2 Bami 16:1-20
16 Mumwaka wa 17 wabulelo bwa Peka mwana wa Remaliya, Ahazi+ mwana wa Mwami Jotamu wa Juda wakaba mwami.
2 Ahazi wakali amyaka iili 20 naakaba mwami, alimwi wakalela myaka iili 16 mu Jerusalemu. Tanaakacita ziluleme mumeso aa Jehova Leza wakwe mbuli mbwaakacita Davida sikale wakwe.+
3 Muciindi caboobo, wakeenda munzila zyabami babana Israyeli,+ alimwi naba mwanaakwe wakamuumpa* mumulilo+ kweelana azilengwa zisesemya zyabamasi+ aabo Jehova mbaakatanda kubusyu bwabana Israyeli.
4 Alimwi wakazumanana kutuula zipaizyo akuuntumuna busi bwazipaizyo mumasena aakukombela,+ mumalundu alimwi amunsi aazisamu zyoonse zifwefwema.+
5 Aciindi eeco Mwami Rezini wa Siriya alimwi a Peka mwana wa Remaliya imwami wa Israyeli bakaboola kuzoolwana Jerusalemu.+ Bakasinkila Ahazi, pele bakaalilwa kuuzunda munzi.
6 Aciindi nciconya eeco Mwami Rezini wa Siriya wakapilusya Elati+ ku Edomu, kumane wakatanda ba Juda* kuzwa mu Elati. Mpoonya bana Edomu bakanjila mu Elati, alimwi bakakkala ooko kusikila sunu.
7 Aboobo Ahazi wakatuma batumwa ku Mwami Tigilati-pilesere+ wa Asuri kuti: “Mebo ndili mubelesi wako alimwi ndili mwanaako. Koboola undivwune kujanza lyamwami wa Siriya akujanza lyamwami wa Israyeli, aabo ibali mukundilwana.”
8 Kumane Ahazi wakabweza nsiliva angolida njaakajana muŋanda ya Jehova amuziyobwedo zyamuŋanda yamwami eelyo wakazituma kumwami wa Asuri kazili cisinkamulomo.+
9 Mpoonya mwami wa Asuri wakakuswiilila kulomba kwakwe, eelyo wakaunka ku Damasiko akuuzunda akutola bantu banguwo kabali baange ku Kiri,+ eelyo Rezini wakamujaya.+
10 Mpoonya Mwami Ahazi wakaunka kuyooswaangana a Mwami Tigilati-pilesere wa Asuri ku Damasiko. Naakabona cipaililo caku Damasiko, Mwami Ahazi wakatumina Urija mupaizi cikozyanyo cacipaililo mbocakali kuboneka alimwi ambocakayakidwe.+
11 Urija+ mupaizi wakayaka cipaililo+ kweelana amalailile oonse ngaakamutumina Mwami Ahazi kuzwa ku Damasiko. Urija mupaizi wakamanizya kuciyaka Mwami Ahazi kataningapiluka kuzwa ku Damasiko.
12 Lino mwami naakapiluka kuzwa ku Damasiko akucibona cipaililo, wakaunka kucipaililo akutuula zituuzyo alincico.+
13 Alimwi acipaililo eeco wakauntumuna busi bwazituuzyo zyakwe zyuumpwa azituuzyo zyamaila; alimwi kuyungizya waawo wakatila zituuzyo zyakwe zinyugwa akusansaila bulowa bwacipaizyo calumvwano alincico.
14 Kumane wakacigwisya cipaililo camukuba+ icakali kumbele lya Jehova kuzwa abusena bwancico kumbele lyaŋanda, wakacigwisya akati kacipaililo cakwe alimwi aŋanda ya Jehova, eelyo wakacibikka kunyika kwacipaililo cakwe.
15 Mpoonya Mwami Ahazi wakalailila Urija+ mupaizi kuti: “Acipaililo cipati kotuula cituuzyo cuumpwa camafwumofwumo,+ cituuzyo camaila cakumangolezya,+ cituuzyo cuumpwa camwami acituuzyo cakwe camaila kubikkilizya acituuzyo cuumpwa cabantu boonse bamucisi, cituuzyo cabo camaila acituuzyo cabo cinyugwa. Alimwi weelede kusansaila bulowa boonse bwazituuzyo zyuumpwa alimwi abulowa boonse bwazipaizyo zimbi acipaililo. Pele kujatikizya cipaililo camukuba, ndilazyiba cakucita ancico.”
16 Urija mupaizi wakacita zyoonse nzyaakamulailila Mwami Ahazi.+
17 Kuyungizya waawo, Mwami Ahazi wakatendaula zisenke zyamumbali aatuŋola+ akugwisya zyakusambila izyakali atuŋola ooto,+ alimwi wakagwisya Zyiba lyakakkede atala lyabapoho bamukuba+ akulibikka ansi aamabwe ayalidwe.+
18 Mpoonya busena buvwumbilidwe ibwakali kubelesyegwa mu Sabata, oobo mbubakayaka muŋanda alimwi amulyango wamwami mpaakali kunjilila kuya muŋanda ya Jehova, wakazilonzezya kubusena bumbi; wakacita oobo akaambo kakuyoowa mwami wa Asuri.
19 Makani oonse aakaindi aamba zya Ahazi azintu nzyaakacita alilembedwe mubbuku lyamakani aakaindi aamba zyamazuba aabami ba Juda.+
20 Kumane Ahazi wakoona abamausyi alimwi wakazikkwa kubusena kwakazikkilwa bamausyi mu Munzi wa Davida; eelyo Hezekiya*+ mwanaakwe wakaba mwami mubusena bwakwe.
Bupanduluzi buyungizyidwe
^ Mu Chihebrayo, “wakamwiinzya.”
^ Naa “bantu baku Juda.”
^ Nkokwaamba kuti “Jehova Ulayumya-yumya.”
