2 Bami 15:1-38
15 Mumwaka wa 27 wabulelo bwa Mwami Jeroboamu* wa Israyeli, Azariya*+ mwana wa Mwami Amaziya+ wa Juda wakaba mwami.+
2 Wakali amyaka iili 16 naakaba mwami, alimwi wakalela kwamyaka iili 52 mu Jerusalemu. Banyina bakali ba Jekoliya baku Jerusalemu.
3 Wakazumanana kucita ziluleme mumeso aa Jehova mbubonya mbwaakacita Amaziya usyi.+
4 Nokuba boobo, masena aakukombela tanaakaagwisya pe,+ aboobo bantu bakacili kutuula zipaizyo alimwi akuuntumuna busi bwazipaizyo mumasena aakukombela.+
5 Jehova wakapa kuti mwami aciswe, aboobo wakazumanana kali sicinsenda+ kusikila buzuba naakafwa; alimwi wakazumanana kukkala muŋanda imbi alikke,+ eelyo Jotamu+ mwana wamwami ngowakali kweendelezya ŋanda yamwami akubeteka bantu bamucisi.+
6 Makani oonse aakaindi aamba zya Azariya+ azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Juda.
7 Mpoonya Azariya wakoona abamausyi+ alimwi bakamuzikka antoomwe abamausyi mu Munzi wa Davida; eelyo Jotamu mwanaakwe wakaba mwami mubusena bwakwe.
8 Mumwaka wa 38 wabulelo bwa Mwami Azariya+ wa Juda, Zekariya+ mwana wa Jeroboamu wakaba mwami wa Israyeli mu Samariya, alimwi wakalela kwamyezi iili cisambomwe.
9 Wakacita zibi mumeso aa Jehova mbubonya mbobakacita bamausyi. Tanaakaleka kucita zibi nzyaakacita Jeroboamu mwana wa Nebati, eezyo nzyaakapa kuti bana Israyeli bacite.+
10 Mpoonya Salumu mwana wa Jabesi wakazangila+ Zekariya ku Ibleamu.+ Naakamana kumujaya, wakaba mwami mubusena bwakwe.
11 Makani oonse aakaindi aamba zya Zekariya alilembedwe mubbuku lyamakani aakaindi aamba zyamazuba aabami ba Israyeli.
12 Eeci cakazuzikizya jwi Jehova ndyaakaambide kuli Jehu naakati: “Mazyalani one aabana bako+ ayookkala acuuno cabwami ca Israyeli.”+ Aboobo eeci ncecakacitika.
13 Lino Salumu mwana wa Jabesi wakaba mwami mumwaka wa 39 wabulelo bwa Mwami Uziya+ wa Juda, alimwi wakalela kwamwezi omwe uukkwene mu Samariya.
14 Mpoonya Menahemu mwana wa Gadi wakaboola kuzwa ku Tiriza+ akuunka ku Samariya ooko nkwaakajaya Salumu+ mwana wa Jabesi mu Samariya. Naakamana kumujaya, wakaba mwami mubusena bwakwe.
15 Makani oonse aakaindi aamba zya Salumu abuzangi bwakwe mbwaakazanga alilembedwe mubbuku lyamakani aakaindi aamba zyamazuba aabami ba Israyeli.
16 Aciindi eeco Menahemu wakaboola kuzwa ku Tiriza akuulwana munzi wa Tipisa abantu boonse bakali mulinguwo amumasena aakazingulukide, nkaambo bakakaka kumujalwida milyango yanguwo. Wakaunyonyoona munzi akubaandula bamakaintu boonse ibakamitide ibakali mumo.
17 Mumwaka wa 39 wabulelo bwa Mwami Azariya wa Juda, Menahemu mwana wa Gadi wakaba mwami wa Israyeli, alimwi wakalela myaka iili 10 mu Samariya.
18 Wakali kucita zibi mumeso aa Jehova. Tanaakaleka kucita zibi zyoonse zya Jeroboamu mwana wa Nebati, eezyo nzyaakapa kuti bana Israyeli bacite,+ mumazuba aakwe oonse.
19 Mwami Puli+ wa Asuri wakaboola mucisi ca Israyeli, aboobo Menahemu wakapa Puli matalenta* aansiliva aali 1,000 kutegwa amugwasye kuyumya bwami bwakwe.+
20 Aboobo Menahemu wakajana nsiliva kuzwa kubana Israyeli kwiinda mukwiibweza kubaalumi bavwubi kapati.+ Wakabweza masyekeli* aansiliva aali 50 kuzwa kumwaalumi muvwubi umwi aumwi akwaapa kumwami wa Asuri. Mpoonya mwami wa Asuri wakapiluka, taakwe naakakkala mucisi pe.
21 Makani oonse aakaindi aamba zya Menahemu+ azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Israyeli.
22 Mpoonya Menahemu wakoona abamausyi; eelyo Pekahiya mwanaakwe wakaba mwami mubusena bwakwe.
23 Mumwaka wa 50 wabulelo bwa Mwami Azariya wa Juda, Pekahiya mwana wa Menahemu wakaba mwami wa Israyeli mu Samariya, alimwi wakalela myaka yobilo.
24 Wakali kucita zibi mumeso aa Jehova. Tanaakaleka kucita zibi zya Jeroboamu mwana wa Nebati, eezyo nzyaakapa kuti bana Israyeli bacite.+
25 Mpoonya Peka+ mwana wa Remaliya umwi wabalupati-pati bakwe antoomwe a Arigobi a Ariye bakazangila Pekahiya akumujaya mu Samariya mungazi iikwabilidwe yaŋanda yamwami. Wakali antoomwe abaalumi bali 50 baku Gileadi; eelyo naakamana kumujaya wakaba mwami mubusena bwakwe.
26 Makani oonse aakaindi aamba zya Pekahiya azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Israyeli.
27 Mumwaka wa 52 wabulelo bwa Mwami Azariya wa Juda, Peka+ mwana wa Remaliya wakaba mwami wa Israyeli mu Samariya, alimwi wakalela myaka iili 20.
28 Wakali kucita zibi mumeso aa Jehova, alimwi tanaakaleka kucita zibi zya Jeroboamu mwana wa Nebati, eezyo nzyaakapa kuti bana Israyeli bacite.+
29 Mumazuba aa Mwami Peka wa Israyeli, Mwami Tigilati-pilesere+ wa Asuri wakaboola akubweza Iyoni, Abeli-beti-maaka,+ Janoa, Kedesi,+ Hazori, Gileadi+ a Galilaya, inyika yoonse ya Nafutali,+ alimwi wakabatola kabali baange ku Asuri.+
30 Mpoonya Hosea+ mwana wa Ela wakazangila Peka mwana wa Remaliya akumujaya; eelyo wakaba mwami mubusena bwakwe mumwaka wa 20 wabulelo bwa Jotamu+ mwana wa Uziya.
31 Makani oonse aakaindi aamba zya Peka azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Israyeli.
32 Mumwaka wabili wabulelo bwa Peka mwana wa Remaliya mwami wa Israyeli, Jotamu+ mwana wa Mwami Uziya+ wa Juda wakaba mwami.
33 Wakali amyaka iili 25 naakaba mwami, alimwi wakalela kwamyaka iili 16 mu Jerusalemu. Banyina bakali ba Jerusa mwana wa Zadoki.+
34 Wakazumanana kucita ziluleme mumeso aa Jehova, mbubonya mbwaakacita Uziya usyi.+
35 Nokuba boobo masena aakukombela tanaakaagwisya pe alimwi bantu bakacili kutuula zipaizyo akuuntumuna busi bwazipaizyo mumasena aayo.+ Ngonguwe wakayaka mulyango waatala waŋanda ya Jehova.+
36 Makani oonse aakaindi aamba zya Jotamu, azintu nzyaakacita alilembedwe mubbuku lyamakani aakaindi aamba zyamazuba aabami ba Juda.
37 Mumazuba aayo Jehova wakatalika kutuma Rezini mwami wa Siriya a Peka+ mwana wa Remaliya kuti bakalwane cisi ca Juda.+
38 Mpoonya Jotamu wakoona abamausyi alimwi wakazikkwa kubusena kwakazikkilwa bamausyi mu Munzi wa Davida sikale wakwe. Eelyo Ahazi mwanaakwe wakaba mwami mubusena bwakwe.
Bupanduluzi buyungizyidwe
^ Nkokuti, Jeroboamu Wabili.
^ Nkokwaamba kuti “Jehova Wagwasya.” Wiitwa kuti Uziya ku 2Ba 15:13; 2Mk 26:1-23; Is 6:1; alimwi aku Zek 14:5.
^ Talenta lyomwe lyakali kulema makkilogilamu aali 34.2. Amubone Makani Aayungizyidwe B14.
^ Syekeli lyomwe lyakaleelene amagilamu aali 11.4. Amubone Makani Aayungizyidwe B14.
