2 Bami 3:1-27
3 Lino Jehoramu+ mwana wa Ahabu wakaba mwami wa Israyeli mu Samariya mumwaka wa 18 wabulelo bwa Mwami Jehosafati wa Juda, alimwi wakalela myaka iili 12.
2 Jehoramu wakazumanana kucita zibi mumeso aa Jehova pele tanaakali mbuli bausyi naa banyina, nkaambo wakagwisya musemu wamabwe wakukomba wa Baala bausyi ngobakapangide.+
3 Nokuba boobo, wakakakatila kuzibi zya Jeroboamu mwana wa Nebati, eezyo nzyaakapa kuti bana Israyeli bacite.+ Tanaakazileka pe.
4 Lino Mesa mwami wa Moabu wakali kuvwuba mbelele, alimwi wakali kutela bana bambelele bali 100,000 abagutu batageledwe bali 100,000 kumwami wa Israyeli.
5 Pele mbwaakafwida buyo Ahabu,+ mwami wa Moabu wakazangila mwami wa Israyeli.+
6 Aboobo kuciindi eeco Mwami Jehoramu wakazwa ku Samariya akubunganya basikalumamba boonse bana Israyeli.
7 Alimwi wakatuma mulumbe ku Mwami Jehosafati wa Juda wakuti: “Mwami wa Moabu wandizangila. Sena ulaunka andime kuyoolwana Moabu?” Mpoonya wakati: “Inzya ndilaunka.+ Mebo anduwe tuli bamwi. Bantu bangu abantu bako mbamwi. Mabbiza aangu ali mbuli mabbiza aako.”+
8 Mpoonya wakabuzya kuti: “Ino tulatozya nzila iili?” Aboobo Jehoramu wakaingula kuti: “Tulatozya nzila yakunkanda ya Edomu.”
9 Mpoonya mwami wa Israyeli wakaunka antoomwe amwami wa Juda alimwi amwami wa Edomu.+ Nobakeenda musinzo mulamfwu wamazuba aali ciloba, bakabula maanzi aabasikalumamba babo alimwi aabanyama babo bavwubwa mbobakajisi.
10 Mpoonya mwami wa Israyeli wakati: “Eelo kaka cabija! Jehova watwiita swebo tobami totatwe kuti atwaabe mumaanza aabana Moabu!”
11 Mpoonya Jehosafati wakati: “Sena okuno kunyina musinsimi wa Jehova ngotukonzya kubuzya makani kuli Jehova?”+ Mpoonya umwi wababelesi bamwami wa Israyeli wakati: “Nkwali Elisha+ mwana wa Safati, iwakali kutilizya Elija+ maanzi aakusamba kumaanza.”*
12 Kumane Jehosafati wakati: “Ijwi lya Jehova lili alinguwe.” Aboobo mwami wa Israyeli, Jehosafati amwami wa Edomu bakaunka kulinguwe.
13 Elisha wakaambila mwami wa Israyeli kuti: “Ino ndijisi makani nzi anduwe?+ Koya kubasinsimi babauso akubasinsimi babanyoko.”+ Pele mwami wa Israyeli wakati kulinguwe: “Utaambi boobo, nkaambo ngu Jehova waleta bami aaba botatwe kuti abaabe mumaanza aabana Moabu.”
14 Mpoonya Elisha wakati: “Masimpe mbubonya mbwali muumi Jehova wamakamu ooyo ngondibelekela,* naatali Mwami Jehosafati+ wa Juda ooyo ngondilemeka, nindatakulanga nokuba kukubona.+
15 Lino amundiletele sikulizya kalumbu.”*+ Eelyo sikulizya kalumbu mbwaakakalizyila buyo, nguzu zya Jehova zyakasikila Elisha.+
16 Wakati, “Mboobu mbwaamba Jehova: ‘Amusye migelo mukkuti* eeli,
17 nkaambo mboobu mbwaamba Jehova: “Tamukaboni muwo alimwi tamukaboni mvwula mpati; nokuba boobo kkuti* eeli liyoozula maanzi,+ nywebo abanyama banu bavwubwa abanyama bambi muyoonywa mulindilyo.”’
18 Pele eeci cintu ncuuba-uba mumeso aa Jehova+ nkaambo uyoobaaba abana Moabu mumaanza aanu.+
19 Mweelede kunyonyoona minzi iikwabilidwe aminzi+ yoonse mibotu, mweelede kuzigonka zisamu zyoonse zibotu akusinka tusensa twamaanzi toonse, alimwi mweelede kunyonyoona nyika yoonse mbotu kwiinda mukwiizuzya mabwe.”+
20 Lino mafwumofwumo aciindi cakutuula cituuzyo camaila+ camafwumofwumo, kwakaboola maanzi cakutayeeyelwa kuzwa kulubazu lwa Edomu, eelyo nyika eeyo yakazula maanzi.
21 Lino bana Moabu boonse bakamvwa kuti kuli bami baboola kuzoobalwana, aboobo bakabunganya baalumi boonse ibakali amyaka yakukonzya kuya kunkondo,* eelyo bakaima kumunyinza.
22 Nobakabuka mafwumofwumo, izuba lyakabala atala aamaanzi akubana Moabu ibakali kutala, eelyo maanzi akali kusalala mbuli bulowa.
23 Bakatalika kwaamba kuti: “Oobu mbulowa! Masimpe bami aaba bajayana amapanga. Aboobo nobana Moabu, atweende lino tukabasaale.”+
24 Nobakasika munkambi yabana Israyeli, bana Israyeli bakatalika kubajaya bana Moabu, eelyo bakatija kuzwa kulimbabo.+ Kumane bakanjila mu Moabu kumwi kabayaabujaya bana Moabu.
25 Eelyo bakainyonyoona minzi, mpoonya mwaalumi umwi aumwi wakawaala bbwe munyika mbotu yoonse, eelyo bakaizuzya mabwe; tusensa twamaanzi+ toonse bakatusinka alimwi bakazigonka zisamu zyoonse zibotu.+ Kumane kwakasyaala buyo malambo aamabwe aa Kiri-hareseti,+ mpoonya basinkwisyo bakauzinguluka munzi akuunyonyoona.
26 Mwami wa Moabu naakabona kuti wazundwa kunkondo, wakabweza baalumi bakwe basimapanga bali 700 kuti baunke kumwami wa Edomu;+ pele bakaalilwa kucita oobo.
27 Aboobo wakabweza mwanaakwe musankwa mutaanzi iwakali kuyooba mwami mubusena bwakwe akumutuula kali cipaizyo cuumpwa+ atala aabwaanda. Lino bana Moabu bakanyema kapati akaambo kabana Israyeli, aboobo bana Israyeli bakamuleka akupiluka kwabo.
Bupanduluzi buyungizyidwe
^ Naa “ooyo iwakali mubelesi wa Elija.”
^ Mu Chihebrayo, “ooyo ngondiimina kumbele.”
^ Naa “mwiimbi.”
^ Naa “mukalonga.”
^ Naa “kalonga.”
^ Naa “boonse ibakali kulyaanga lutambo mucibuno.”
