2 Bami 6:1-33
6 Bana babasinsimi+ bakaambila Elisha kuti: “Bona! Busena obuno motukkala anduwe bwaceya.
2 Kotuleka tuunke ku Jordano, umwi aumwi wesu akalete cisamu kutegwa tukayake busena bwakukkala.” Wakati: “Kamuya.”
3 Umwi wabo wakati: “Sena inga twaunka andiwe tobabelesi bako?” Eelyo Elisha wakati: “Atweende.”
4 Aboobo wakaunka ambabo, eelyo bakasika ku Jordano akutalika kugonka zisamu.
5 Lino umwi naakali kugonka cisamu, keembe kakwe kakakuka akuwida mumaanzi. Eelyo wakalila kati: “Maawe simalelaangu, keembe aaka nkakulomba buya!”
6 Muntu wa Leza mwini-mwini wakati: “Ino kawida aali?” Aboobo wakamutondezya. Mpoonya wakagonka kasamu akukawaala abusena aawo, eelyo keembe kakaibuka.
7 Lino wakati: “Kokabweza.” Aboobo wakatambikizya janza lyakwe akukabweza.
8 Lino mwami wa Siriya wakatalika kulwana bana Israyeli.+ Aboobo wakamvwana ababelesi bakwe kuti: “Abusena buli boobu aboobu tukayake nkambi.”
9 Mpoonya muntu wa Leza mwini-mwini+ wakatumya mulomo kumwami wa Israyeli kuti: “Utaindi kubusena oobu, nkaambo bana Siriya nkobaboola.”
10 Aboobo mwami wa Israyeli wakatuma mulomo kubusena ooko muntu wa Leza mwini-mwini nkwaakamucenjezyede. Elisha wakazumanana kumucenjezya mwami ziindi zinji* aboobo kunyina naakali kuunka ooko.+
11 Eeci cakamunyemya kapati mwami* wa Siriya, aboobo wakaita babelesi bakwe akubabuzya kuti: “Amundaambile! Ino nguni akati kesu uuli kulubazu lwamwami wa Israyeli?”
12 Mpoonya umwi wababelesi bakwe wakati: “Kunyina, omwami simalelaangu. Pele ngu Elisha musinsimi uuli mu Israyeli iwaambila mwami wa Israyeli makani ngoamba kuzyuli lyako.”+
13 Wakati: “Kamuya mukabone nkwabede kutegwa nditume bantu kuyoomujata.” Muciindi bakamwaambila kuti: “Uli ku Dotani.”+
14 Mpoonya aawo wakatuma mabbiza ankalaki zyankondo alimwi ampi mpati yabasikalumamba ooko; eelyo bakaboola masiku akuuzinguluka munzi.
15 Lino mubelesi wamuntu wa Leza mwini-mwini naakabuka mafwumofwumo akuya anze, wakabona mpi yabasikalumamba amabbiza ankalaki zyankondo kazizingulukide munzi. Mpoonya aawo mubelesi wa Elisha wakati kulinguwe: “Maawe simalelaangu! Ino tulacita buti?”
16 Pele wakati kulinguwe: “Utayoowi pe!+ Nkaambo aabo mbotuli limwi mbanji kwiinda baabo mbobali limwi.”+
17 Mpoonya Elisha wakatalika kupaila akwaamba kuti: “O Jehova, akaka kojalula meso aakwe kutegwa abone.”+ Mpoonya aawo Jehova wakajalula meso aamubelesi ooyo eelyo wakabona kuti cilundu cakazwide mabbiza ankalaki zyankondo zyamulilo+ koonse-koonse kuzinguluka Elisha.+
18 Lino bana Siriya nobakaboola kulinguwe, Elisha wakapaila kuli Jehova akwaamba kuti: “Akaka, koboofwaazya bantu aaba.”+ Aboobo wakaboofwaazya kweelana ambwaakalomba Elisha.
19 Mpoonya Elisha wakati kulimbabo: “Eeyi nzila taili njiyo pe, awalo munzi ooyu tauli nguwo. Amunditobele, ndimutole kumuntu ngomuyandaula.” Pele wakabatola ku Samariya.+
20 Lino nibakasika ku Samariya, Elisha wakati: “O Jehova, kojalula meso aabantu aaba kutegwa babone.” Aboobo Jehova wakajalula meso aabo, eelyo bakajana kuti bali akati ka Samariya.
21 Lino mwami wa Israyeli mbwaakababonena buyo wakaambila Elisha kuti: “Sena ndibajaye, sena ndibajaye taata?”
22 Pele wakati: “Utabajayi pe. Sena inga wajaya bantu mboozunda akutola mubuzike? Kobapa cakulya amaanzi kutegwa balye akunywa+ bamana bapiluke kuli simalelaabo.”
23 Aboobo wakababambila pobwe lipati, eelyo bakalya akunywa, kuzwa waawo wakabaleka kuti baunke kuli simalelaabo. Lino nkamu yabasikusaala yabana Siriya+ tiiyakaboola limbi pe munyika ya Israyeli.
24 Kuzwa waawo, Beni-hadadi mwami wa Siriya wakabunganya mpi* yakwe yabasikalumamba yoonse akuunka kuyoosinkilila munzi wa Samariya.+
25 Aboobo kwakaba nzala mpati+ mu Samariya, alimwi bakausinkilila munzi mane limwi mutwe wambongolo+ wakatalika kuulwa masyekeli aansiliva aali 80, eelyo cipaanzi cane cakagabba* kamankotyo aanziba cakatalika kuulwa masyekeli aansiliva osanwe.
26 Lino mwami wa Israyeli naakali kweenda atala aabwaanda, mukaintu umwi wakamulilila kati: “Kotugwasya, omwami simalelaangu!”
27 Eelyo mwami wakati: “Ikuti naa Jehova takugwasyi, ino mebo inga ndalujana kuli lugwasyo ndondikonzya kukupa? Sena nkuucuumino camaila naa kucisinino cawaini naa kucisinino camafwuta?”
28 Mwami wakabuzya mukaintu ooyo kuti: “Ino ncinzi cakupenzya?” Wakaingula kuti: “Mukaintu ooyu wakandaambila kuti, ‘Leta mwanaako tumulye sunu, eelyo wangu tuyoomulya juunza.’+
29 Aboobo mwanaangu twakamujika akumulya.+ Mpoonya buzuba bwakatobela ndakamwaambila kuti, ‘Koleta mwanaako ayebo tumulye.’ Pele wakamusisa.”
30 Mwami mbwaakamvwida buyo ncaakaamba mukaintu ooyo, wakazapula zisani zyakwe.+ Lino naakali kweenda atala aabwaanda, bantu bakamubona kasamide zisani zyamasaka kunsi aazisani zyakwe.*
31 Mpoonya wakati: “Leza andisubule kapati ikuti naa mutwe wa Elisha mwana wa Safati nditaukosoli sunu!”+
32 Lino Elisha wakalikkede muŋanda yakwe alimwi abaalu bakalikkede anguwe. Mwami wakatuma muntu kumbele lyakwe, pele mutumwa katanasika, Elisha wakaambila baalu kuti: “Sena mwamubona mwana wamujayi+ ooyu mbwaatuma muntu kuti azoondikosole mutwe? Mulangisye, mbwatiisikile buyo mutumwa ooyu, mujale cijazyo akucisiminina kutegwa atanjili. Sena taali maulu aasimalelaakwe aayo aalimvwisya musyule lyakwe?”
33 Lino naakacili kwaambaula ambabo, mutumwa wakaboola kulinguwe, eelyo mwami wakati: “Mapenzi aaya azwa kuli Jehova. Ino nkaambo nzi ncondiceelede kulindila Jehova?”
Bupanduluzi buyungizyidwe
^ Naa “ziindi ziinda kuli comwe naa zyobilo.”
^ Mu Chihebrayo, “cakanyemya moyo wamwami.”
^ Mu Chihebrayo, “nkambi.”
^ Kagabba aaka kakaleelene amalita aali 1.22. Amubone Makani Aayungizyidwe B14.
^ Naa “kunsi, izyakali kuguma lukanda lwakwe.”
