2 Bami 22:1-20
22 Josiya+ wakali amyaka iili lusele naakaba mwami, alimwi wakalela kwamyaka iili 31 mu Jerusalemu.+ Banyina bakali ba Jedida, mwana wa Adaya waku Bozikati.+
2 Wakacita ziluleme mumeso aa Jehova akweenda munzila zyoonse zya Davida sikale wakwe,+ alimwi tanaakaleya kululyo naa kulumwensyi.
3 Mumwaka wa 18 wabulelo bwakwe, Mwami Josiya wakatuma Safani mwana wa Azaliya imwana wa Mesulamu imulembi kuŋanda ya Jehova+ akumwaambila kuti:
4 “Koya kuli Hilikiya+ mupaizi mupati ukamwaambile kuti abale mali oonse aaletwa muŋanda ya Jehova+ aayo balindizi bamilyango ngobatambula kuzwa kubantu.+
5 Beelede kwaapa kulibaabo basalidwe kubeleka mulimo muŋanda ya Jehova kutegwa balo baape kubabelesi bamuŋanda ya Jehova ibeelede kubambulula zinyonyookede* kuŋanda,+
6 nkokuti basyaazibwene mukupanga zintu, bayaki abasikuyaka amabwe; balo beelede kwaabelesya kuula mapulanga amabwe aacezudwe kuti bayakulule ŋanda.+
7 Pele tamweelede kubabuzya aabo bapegwa mali kuti bapandulule mbubaabelesya, nkaambo balasyomeka.”+
8 Lino mukuya kwaciindi Hilikiya mupaizi mupati wakati kuli Safani mulembi:+ “Ndalijana bbuku lya Mulawo+ muŋanda ya Jehova.” Aboobo Hilikiya wakapa Safani bbuku eelyo, kumane walo wakatalika kulibala.+
9 Mpoonya Safani mulembi wakaunka kumwami akumwaambila kuti: “Babelesi bako baakuna mali oonse aakajanwa muŋanda, alimwi baapa kulibaabo basalidwe kubeleka mulimo muŋanda ya Jehova.”+
10 Alimwi Safani mulembi wakaambila mwami kuti: “Kuli bbuku+ limwi ndyaandipa Hilikiya mupaizi.” Kumane wakatalika kulibala kubusyu bwamwami.
11 Lino mwami mbwaakaamvwida buyo majwi aali mubbuku lya Mulawo, mpoonya aawo wakazapula zisani zyakwe.+
12 Kumane mwami wakalailila Hilikiya mupaizi, Ahikamu+ mwana wa Safani, Akiboro mwana wa Mikaya, Safani mulembi alimwi a Asaya mubelesi wamwami kuti:
13 “Kamuya mukatubuzyile makani kuli Jehova, mebo abantu aaba alimwi aba Juda boonse kujatikizya majwi aali mubbuku eeli lyajanwa; nkaambo bukali bwa Jehova ibwatubukila bulayaka kapati mbuli mulilo+ akaambo kakuti bamatata tiibakaswiilila majwi aali mubbuku eeli kwiinda mukutobela zyoonse zilembedwe kujatikizya ndiswe.”
14 Aboobo mupaizi Hilikiya, Ahikamu, Akiboro, Safani alimwi a Asaya bakaunka kuli Hulida musinsimi mukaintu.+ Wakali mukaintu wa Salumu mwana wa Tikiva imwana wa Harihasi iwakali kulanganya ciyobwedo cazisani alimwi wakali kukkala mubusena bupya bwamunzi wa Jerusalemu; eelyo bakaambaula anguwe nkukonya ooko.+
15 Mukaintu ooyo wakati kulimbabo: “Mboobu mbwaamba Jehova Leza wa Israyeli, ‘Mwaalumi ooyo iwamutuma kulindime mukamwaambile kuti:
16 “Mboobu mbwaamba Jehova, ‘Ndilaleta mapenzi abusena oobu akubantu aabo bakkala mumo, majwi oonse aali mubbuku aayo mwami wa Juda ngaakabala.+
17 Akaambo kakuti bandisiya akutalika kuuntumuna busi bwazipaizyo kuli baleza bambi+ akundinyemya amilimo yoonse yamaanza aabo,+ bukali bwangu bulavwutukila busena oobu mbuli mulilo alimwi tabukonzyi kuzimwa pe.’”+
18 Pele mwami wa Juda iwamutuma kuzoobuzya makani kuli Jehova, mumwaambile kuti, “Mboobu mbwaamba Jehova Leza wa Israyeli: ‘Kujatikizya majwi ngoomvwa,
19 akaambo kakuti moyo wako wakabomba alimwi wakalicesya+ kuli Jehova nookamvwa majwi ngondakaamba kujatikizya busena oobu abantu bakkala mumo—kuti bulaba cintu cigambya alimwi cisinganizyidwe—alimwi wakazapula zisani zyako+ akutalika kulila kubusyu bwangu, andime ndilakuswiilila, mbwaamba Jehova.
20 Nkakaambo kaako ndiyookubunganya kuli bamauso,* alimwi uyoozikkwa mucuumbwe cako muluumuno. Meso aako taakaboni mapenzi oonse ngondiyooletela busena oobu.’”’” Eelyo mwami bakazoomwaambila majwi aaya.
