2 Bami 4:1-44
4 Lino mukaintu umwi iwakakwetwe kuli umwi wabana babasinsimi+ wakakwiilila Elisha kuti: “Mubelesi wako, mulumaangu wakafwa, alimwi yebo ulizyi kabotu kuti mubelesi wako wakali kumuyoowa Jehova+ lyoonse. Lino kwasika sikukweletesya kuzoondibwezela bana bangu bobilo kuti babe bazike bakwe.”
2 Mpoonya Elisha wakamubuzya kuti: “Ino uyanda kuti ndikucitile nzi? Kondaambila, ino ujisi nzi muŋanda yako?” Wakaingula kuti: “Ndemubelesi wako taakwe ancondijisi nociba comwe, pele buyo nongo* yamafwuta.”+
3 Kumane Elisha wakati: “Koya ukalombe nongo kuli basimukobonyoko boonse, zitakwe ncozijisi. Ulombe zinji.
4 Wamana uunke kuŋanda yako, yebo abana bako mukalijalile muŋanda. Mpoonya ukatile mafwuta munongo zyoonse, eezyo izyazula kozibikka ambali.”
5 Aboobo mukaintu ooyo wakaunka.
Lino naakalijalila muŋanda abana bakwe, bana bakwe bakali kumutambikizya nongo eelyo walo ngowakali kutila mafwuta.+
6 Lino nozyakazula nongo wakaambila umwi wabana bakwe kuti: “Koleta nongo aimbi.”+ Pele wakati kulinguwe: “Takucikwe nongo zyasyaala.” Mpoonya aawo mafwuta akaleka kuzwa.+
7 Naakamana wakaunka kuyakwaambila muntu wa Leza mwini-mwini, eelyo walo wakati: “Koya ukaasambale mafwuta akubbadela zikwelete zyako, eelyo aatiikasyaale kobelesya abana bako.”
8 Lino buzuba bumwi Elisha wakaunka ku Sunemu,+ ooko ikwakali mukaintu uulaampuwo walo iwakamukombelezya kuti alye cakulya.+ Aboobo lyoonse naakali kwiinda munzila eeyo wakali kuleya ooko kuyoolya cakulya.
9 Aboobo mukaintu ooyo wakaambila mulumaakwe kuti: “Lino ndazyiba kuti mwaalumi ooyu wiinda-inda aano musinsimi wa Leza.
10 Atuyake kaanda kamujulu atala aaciluli,+ mpoonya tumubikkile bulo, tebulu, cuuno acibikkilo calambe. Eelyo kufwumbwa atuswaya, kakkala mumo.”+
11 Bumwi buzuba naakaswaya mbuli lyoonse wakanjila mukaanda kamujulu akoona.
12 Mpoonya wakaambila Gehazi+ mubelesi wakwe kuti: “Komwiita mukaintu ooyu muna Sunemu.”+ Wakamwiita mukaintu ooyo, eelyo wakaima kumbele lya Elisha.
13 Aboobo Elisha wakaambila Gehazi kuti: “Komwaambila mukaintu ooyu kuti, ‘Watupengela kapati.+ Ino uyanda kuti tukucitile nzi?+ Sena kuli ncoyanda kuti tukwaambilile kumwami+ naa kuli silutwe wampi yabasikalumamba?’” Pele mukaintu ooyo wakaingula kuti: “Ndikkala akati kabantu bangu.”
14 Aboobo Elisha wakati: “Ino tulamucitila nzi?” Lino Gehazi wakati: “Mukaintu ooyu tajisi mwana+ musankwa alimwi mulumaakwe ulicembeede.”
15 Mpoonya aawo wakati: “Komwiita.” Aboobo wakamwiita, eelyo mukaintu ooyu wakaima amulyango.
16 Mpoonya Elisha wakati: “Aciindi eecino mwaka uboola unoojisi mwana musankwa.”+ Pele mukaintu ooyu wakati: “Peepe simalelaangu, omuntu wa Leza mwini-mwini! Utandeeni pe ndemubelesi wako.”
17 Nokuba boobo, mukaintu ooyo wakamita akuzyala mwana musankwa aciindi nciconya eeco mwaka wakatobela mbubonya Elisha mbwaakamwaambilide.
18 Mwana ooyo wakakomena, eelyo buzuba bumwi wakaunka kumuunda ikwakali bausyi abasikutebula.
19 Mpoonya wakazumanana kwaambila bausyi kuti: “Ndafwa mutwe, ndafwa mutwe!” Kumane bausyi bakaambila mubelesi kuti: “Komutola kuli banyina.”
20 Aboobo wakamunyamuna akumutola kuli banyina, eelyo wakakkala amubili wabanyina kusikila acilungulungu, mpoonya wakafwa.+
21 Kumane wakatanta akuyoomulazika abulo bwamuntu wa Leza mwini-mwini,+ kumane wakajala mulyango akuunka.
22 Lino wakaita mulumaakwe akumwaambila kuti: “Akaka konditumina umwi wababelesi ambongolo yomwe, ndizuzile kumuntu wa Leza mwini-mwini kwamana ndilapiluka.”
23 Pele mulumaakwe wakati: “Ino nkaambo nzi ncoyanda kuunka kulinguwe sunu? Mwezi taunakkala+ alimwi taili sabata.” Nokuba boobo mukaintu wakati: “Utapengi pe, zyoonse zili buyo kabotu.”
24 Aboobo wakatanta ambongolo akwaambila mubelesi wakwe kuti: “Fwambaana koya. Utandilindili pe, ccita ndikwaambile.”
25 Aboobo wakaunka kumuntu wa Leza mwini-mwini ku Cilundu ca Karimeli. Lino muntu wa Leza mwini-mwini mbwaakamubonena buyo kaboola, wakaambila Gehazi mubelesi wakwe kuti: “Bona! Nguulya mukaintu muna Sunemu.
26 Kozuza ukamucinge akumubuzya kuti, ‘Sena uli kabotu? Sena mulumaako uli kabotu? Sena mwanaako uli kabotu?’” Eelyo mukaintu wakati: “Toonse tuli buyo kabotu.”
27 Naakasika kumuntu wa Leza mwini-mwini acilundu, wakamujata kumaulu. Kumane Gehazi wakaboola akumutonka,+ pele muntu wa Leza mwini-mwini wakati: “Komuleka, nkaambo ulipengede mumoyo,* alimwi Jehova wandisisa makani aaya, taakwe naandaambila pe.”
28 Kumane mukaintu wakati: “Sena ndakakulomba mwana musankwa simalelaangu? Sena tiindakaamba kuti, ‘Utandipi bulangizi bwakubeja’?”+
29 Mpoonya aawo Elisha wakaambila Gehazi kuti: “Kolibambila+ akubweza musako wangu akuunka. Ikuti naa uswaanganye muntu munzila, utamujuzyi pe; alimwi ikuti naa umwi akujuzye, utainguli pe. Koya ukabikke musako wangu kubusyu bwamulombe.”
30 Eelyo banyina mwana bakati: “Masimpe mbubonya Jehova mbwali muumi alimwi anduwe mboli muumi, tandikookuleka pe.”+ Aboobo Elisha wakanyamuka akuunka anguwe.
31 Lino Gehazi wakasolola kumbele lyabo akuyoobikka musako kubusyu bwamwana, pele mwana tanaakasinsimuka.+ Wakapiluka kuyooswaangana a Elisha akumwaambila kuti: “Mwana tanaabuka pe.”
32 Lino Elisha naakanjila muŋanda, mwana wakalilede abulo bwa Elisha kafwide.+
33 Wakanjila muŋanda akulijalila amwana, eelyo wakatalika kupaila kuli Jehova.+
34 Mpoonya wakalala amubili wamwana, wabikka mulomo wakwe atala aamulomo wamwana, meso aakwe atala aameso aamwana, maanza aakwe atala aamaanza aamwana, alimwi wakazumanana kulala alinguwe eelyo mubili wamwana wakatalika kukasaala.+
35 Mpoonya wakeendeenda muŋanda, ooku akooku, kumane wakalala alinguwe alimwi. Eelyo mwana wakeesyemuka ziindi zili ciloba, mpoonya wakajalula meso aakwe.+
36 Lino Elisha wakaita Gehazi akumwaambila kuti: “Komwiita mukaintu ooyu muna Sunemu.” Wakamwiita eelyo wakaboola kulinguwe. Mpoonya wakamwaambila kuti: “Komubweza mwanaako.”+
37 Kumane wakanjila muŋanda, wawa kumaulu aakwe akumukotamina, naakamana wakamubweza mwanaakwe akuzwa.
38 Lino Elisha naakapiluka ku Giligala, kwakali nzala munyika.+ Bana babasinsimi+ bakalikkede kumbele lyakwe, eelyo muciindi wakaambila mubelesi wakwe kuti:+ “Kosibika mupika mupati ubajikile cakulya bana babasinsimi.”
39 Kumane umwi wakaunka musyokwe kuyoocela zisyumani, mpoonya wakajana misaansa yamusyokwe, waicela akuzuzya cisani cakwe. Mpoonya wakapiluka, waitendaula akwiibikka mumupika nkaambo tiibakazyi mbwiibede.
40 Mpoonya bakababikkila kuti balye, pele mbobakacilabila buyo cakulya eeco bakakwiila akwaamba kuti: “Omuntu wa Leza mwini-mwini, cilakola cili mumupika oomu.” Eelyo cakabaalila kucilya.
41 Aboobo Elisha wakati: “Amundiletele fulaulu.” Eelyo naakauwaala mumupika, wakati: “Amubape bantu balye.” Cakulya icakali mumupika tiicakacili kukola pe.+
42 Kwakaboola muntu umwi kuzwa ku Baala-salisa,+ eelyo wakaletela muntu wa Leza mwini-mwini cinkwa+ camicelo mitaanzi, zinkwa zyabbaale zili 20 amaila matete mucibbeeke cakwe.+ Kumane Elisha wakati: “Kobapa bantu balye.”
43 Nokuba boobo, sikwaaba cakulya wakati: “Ino ndilabaabanya buti bantu bali 100 ?”+ Eelyo Elisha wakati: “Kobapa bantu balye, nkaambo mboobu mbwaamba Jehova, ‘Bantu balalya akuzisiya.’”+
44 Mpoonya wakabaabila, eelyo bakalya alimwi mane bakazisiya+ kweelana ambwaakaamba Jehova.
