2 Bami 17:1-41
17 Mumwaka wa 12 wabulelo bwa Mwami Ahazi wa Juda, Hosea+ mwana wa Ela wakaba mwami wa Israyeli mu Samariya; wakalela myaka iili fwuka.
2 Wakali kucita zibi mumeso aa Jehova, pele tanaakeelana abami ba Israyeli ibakamusaangunina.
3 Mwami Salimaneseri wa Asuri wakaboola kuzoomulwana,+ eelyo Hosea wakaba mubelesi wakwe alimwi wakatalika kutela mutelo kulinguwe.+
4 Nokuba boobo, mwami wa Asuri wakazoozyiba kuti Hosea wakalijatikizyidwe mukuzanga nkaambo wakatumide batumwa ku Mwami So wa Egepita+ alimwi tanaakatela mutelo kumwami wa Asuri mbuli myaka yamusyule. Aboobo mwami wa Asuri wakamwaanga akumubikka muntolongo.
5 Mwami wa Asuri wakaunka kuyoolwana cisi coonse alimwi wakaboola ku Samariya akuusinkilila munzi myaka yotatwe.
6 Mumwaka wafwuka wabulelo bwa Hosea, imwami wa Asuri wakazunda Samariya.+ Kumane wakatola bana Israyeli kabali baange+ ku Asuri akuyoobakkazika mu Hala amu Habori munsi aamulonga wa Gozani+ alimwi amuminzi yaba Medi.+
7 Eeci cakacitika nkaambo bana Israyeli bakabisizya Jehova Leza wabo iwakabagwisya mucisi ca Egepita kuzwa mumaanza aa Farao mwami wa Egepita.+ Bakali kukomba* baleza bambi,+
8 bakatobela zilengwa zyamisyobo eeyo Jehova njaakatanda kubusyu bwabana Israyeli alimwi bakatobela zilengwa bami ba Israyeli nzyobakalipangila.
9 Bana Israyeli bakali kucita zitaluleme mumeso aa Jehova Leza wabo. Bakazumanana kuyaka masena aakukombela muminzi yabo yoonse,+ kuzwa kungazi yamulindizi kusikila kumunzi uukwabilidwe.*
10 Bakazumanana kuliimikizizya misemu yamabwe yakukomba alimwi amisemu yazisamu yakukomba*+ atala aatulundu tulamfwu toonse alimwi amunsi aazisamu zifwefwema zyoonse;+
11 alimwi bakazumanana kuuntumuna busi bwazipaizyo mumasena aakukombela oonse mbubonya mbobakacita bamasi aabo Jehova mbaakatola kabali baange akaambo kambabo.+ Bakazumanana kucita zibi kutegwa bamukalazye Jehova.
12 Bakazumanana kukomba mituni iisesemya*+ eeyo Jehova njaakabaambilide kuti: “Tamweelede kwiikomba!”+
13 Jehova wakazumanana kucenjezya bana Israyeli abana Juda kwiinda mubasinsimi bakwe boonse abasizilengaano boonse+ kuti: “Amuleke nzila zyanu zibi!+ Amutobele malailile aangu akubamba milawo yangu kweelana amulawo woonse ngondakapa bamauso alimwi ngundakamutumina kwiinda mubabelesi bangu basinsimi.”
14 Pele tiibakaswiilila alimwi bakazumanana kuba basicinguni* mbubonya mbuli bamausyi aabo ibatakatondezya lusyomo muli Jehova Leza wabo.+
15 Bakazumanana kukaka malailile aakwe, cizuminano cakwe+ ncaakapangene abamausyi alimwi ancenjezyo nzyaakali kubacenjezya,+ bakazumanana kutobela mituni yabuyo+ eelyo abalo bakaba babuyo,+ bakaiya misyobo yakabazingulukide eeyo Jehova njaakabalailila kuti tabeelede kwiitobela.+
16 Bakazumanana kwiisiya milawo yoonse ya Jehova Leza wabo akulipangila zikozyanyo zyakufwula zyaboombe bobilo+ amusemu wacisamu wakukomba,*+ eelyo bakakotamina makamu oonse aakujulu+ akukomba Baala.+
17 Alimwi bakali kuumpa* bana babo basankwa abasimbi mumulilo,+ kusonda,+ kucita masalamuzi alimwi bakalitakata* kukucita zintu zibi mumeso aa Jehova kutegwa bamukalazye.
18 Aboobo Jehova wakanyema kapati akaambo kabana Israyeli cakuti wakabatanda kubusyu bwakwe.+ Kunyina naba omwe ngwaakasiya kunze buyo lyamusyobo wa Juda ulikke.
19 Nobaba bana Juda tiibakabamba milawo ya Jehova Leza wabo;+ abalo bakeenda kweelana aziyanza nzyobakali kutobela bana Israyeli.+
20 Aboobo Jehova wakalukaka lunyungu loonse lwa Israyeli alimwi wakabapenzya akubaaba mumaanza aabasikubasaala kusikila naakabatanda kuzwa kubusyu bwakwe.
21 Wakaandaanya bana Israyeli kuzwa kuŋanda ya Davida, eelyo bakabikka Jeroboamu mwana wa Nebati kuba mwami.+ Pele Jeroboamu wakapa kuti bana Israyeli baleke kutobela Jehova alimwi wakabapa kuti bacite cibi cipati.
22 Bana Israyeli bakazumanana kweenda muzibi zyoonse nzyaakacita Jeroboamu.+ Tiibakazileka pe
23 kusikila Jehova naakatanda bana Israyeli kubusyu bwakwe kweelana ambwaakaambide kwiinda mubabelesi bakwe boonse basinsimi.+ Aboobo bana Israyeli bakatolwa kabali baange kunyika ya Asuri+ ooko nkobacibede kusikila sunu.
24 Mpoonya mwami wa Asuri wakaleta bantu kuzwa ku Babuloni, ku Kuta, ku Ava, ku Hamati aku Sefaravaimu+ akubabikka kuti bakkale muminzi ya Samariya mucibaka cabana Israyeli; bakaubweza munzi wa Samariya akukkala muminzi yanguwo.
25 Nibakatalika kukkala kooko, tiibakali kumuyoowa* Jehova. Aboobo Jehova wakabatumina basyuumbwa,+ eelyo bamwi akati kabo bakajaigwa.
26 Aboobo bakaambila mwami wa Asuri kuti: “Bantu mbookatola kabali baange akubabikka kuti bakkale muminzi ya Samariya tabazyi mbwayelede kukombwa* Leza wamucisi. Aboobo ubatumina basyuumbwa ibali mukubajaya akaambo kakuti kunyina uuzyi mbwayelede kukombwa Leza wamucisi.”
27 Kumane mwami wa Asuri wakalailila kuti: “Amutume umwi wabapaizi mbomwakaleta kabali baange kuzwa kooko, kuti aunke akuyookkala ooko akubayiisya mbwayelede kukombwa Leza wamucisi eeco.”
28 Aboobo umwi wabapaizi ngobakaletede kali mwaange kuzwa ku Samariya wakaunka akuyookkala ku Beteli,+ eelyo wakatalika kubayiisya mbobakeelede kuyoowa* Jehova.+
29 Nokuba boobo, musyobo umwi aumwi wakalipangila leza* wabo ooyo ngobakabikka mumaanda aakukombela aayo bana Samariya ngobakapangide; musyobo umwi aumwi wakacita oobo muminzi yabo mobakali kukkala.
30 Aboobo bana Babuloni bakapanga Sukoti-benoti, bana Kuta bakapanga Nerigali, eelyo bana Hamati+ bakapanga Asima,
31 bana Avi bakapanga Nibazi a Tarataka. Bana Sefaravaimu bakali kuumpa bana babo kuli Adrameleki akuli Anameleki baleza baku Sefaravaimu.+
32 Nokuba kuti bantu aaba bakali kumuyoowa Jehova, bakalisalila bapaizi akati kabantu buyo kuba mumasena aakukombela, eelyo aaba bakatalika kubabelekela mumaanda aakukombela.+
33 Aboobo bakali kumuyoowa Jehova, pele bakali kukomba baleza babo kweelana abukombi* bwamasi nkobakabagwisya nobakabaleta kabali baange.+
34 Kusikila sunu balacita kweelana abukombi* bwankobazwa. Kunyina naba omwe uukomba* Jehova nokuba kutobela malailile aakwe, mbeta zyakwe a Mulawo wakwe ooyo Jehova ngwaakapa bana ba Jakobo, ooyo ngwaakacinca zina kuba Israyeli.+
35 Jehova naakapangana cizuminano ambabo,+ wakabalailila kuti: “Tamweelede kuyoowa baleza bambi alimwi tamweelede kubakotamina nokuba kubakomba naa kutuula zipaizyo kulimbabo.+
36 Pele Jehova iwakamugwisya mucisi ca Egepita ajanza lyanguzu litandabede,+ ngonguwe ngomweelede kuyoowa+ alimwi ngonguwe ngomweelede kukotamina akutuulila zipaizyo.
37 Lyoonse mweelede kubikkila maano kutobela malailile, imbeta a Mulawo ngwaakamulembela,+ alimwi tamweelede kuyoowa baleza bambi.
38 Tamweelede kuluba cizuminano ncindakapangana andinywe,+ alimwi tamweelede kuyoowa baleza bambi.
39 Jehova Leza wanu ngonguwe ngomweelede kuyoowa nkaambo ngonguwe uyoomuvwuna kumaanza aabasinkondonyoko.”
40 Pele kunyina nobakaswiilila pe, alimwi bakatobela bukombi* bwankobazwa.+
41 Aboobo misyobo eeyi yakazootalika kumuyoowa Jehova,+ pele bakacili kukomba zikozyanyo zyabo. Bana babo abazyukulu babo balacita mbubonya mbobakali kucita bamausyi kusikila sunu.
Bupanduluzi buyungizyidwe
^ Mu Chihebrayo, “kuyoowa.”
^ Nkokuti, mumasena oonse, kufwumbwa naa kwakali bantu basyoonto naa banji.
^ Amubone Bupanduluzi Bwamabala.
^ Mu Chihebrayo kuboneka kuti bbala eeli liliswaangene abbala lyaamba “bufwumba” alimwi lilabelesyegwa kwaamba cintu cisesemya.
^ Mu Chihebulayo, “bakayumya nsingo zyabo.”
^ Amubone Bupanduluzi Bwamabala.
^ Mu Chihebrayo, “bakalisambala.”
^ Mu Chihebrayo, “kwiinzya.”
^ Naa “kumukomba.”
^ Naa “zilengwa zyabukombi bwa.”
^ Naa “kukomba.”
^ Naa “baleza.”
^ Naa “azilengwa zyabukombi.”
^ Naa “azilengwa zyabukombi.”
^ Mu Chihebrayo, “uuyoowa.”
^ Naa “zilengwa zyabukombi.”
