2 Bami 12:1-21
12 Mumwaka waciloba wabulelo bwa Jehu,+ Jehoasi+ wakaba mwami alimwi wakalela kwamyaka iili 40 mu Jerusalemu. Banyina bakali ba Zibiya baku Beere-seba.+
2 Lino Jehoasi wakazumanana kucita ziluleme mumeso aa Jehova mazuba oonse Jehoyada mupaizi naakali kumulailila.
3 Nokuba boobo, masena aakukombela+ tanaakaagwisya pe, alimwi bantu bakacili kutuula zituuzyo alimwi akuuntumuna busi bwazipaizyo mumasena aayo.
4 Jehoasi wakaambila bapaizi kuti: “Amubweze mali oonse aaletwa kuŋanda ya Jehova aazituuzyo zisalala,+ mali aamutelo umwi aumwi ngatelesyegwa,+ mali aapegwa kweelana ambwaakonka muntu, amali umwi aumwi ngaleta kweelana ambwayanda kuŋanda ya Jehova.+
5 Bapaizi bayakwaabweza kuli basikusanga* akwaabelesya kubambulula ŋanda kufwumbwa mpoiyandika.”*+
6 Kusikila mumwaka wa 23 wabulelo bwa Mwami Jehoasi, bapaizi tiibakaninga bambulula ŋanda.+
7 Kumane Mwami Jehoasi wakaita Jehoyada+ mupaizi alimwi abapaizi bamwi akubabuzya kuti: “Ino nkaambo nzi ncomutaibambululi ŋanda oomo moiyandika? Aboobo amuleke kubweza mali kuli basikusanga ccita buyo kuti naa ngakubelesya mukubambulula ŋanda.”+
8 Aboobo bapaizi bakazumina kuleka kubweza mali kuzwa kubantu alimwi amukuli wakubambulula ŋanda tiiwakacili wabo.
9 Mpoonya Jehoyada mupaizi wakabweza bbokesi+ akudonkola kapulo acivwunisyo akulibikka ambali aacipaililo kululyo lwamanjililo muŋanda ya Jehova. Oomo momumo bapaizi ibakali kubeleka kabali balindizi baamulyango mobakali kwaabikka mali oonse aakali kuletwa muŋanda ya Jehova.+
10 Kufwumbwa babona kuti mali avwula mubbokesi, mulembi wamwami amupaizi mupati bakali kuboola kwaabweza* akwaabala mali aakaletwa muŋanda ya Jehova.+
11 Mali aakabalwa bakali kwaapa kulibaabo ibakasalidwe kucita mulimo muŋanda ya Jehova. Kumane balo bakali kubbadela basikubeza abasikuyaka ibakali kubeleka kuŋanda ya Jehova,+
12 kubikkilizya abasikuyaka amabwe alimwi abasikubeza mabwe. Bakali kuula mapulanga amabwe aacezudwe aakubambuluzya ŋanda ya Jehova akubbadelela zyoonse zyakali kuyandika kukuyakulula ŋanda.
13 Nokuba boobo, kunyina mali aakaletwa muŋanda ya Jehova aakabelesyegwa kupanga mitiba yakusambila yansiliva, tugele twakuzimya malambe, mitiba, myeembo,+ naa zintu zili zyoonse zyangolida azintu zili zyoonse zyansiliva izyamuŋanda ya Jehova.+
14 Bakali kwaapa buyo baabo ibakali kubeleka mulimo, alimwi bakaabelesya kubambulula ŋanda ya Jehova.
15 Baalumi aabo ibakapedwe mulimo tiibakali kubabuzya kuti bapandulule mbubakali kwaabelesya mali, nkaambo bakali kusyomeka.+
16 Pele mali aazipaizyo zyamilandu+ amali aazituuzyo zyacibi tiibakali kwaaleta muŋanda ya Jehova; akali aabapaizi.+
17 Aciindi eeco Hazaeli+ mwami wa Siriya wakaunka kuyoolwana munzi wa Gati,+ eelyo wakauzunda, kumane wakaunka kukulwana* Jerusalemu.+
18 Mpoonya Mwami Jehoasi wa Juda wakabweza zituuzyo zisalala zyoonse eezyo basikale bakwe ba Jehosafati, Jehoramu a Ahaziya bami ba Juda nzyobakasalazya kubikkilizya azituuzyo zyakwe zisalala angolida yoonse yakajanika muziyobwedo zyamuŋanda ya Jehova amuŋanda yamwami, eelyo wakazitumya kuli Hazaeli mwami wa Siriya.+ Aboobo wakaleka kulwana Jerusalemu.
19 Makani oonse aakaindi aamba zya Jehoasi azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Juda.
20 Nokuba boobo, babelesi bakwe abalo bakasangana mukuzanga+ eelyo bakamujaya Jehoasi kuŋanda ya Citantaala*+ iili munsi aanzila iiya ku Sila.
21 Ibabelesi bakwe ba Jozakara mwana wa Simeati a Jehozabadi mwana wa Someri mbambabo ibakamujaya.+ Bakamuzikka abamausyi mu Munzi wa Davida, eelyo Amaziya mwanaakwe wakaba mwami mubusena bwakwe.+
Bupanduluzi buyungizyidwe
^ Naa “kubalongwe.”
^ Naa “aali ŋanzi.”
^ Naa “kwaabikka mutusaka.” Mu Chihebrayo, “kwaanga.”
^ Mu Chihebrayo, “Hazaeli wakagamika busyu bwakwe kuti aunke kuyoolwana.”
^ Naa “ku Beti-milo.”
