2 Bami 11:1-21
11 Lino Ataliya+ banyina Ahaziya naakabona kuti mwanaakwe musankwa wafwa,+ wakabajaya bana bamwami* boonse.+
2 Nokuba boobo, Jehoseba mwana musimbi wa Mwami Jehoramu imucizyi wa Ahaziya, wakabweza Jehoasi+ mwana wa Ahaziya akumubba kuzwa akati kabana bamwami ibakeelede kujaigwa, wakamusisa antoomwe asikumulela muŋanda yakoona. Bakacikonzya kumusisa kuzwa kuli Ataliya, aboobo tanaakajaigwa pe.
3 Jehoasi wakazumanana kukkala antoomwe anguwe kwamyaka iili cisambomwe, kasisidwe muŋanda ya Jehova, ciindi Ataliya naakali kweendelezya munyika eeyo.
4 Mumwaka waciloba, Jehoyada wakaita basilutwe babasikalumamba bali mwaanda ibaba Kari alimwi abasilutwe babalindizi* baŋanda yamwami+ akubatola kuŋanda ya Jehova. Wakapanga cizuminano ambabo akubapa kukonka kuŋanda ya Jehova, mpoonya wakabatondezya mwana wamwami.+
5 Wakabalailila kuti: “Mboobu mbomweelede kucita: Akati kankamu zyanu zyotatwe, inkamu yomwe ikaboole mu Sabata kuzoolindilila ŋanda yamwami cakulomya,+
6 nkamu imbi iyooba ku Mulyango wa Ntalisyo, mpoonya yamamanino iyooba kumulyango kunze aabalindizi baŋanda yamwami. Munoocincana kulindilila ŋanda.
7 Nkamu zyanu zyobilo izyeelede kupumuna mu Sabata zyeelede kulomya kulindilila ŋanda ya Jehova ikukwabilila mwami.
8 Mweelede kumuzinguluka mwami mumabazu oonse, umwi aumwi azilwanyo zyakwe mujanza lyakwe. Kufwumbwa uunjila mumilongo yabasikalumamba uyoojaigwa. Amube aafwaafwi amwami kufwumbwa nkwaaunka.”*
9 Basilutwe babasikalumamba bali mwaanda+ bakacita mbubonya mbwaakabalailila Jehoyada mupaizi. Aboobo umwi aumwi wabo wakaletelela baalumi bakwe ibakali kubeleka mu Sabata, antoomwe abaabo ibakali kupumuna mu Sabata, eelyo bakaboola kuli Jehoyada mupaizi.+
10 Mpoonya mupaizi wakapa basilutwe babasikalumamba bali mwaanda imasumo antobo zyamubalo izyakali zya Mwami Davida, eezyo izyakali muŋanda ya Jehova.
11 Lino balindizi+ bakazumanana kwiimikila umwi aumwi azilwanyo zyakwe mujanza lyakwe, kuzwa kululyo lwaŋanda kusikila kulumwensyi lwaŋanda, afwaafwi acipaililo+ alimwi aafwaafwi aŋanda kabamuzingulukide mwami.
12 Mpoonya Jehoyada wakamuleta mwana wamwami+ anze akumusamika musini akumubikka Bumboni,*+ aboobo bakamubikka kuba mwami alimwi bakamunanika. Kumane bakatalika kukambilila akwaamba kuti: “Aaongole mwami!”+
13 Lino Ataliya naakamvwa coongo cabantu ibakali kulunduka, mpoonya aawo wakaunka kuŋanda ya Jehova+ ikwakali bantu.
14 Mpoonya wakabona mwami kaimvwi afwaafwi amusemu kweelana acilengwa.+ Basilutwe abasikulizya myeembo+ bakali amwami, eelyo bantu boonse bamucisi bakali kusekelela akulizya myeembo. Abone boobo, Ataliya wakazapula zisani zyakwe akoongolola kuti: “Mwandizangila! Mwandizangila!”
15 Pele Jehoyada mupaizi wakalailila basilutwe bampi yabasikalumamba bali mwaanda,+ aabo ibakasalidwe kulanganya mpi yabasikalumamba akubaambila kuti: “Amumugwisye mumilongo yabasikalumamba alimwi kufwumbwa utiimutobele, mumujaye apanga!” Nkaambo mupaizi wakaambide kuti: “Mutamujaili muŋanda ya Jehova.”
16 Aboobo bakamujata, eelyo nobakasika kumanjililo aamulyango wamabbiza kuŋanda yamwami,+ bakamujaya ooko.
17 Mpoonya Jehoyada wakapanga cizuminano akati ka Jehova amwami alimwi abantu,+ ikuti bayoozumanana kuba bantu ba Jehova, eelyo alimwi wakapanga cizuminano akati kamwami abantu.+
18 Kuzwa waawo bantu boonse bamucisi bakaboola kuŋanda* ya Baala akumwaya zipaililo zyakwe,+ zikozyanyo zyakwe bakazipwayaula cakumaninina,+ alimwi Matani mupaizi wa Baala+ bakamujaya kumbele lyazipaililo.
Kumane mupaizi wakasala balangizi bamuŋanda ya Jehova.+
19 Kuyungizya waawo wakabweza basilutwe babasikalumamba bali mwaanda,+ mulindizi muna Kari, balindizi baŋanda yamwami+ alimwi abantu boonse bamucisi kutegwa bamusindikile mwami kuzwa kuŋanda ya Jehova, eelyo bakaboola kuŋanda yamwami kuletezya nzila yakumulyango wabalindizi. Kumane wakakkala acuuno cabwami icamami.+
20 Aboobo bantu boonse bamucisi bakasekelela alimwi munzi wakaba muluumuno nkaambo Ataliya bakamujaya apanga kuŋanda yamwami.
21 Jehoasi+ wakali amyaka iili ciloba naakaba mwami.+
Bupanduluzi buyungizyidwe
^ Mu Chihebrayo, “balunyungu lwabwami.”
^ Mu Chihebrayo, “abatumwa.”
^ Mu Chihebrayo, “nazwa alimwi ananjila.”
^ Ambweni eeli lyakali bbuku lyakuvwunga imwakalembedwe Mulawo wa Leza.
^ Naa “kutempele.”