2 Bami 21:1-26
21 Manase+ wakali amyaka iili 12 naakaba mwami alimwi wakalela myaka iili 55 mu Jerusalemu.+ Banyina bakali ba Hefiziba.
2 Wakacita zibi mumeso aa Jehova akutobela zilengwa zisesemya nzyobakali kucita bamasi+ aabo Jehova mbaakatanda kubusyu bwabana Israyeli.+
3 Wakayakulula masena aakukombela aayo Hezekiya usyi ngaakanyonyweede,+ akuyaka zipaililo zya Baala amusemu wacisamu wakukomba,*+ mbubonya mbwaakacitide Ahabu mwami wa Israyeli.+ Alimwi wakali kukotamina makamu oonse aakujulu akwaakomba.+
4 Alimwi wakayaka zipaililo muŋanda ya Jehova,+ eeyo Jehova njaakaamba kuti: “Mu Jerusalemu, ndiyoobikka zina lyangu.”+
5 Mpoonya wakayaka zipaililo zyamakamu oonse aakujulu+ mumabbuwa obilo aaŋanda ya Jehova.+
6 Wakaumpa* mwanaakwe mumulilo; wakali kucita masalamuzi,+ wakali kusonda, alimwi wakasala baŋanga abantu baamba zyakumbele.+ Wakacita zibi zinji mumeso aa Jehova akumunyemya.
7 Wakabikka cikozyanyo cibezedwe camusemu wacisamu wakukomba*+ ncaakapanga muŋanda eeyo Jehova njaakaambila Davida a Solomoni mwanaakwe kuti: “Muŋanda eeyi alimwi amu Jerusalemu, imunzi ngondasala akati kamisyobo yabana Israyeli yoonse, ndiyoobikka zina lyangu kukabe kutamani.+
8 Alimwi nsikoyootuntulisya limbi zituta zyabana Israyeli kuzwa munyika njindakapa bamausyi,+ kufwumbwa buyo kuti balomye kutobela zyoonse nzindakabalailila,+ nkokuti Mulawo woonse ooyo Musa mubelesi wangu ngwaakabalailila kuti batobele.”
9 Pele kunyina nibakaswiilila pe, alimwi Manase wakazumanana kubasowa, kubapa kucita zibi zipati kwiinda misyobo eeyo Jehova njaakanyonyoona kubusyu bwabana Israyeli.+
10 Jehova wakazumanana kwaambaula kwiinda mubabelesi bakwe basinsimi+ kuti:
11 “Manase mwami wa Juda wacita zintu eezyi zisesemya; wacita zibi zisesemya kapati kwiinda zibi zyoonse nzyobakacita bana Amori+ ibakamusaangunina,+ alimwi wapa kuti ba Juda babisye amituni yakwe iisesemya.*
12 Aboobo mboobu mbwaamba Jehova Leza wa Israyeli: ‘Ndilaletela Jerusalemu+ a Juda mapenzi alimwi kufwumbwa muntu uuyakwaamvwa uyooswiimwa mubili.+
13 Alimwi ndiyootandabika ntambo yakupimya+ ali Jerusalemu njondakapimya Samariya+ alimwi acipimyo* camuyaki ncondakapimya ŋanda ya Ahabu,+ alimwi ndiyoopukuta Jerusalemu kuti asalale mbubonya mbuli muntu mbwapukuta mutiba mane wasalala akuuvwuntamika.+
14 Ndiyoobalekelezya basyeede balukono lwangu+ akubaaba mumaanza aabasinkondonyina, eelyo bayooba zisaalo kuli basinkondonyina boonse,+
15 nkaambo bakacita zibi mumeso aangu alimwi bakazumanana kundinyemya kuzwa buzuba bamausyi nobakazwa mu Egepita kusikila sunu.’”+
16 Kunze lyaboobo, Manase wakatila bulowa bunji kapati bwabantu batakwe mulandu kusikila mane wazuzya Jerusalemu kuzwa kumagolelo aamwi kusikila kumagolelo aamwi,+ kuyungizya azibi zyakwe nzyaakapa ba Juda kuti bacite kwiinda mukucita zibi mumeso aa Jehova.
17 Makani oonse aakaindi aamba zya Manase azintu zyoonse nzyaakacita alimwi azibi zyakwe, alilembedwe mubbuku lyamakani aakaindi aamba zyamazuba aabami ba Juda.
18 Mpoonya Manase wakoona abamausyi eelyo wakazikkwa mumuunda waŋanda yakwe, nkokuti mumuunda wa Uza;+ eelyo Amoni mwanaakwe wakaba mwami mubusena bwakwe.
19 Amoni+ wakali amyaka iili 22 naakaba mwami, alimwi wakalela kwamyaka yobilo mu Jerusalemu.+ Banyina bakali ba Mesulemeti, imwana wa Haruzi waku Jotiba.
20 Wakazumanana kucita zibi mumeso aa Jehova mbubonya mbuli Manase usyi mbwaakacita.+
21 Wakali kweenda munzila zyausyi zyoonse alimwi wakazumanana kukomba mituni iisesemya eeyo usyi njaakali kukotamina akukomba.+
22 Aboobo wakasiya Jehova Leza wabamausyi, alimwi tanaakeenda munzila ya Jehova.+
23 Mpoonya babelesi ba Amoni bakapangana, eelyo bakamujaya muŋanda yakwe.
24 Pele bantu bamucisi eeco bakabajaya boonse aabo ibakapangana kujatikizya Mwami Amoni, kumane bakabikka Josiya mwanaakwe kuba mwami mubusena bwakwe.+
25 Makani oonse aakaindi aamba zya Amoni azintu nzyaakacita alilembedwe mubbuku lyamakani aakaindi aamba zyamazuba aabami ba Juda.
26 Aboobo bakamuzikka mucuumbwe cakwe mumuunda wa Uza,+ eelyo Josiya+ mwanaakwe wakaba mwami mubusena bwakwe.
Bupanduluzi buyungizyidwe
^ Amubone Bupanduluzi Bwamabala.
^ Mu Chihebrayo, “Wakainzya.”
^ Amubone Bupanduluzi Bwamabala.
^ Mu Chihebrayo kuboneka kuti bbala eeli liliswaangene abbala lyaamba “bufwumba” alimwi lilabelesyegwa kwaamba cintu cisesemya.
^ Naa “antambo yakupimya bwiime bwacintu.”
