2 Bami 25:1-30
25 Mumwaka wafwuka wabulelo bwa Zedekiya, mumwezi wa 10, mubuzuba bwa 10 bwamwezi ooyu, Mwami Nebukadinezara+ wa Babuloni wakaboola antoomwe ampi yabasikalumamba bakwe boonse kuzoolwana Jerusalemu.+ Wakayaka nkambi mumbali aamunzi alimwi abwaanda buzinguluka bwakuusinkilila munzi,+
2 aboobo munzi wakasinkililwa kusikila mumwaka wa 11 wabulelo bwa Mwami Zedekiya.
3 Mumwezi wane, mubuzuba bwafwuka bwamwezi ooyu, nzala yakaindila kapati+ mumunzi cakuti bantu bakanyina cakulya mucisi.+
4 Bwaanda bwamunzi bwakapwaigwa,+ eelyo basikalumamba boonse bakatija kuzwa mumunzi masiku, bakainda kumulyango uuli akati kamalambo obilo aali kufwaafwi amuunda wamwami, ciindi ba Kasidi nobakazingulukide munzi woonse; eelyo mwami wakainda munzila iitozya ku Araba.+
5 Pele impi yabasikalumamba yaba Kasidi yakatandaanya mwami, eelyo bakamweenzya Zedekiya muzibanda zyamucimpayuma zya Jeriko, mpoonya basikalumamba bakwe boonse bakamumwaika.
6 Mpoonya bakamujata mwami+ akumutola kumwami wa Babuloni ku Ribila, eelyo bakamubeteka.
7 Bana ba Zedekiya bakabajaya walo kalangilila; mpoonya Nebukadinezara wakoofwaazya meso aa Zedekiya akumwaanga nketani zyamukuba akumutola ku Babuloni.+
8 Lino mumwezi wasanu, mubuzuba bwaciloba bwamwezi ooyu, nkokuti mumwaka wa 19 wabulelo bwa Mwami Nebukadinezara imwami wa Babuloni, Nebuzaradana+ mupati wabasikugatela mwami, imubelesi wamwami wa Babuloni, wakaboola ku Jerusalemu.+
9 Mpoonya wakaumpa ŋanda ya Jehova,+ ŋanda yamwami,+ alimwi amaanda oonse aamu Jerusalemu;+ alimwi wakaumpa amaanda oonse aabantu balemenede.+
10 Aalo malambo oonse aakazingulukide munzi wa Jerusalemu akakolomonwa ampi yoonse yabasikalumamba yaba Kasidi eeyo iyakali antoomwe amupati wabasikugatela mwami.+
11 Nebuzaradana mupati wabasikugatela mwami wakabatola kabali baange bantu boonse aabo ibakasyeede mumunzi, aabo bakatijilide kumwami wa Babuloni, alimwi abantu bambi boonse.+
12 Pele mupati wabasikugatela mwami wakabasiya bantu bamwi ibakali bacete babacete bamucisi kuti kabali basikulima myuunda yamisaansa ababelesi babeleka milimo yacibbalo.+
13 Kumane ba Kasidi bakapwayaula misemu yamukuba+ yakuŋanda ya Jehova, tuŋola+ alimwi a Zyiba lyamukuba+ eezyo izyakali muŋanda ya Jehova, mpoonya bakatola mukuba wanzizyo ku Babuloni.+
14 Alimwi bakatola zibbakete, mafosyolo, tugele twakuzimya malambe, nkapu alimwi azibelesyo zyoonse zyamukuba izyakali kubelesyegwa mumulimo wamutempele.
15 Mupati wabasikugatela mwami wakabweza zyakunyamwida mulilo alimwi amitiba izyakali zyangolida iini-ini+ azyeezyo izyakali zyansiliva iini-ini.+
16 Lino ikujatikizya misemu yobilo, Zyiba alimwi atuŋola eezyo Solomoni nzyaakapangilide ŋanda ya Jehova, mukuba wazintu eezyi zyoonse tiiwakali kukonzya kupimwa pe.+
17 Musemu umwi aumwi wakali kulampa tukokola* tuli 18 kuya mujulu,+ mpumpu yamusemu yakali yamukuba; alimwi mpumpu yamusemu yakali kulampa tukokola totatwe kuya mujulu, alimwi tubulo twakabambidwe mbuli lunsabwe alimwi amapomegranite izyakazingulukide mpumpu koonse-koonse zyoonse zyakali zyamukuba.+ Musemu wabili awalo wakali mbubonya mbuli nguwo atala aatubulo twakabambidwe mbuli lunsabwe.
18 Mupati wabasikugatela mwami alimwi wakabweza Seraya+ mupati wabapaizi, Zefaniya+ mupaizi wabili antoomwe abalindizi bamilyango botatwe.+
19 Alimwi mumunzi wakabweza mupati wababelesi bamwami iwakali kulanganya basikalumamba, balongwe bosanwe ibakali kumvwana kapati amwami ibakajanwa mumunzi, amulembi wasilutwe wampi yabasikalumamba, ooyo iwakali kubunganya bantu bamucisi, alimwi abaalumi bali 60 akati kabantu-bantu buyo bamucisi aabo ibakajanika mumunzi.
20 Nebuzaradana+ mupati wabasikugatela mwami wakababweza akubatola kumwami wa Babuloni ku Ribila.+
21 Mwami wa Babuloni wakabauma akubajaya bantu aaba ku Ribila mucisi ca Hamati.+ Oobu mbombubo ba Juda mbobakatolwa mubuzike kuzwa mucisi cabo.+
22 Mwami Nebukadinezara wa Babuloni wakasala Gedaliya+ mwana wa Ahikamu+ mwana wa Safani+ kuti ayendelezye bantu aabo mbaakasiya mucisi ca Juda.+
23 Lino basilutwe boonse bampi zyabasikalumamba abaalumi babo nobakamvwa kuti mwami wa Babuloni wasala Gedaliya kuba mweendelezi, mpoonya aawo bakaunka kuli Gedaliya ku Mizipa. Kwakali Isimayeli mwana wa Netaniya, Johanani mwana wa Kareya, Seraya mwana wa Tanumeti muna Netofati alimwi a Jazaniya mwana wamuna Maakati, balo antoomwe abaalumi babo.+
24 Gedaliya wakakonka kulimbabo akubaalumi babo akubaambila kuti: “Mutayoowi pe kuba babelesi baba Kasidi. Amukkale mucisi akubelekela mwami wa Babuloni, eelyo zintu zilamweendela kabotu.”+
25 Lino mumwezi waciloba, Isimayeli+ mwana wa Netaniya imwana wa Elisama, umwi walunyungu lwabami, wakaboola abaalumi bambi bali kkumi, eelyo bakajaya Gedaliya antoomwe aba Juda aba Kasidi mbaakali limwi ku Mizipa.+
26 Mpoonya bantu boonse, kutalikila kubana kusikila kubapati, kubikkilizya abasilutwe bampi yabasikalumamba bakanyamuka akuunka ku Egepita,+ nkaambo bakali kuyoowa ba Kasidi.+
27 Lino mumwaka wa 37 Mwami Jehoyakini+ wa Juda kali mubuzike, mumwezi wa 12, mubuzuba bwa 27, Mwami Evili-merodaki wa Babuloni, mumwaka naakaba mwami, wakaangununa* Mwami Jehoyakini wa Juda muntolongo.+
28 Wakaambaula calubomba anguwe akusumpula cuuno cakwe cabwami atala aazyuuno zyabwami zyabami bambi mbaakali limwi mu Babuloni.
29 Aboobo Jehoyakini wakasamununa zisani zyakwe zyamuntolongo, alimwi wakali kulya cakulya lyoonse kumbele lyamwami mazuba oonse aabuumi bwakwe.
30 Wakali kupegwa caabilo cazyakulya zyakwe kuzwa kumwami, buzuba abuzuba, mazuba oonse aabuumi bwakwe.
Bupanduluzi buyungizyidwe
^ Kakokola komwe kakaleelene amasentimita aali 44.5. Amubone Makani Aayungizyidwe B14.
^ Mu Chihebrayo, “wakasumpula mutwe wa.”
