+ kusikila yazula kuzwa kumagolelo aamwi kusikila kumagolelo aambi.
22 Mpoonya wakaambila yooyo iwakali kulanganya ciyobwedo cazisani kuti: “Kobaletela zisani bakombi ba Baala boonse.” Aboobo wakabaletela zisani.
23 Mpoonya Jehu a Jehonadabu+ mwana wa Rekabu bakanjila muŋanda ya Baala. Kumane wakaambila bakombi ba Baala kuti: “Amulange-lange cakulomya akubona kuti kunyina mukombi wa Jehova naba omwe aano, pele buyo bakombi ba Baala.”
24 Mpoonya bakaboola kuzootuula zipaizyo alimwi azituuzyo zyuumpwa. Lino Jehu wakabikkide baalumi bali 80 anze akubaambila kuti: “Kufwumbwa uutilekele umwi wabaalumi mbonditiiabe mumaanza aanu kutija, kulajaigwa nguwe.”
25 Mbwaakamanina buyo kutuula cituuzyo cuumpwa, Jehu wakaambila balindizi* abalupati-bapati kuti: “Amunjile mubajayaule! Kutabi naba omwe uutija!”+ Aboobo balindizi abalupati-pati bakabajayaula amapanga akubasowela anze alimwi bakazumanana kunjila mane muŋanda* ya Baala yamukati mwini.
26 Kumane bakagwisya misemu yamabwe yakukomba+ yamuŋanda ya Baala akuyuumpa yoonse.+
27 Bakaumwaya musemu wamabwe wakukomba+ wa Baala alimwi aŋanda ya Baala,+ eelyo bakaipanga kuba zimbuzi zyabuleya mane kusikila sunu.
28 Aboobo Jehu wakagwisya Baala mu Israyeli.
29 Pele Jehu tanaakaleka kuzitobela zibi zya Jeroboamu mwana wa Nebati eezyo nzyaakapa kuti bana Israyeli bacite, nkokuti kukomba boombe bangolida ibakali ku Beteli aku Dani.+
30 Aboobo Jehova wakaambila Jehu kuti: “Akaambo kakuti wacita kabotu kwiinda mukucita ziluleme mumeso aangu alimwi wacita zyoonse zyali mumoyo wangu kujatikizya ŋanda ya Ahabu,+ mazyalani one aabana bako ayookkala acuuno cabwami ca Israyeli.”+
31 Pele Jehu tanaakabikkila maano kweenda mu Mulawo wa Jehova Leza wa Israyeli camoyo woonse.+ Tanaakaleka kucita zibi zya Jeroboamu nzyaakapa kuti bana Israyeli bacite.+
32 Mumazuba aayo Jehova wakatalika kuyaabwiicesya nyika ya Israyeli asyoonto-syoonto. Hazaeli wakazumanana kubalwana mucilawo coonse ca Israyeli,+
33 kuzwa ku Jordano nkoili kujwe, nyika yoonse ya Gileadi–yabana Gadi, bana Rubeni abana Manase+–kuzwa ku Aroeri, kufwaafwi a Kkuti lya Arinoni* kusikila ku Gileadi a Basani.+
34 Makani oonse aakaindi aamba zya Jehu azintu zyoonse nzyaakacita alimwi anguzu zyakwe alilembedwe mubbuku lyamakani aakaindi aamba zyamazuba aabami ba Israyeli.
35 Kumane Jehu wakoona abamausyi, alimwi bakamuzikka mu Samariya; eelyo Jehoazi+ mwanaakwe wakaba mwami mubusena bwakwe.
36 Ciindi* ncaakatola Jehu keendelezya bana Israyeli cakakkwana myaka iili 28 mu Samariya.
Bupanduluzi buyungizyidwe
^ Mu Chihebrayo, “abasikulela Ahabu.”
^ Mu Chihebrayo, “waŋanda.”
^ Bamwi baamba kuti “zinzuma.”
^ Naa “muliluleme.”
^ Mu Chihebrayo, “liyoowida ansi.”
^ Kulibonya kuti eeyi niŋanda mozyakali kwaangilwa mbelele kutegwa zigelwe.
^ Naa “abana banamalelo.”
^ Naa “naakamulongezya.”
^ Mu Chihebrayo, “uliluleme.”
^ Naa “busungu bwangu kuli.”
^ Naa “mutempele.”
^ Mu Chihebrayo, “batumwa.”
^ Mu Chihebrayo, “mumunzi,” ambweni ŋanda iyakali mbuli mpangala.
^ Naa “Kalonga ka Arinoni.”
^ Mu Chihebrayo, “Mazuba.”
