2 Bami 24:1-20
24 Lino mumazuba aakwe, Mwami Nebukadinezara+ wa Babuloni wakaboola kuzoolwana Jerusalemu, aboobo Jehoyakimu wakaba mubelesi wakwe myaka yotatwe. Nokuba boobo wakamubukila akumuzangila.
2 Mpoonya Jehova wakatalika kumutumina basikusaala bana Kasidi,+ bana Siriya, bana Moabu abana Amoni. Wakazumanana kubatuma kuti bakalwane Juda akuunyonyoona kweelana ajwi lya Jehova+ ndyaakaamba kwiinda mubabelesi bakwe basinsimi.
3 Masimpe eezyi zyakabacitikila bana Juda kweelana ambwaakaamba Jehova kutegwa bazwe kubusyu bwakwe+ akaambo kazibi zyoonse nzyaakacita Manase,+
4 alimwi akaambo kabulowa bwabantu batakwe mulandu mbwaakatila,+ nkaambo wakazuzya Jerusalemu abulowa bwabantu batakwe mulandu alimwi Jehova tanaakalibambilide kumulekelela.+
5 Makani oonse aakaindi aamba zya Jehoyakimu azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Juda.+
6 Mpoonya Jehoyakimu wakoona abamausyi;+ eelyo Jehoyakini mwanaakwe wakaba mwami mubusena bwakwe.
7 Kunyina limbi mwami wa Egepita naakazwa mucisi cakwe, nkaambo mwami wa Babuloni wakazibweza zyoonse zintu izyakali zyamwami waku Egepita+ kuzwa ku Mulonga* wa Egepita+ kusikila ku Mulonga wa Firate.+
8 Jehoyakini+ wakali amyaka iili 18 naakaba mwami, alimwi wakalela myezi yotatwe mu Jerusalemu.+ Banyina bakali ba Nehusita, mwana wa Elinatani waku Jerusalemu.
9 Wakazumanana kucita zintu zibi mumeso aa Jehova mbubonya mbuli zintu zyoonse usyi nzyaakacita.
10 Aciindi eeco babelesi ba Mwami Nebukadinezara wa Babuloni bakaboola kuzoolwana Jerusalemu, aboobo munzi wakasinkililwa.+
11 Mwami Nebukadinezara wa Babuloni wakaboola kulwana munzi ciindi babelesi bakwe nobakausinkilide.
12 Mwami Jehoyakini wa Juda wakalyaaba kumwami wa Babuloni+ antoomwe abanyina, babelesi bakwe, basilutwe bakwe alimwi ankumekume zyakwe zyamunkuta;+ eelyo mwami wa Babuloni wakamutola mubuzike mumwaka walusele wabulelo bwakwe.+
13 Mpoonya wakagwisya zintu zyoonse ziyandisi zyamuŋanda ya Jehova alimwi azintu zyoonse ziyandisi zyamuŋanda yamwami.+ Wakazipwayaula zibelesyo zyoonse zyangolida mutempele lya Jehova+ eezyo Solomoni mwami wa Israyeli nzyaakapangide mbubonya mbwaakaambide Jehova.
14 Wakabatola bantu bamu Jerusalemu boonse kabali baange, basilutwe boonse,+ basikalumamba boonse basinguzu, basyaabupampu boonse mukupanga zintu abafwuzi*+–wakatola baange bali 10,000. Wakasiya buyo bacete mucisi.+
15 Aboobo wakamutola Jehoyakini+ kali mwaange ku Babuloni;+ kubikkilizya abanyina mwami, bamakaintu bamwami, nkumekume zyakwe zyamunkuta alimwi abantu balemekwa bamucisi wakabatola kabali baange ku Babuloni kuzwa ku Jerusalemu.
16 Alimwi mwami wa Babuloni wakabatola kabali baange ku Babuloni basikalumamba boonse ibali 7,000 kubikkilizya abasyaazibwene mukupanga zintu abafwuzi* ibali 1,000, boonse aaba bakali baalumi basinguzu ibakayiisyidwe kulwana munkondo.
17 Mwami wa Babuloni wakabikka Mataniya imwanookwabo abausyi Jehoyakini+ kuba mwami mubusena bwakwe akumucinca zina lyakwe kuba Zedekiya.+
18 Zedekiya wakali amyaka iili 21 naakaba mwami, alimwi wakalela kwamyaka iili 11 mu Jerusalemu. Banyina bakali ba Hamutala+ imwana musimbi wa Jeremiya waku Libina.
19 Wakazumanana kucita zintu zibi mumeso aa Jehova, kweelana azintu zyoonse nzyaakacita Jehoyakimu.+
20 Zintu eezyi zyakacitika mu Jerusalemu amu Juda akaambo kabukali bwa Jehova, zyakacitika kusikila limwi wakabatanda kumbele lyakwe.+ Alimwi Zedekiya wakazangila mwami wa Babuloni.+
Bupanduluzi buyungizyidwe
^ Amubone Bupanduluzi Bwamabala.
^ Naa ambweni, “basikuyaka malambo angazi zyalukwabilizyo.”
^ Naa ambweni, “abasikuyaka malambo angazi zyalukwabilizyo.”
