2 Bami 2:1-25
2 Lino Jehova naakali afwaafwi kutola Elija+ kujulu* mukambizi,+ Elija a Elisha+ bakanyamuka kuzwa ku Giligala.+
2 Eelyo Elija wakaambila Elisha kuti: “Kosyaala aano, nkaambo Jehova wandituma ku Beteli.” Pele Elisha wakati: “Masimpe mbubonya Jehova mbwali muumi alimwi ayebo mboli muumi, tandikookuleka pe.” Aboobo bakaunka ku Beteli.+
3 Mpoonya bana babasinsimi* ibakali ku Beteli bakaboola kuli Elisha akumwaambila kuti: “Sena ulizyi kuti sunu Jehova ulamutola simalelaako?”+ Eelyo wakati: “Inzya, andime ndilizyi oobo. Atwaaumune buyo makani aaya.”
4 Lino Elija wakaambila Elisha kuti: “Kosyaala aano, nkaambo Jehova wandituma ku Jeriko.”+ Pele Elisha wakati: “Masimpe mbubonya Jehova mbwali muumi alimwi ayebo mboli muumi, tandikookuleka pe.” Aboobo bakaunka ku Jeriko.
5 Mpoonya bana babasinsimi ibakali ku Jeriko bakaboola kuli Elisha akumwaambila kuti: “Sena ulizyi kuti sunu Jehova ulamutola simalelaako?” Eelyo wakati: “Inzya, andime ndilizyi oobo. Atwaaumune buyo makani aaya.”
6 Lino Elija wakaambila Elisha kuti: “Kosyaala aano, nkaambo Jehova wandituma ku Jordano.” Pele Elisha wakati: “Masimpe mbubonya Jehova mbwali muumi alimwi ayebo mboli muumi, tandikookuleka pe.” Aboobo boonse bobilo bakaunka.
7 Bana babasinsimi ibali 50 abalo bakatobela akuyakwiima alaale kabalangilila, ciindi aaba bobilo nobakaimvwi kumbali aa Jordano.
8 Mpoonya Elija wakabweza cisani cakwe cabusinsimi,+ wakacivwunga akuuma maanzi, eelyo akaandaana kulumwensyi akululyo cakuti boonse bobilo bakazabuka anyika njumu.+
9 Lino mbobakazabukila buyo, Elija wakaambila Elisha kuti: “Kolomba ncoyanda kuti ndikucitile nenditanatolwa kuzwa kulinduwe.” Aboobo Elisha wakati: “Akaka, ndilomba kuti zibeela zyobilo+ zyamuuya wako+ zibe alindime.”
10 Elija wakaingula kuti: “Walomba cintu cikatazya. Ikuti undibone ndatolwa kuzwa kulinduwe, cilacitika oobo kulinduwe; pele kuti utandiboni, tacikoocitika pe.”
11 Lino nobakali kuyaabweenda kumwi kabaambaula, mpoonya aawo kwakaboneka nkalaki yankondo yamulilo amabbiza aamulilo,+ eelyo zyakabaandaanya, kumane Elija wakatolwa akambizi kujulu.*+
12 Ciindi Elisha naakali kulangilila, wakalila kati: “Taata, taata! Inkalaki abasimabbiza ba Israyeli!”+ Eelyo tanaakamubona limbi pe. Kumane wakabweza zisani zyakwe akuzizapula muzibeela zyobilo.+
13 Aboobo wakabweza cisani cabusinsimi+ ca Elija icakaloka kuzwa kulinguwe, eelyo wakapiluka akwiima mumbali aankomwe ya Jordano.
14 Mpoonya wakabweza cisani cabusinsimi ca Elija icakaloka kuzwa kulinguwe akuuma maanzi akwaamba kuti: “Ino uli kuli Jehova Leza wa Elija?” Naakauma maanzi, mpoonya akatalika kwaandaana kulumwensyi akululyo, eelyo Elisha wakazabuka.+
15 Bana babasinsimi ibakali ku Jeriko nibakamubona kulaale, bakati: “Muuya wa Elija wakkala ali Elisha.”+ Aboobo bakaunka kuyooswaangana anguwe akumuvwuntamina ansi.
16 Kumane bakamwaambila kuti: “Swebo tobabelesi bako tujisi baalumi bali 50 basimide. Abaunke kuyoomuyandaula simalelaako. Ambweni muuya* wa Jehova wamubweza akuyoomusowela acilundu cimwi naa mukkuti limwi.”+ Pele wakati: “Mutabatumi pe.”
17 Nokuba boobo, bakazumanana kumusungilizya mane limwi wafwa nsoni, aboobo wakati: “Amubatume.” Mpoonya bakatuma baalumi bali 50, eelyo bakazumanana kumuyandaula mazuba otatwe, pele tiibakamujana pe.
18 Nobakapiluka kulinguwe, wakali kukkala mu Jeriko.+ Mpoonya wakati kulimbabo: “Sena tiindakamwaambila kuti mutaunki?”
19 Mukuya kwaciindi, bantu bamumunzi bakati kuli Elisha: “Simalelaangu ulibwene kuti munzi ukkede abusena bubotu;+ pele maanzi mabi alimwi apa kuti bamakaintu kabatazyali.”*
20 Kumane wakati: “Amundiletele mutiba mupya alimwi mubikke munyo mulinguwo.” Aboobo bakamuletela.
21 Mpoonya wakaunka kukasensa kamaanzi akufwusa munyo mulinkako+ akwaamba kuti: “Mboobu Jehova mbwaamba, ‘Aaya maanzi ndaasilika. Taakaleti limbi lufwu naa kupa bamakaintu kutazyala.’”*
22 Maanzi aayo mabotu kusikila sunu kweelana amajwi ngaakaamba Elisha.
23 Lino wakazwa ooko akuunka ku Beteli. Naakali kuyaabweenda munzila, kwakaboola nkamu yabana balombe ibakatalika kumufwubaazya+ kabaamba kuti: “Koya syaalubala! Koya syaalubala!”
24 Kumane wakaceba musyule akubalanga, mpoonya wakabasinganya muzina lya Jehova. Mpoonya kwakaboola zibbeya zizyazi zyobilo+ kuzwa musyokwe akubazazaula bana bali 42.+
25 Kuzwa waawo wakazumanana kuya ku Cilundu ca Karimeli,+ eelyo naakazwa kooko wakapiluka ku Samariya.
Bupanduluzi buyungizyidwe
^ Naa “mumulengalenga.”
^ Kulibonya kuti mabala aakuti “bana babasinsimi” aamba cikolo cabasinsimi naa kabunga kabasinsimi.
^ Naa “mumulengalenga.”
^ Naa “muwo.”
^ Naa ambweni, “apa kuti mada kaazwa.”
^ Naa ambweni, “kuzwa mada.”
