2 Bami 8:1-29
8 Elisha wakaambila mukaintu uulaamwana ngwaakabusya* kuti:+ “Nyamuka uunke antoomwe abamuŋanda yako, ukakkale mbuli muzwakule kufwumbwa nkokonzya kuyookkala, nkaambo Jehova uyanda kuleta nzala,+ eelyo iyooba munyika myaka iili ciloba.”
2 Aboobo mukaintu ooyo wakanyamuka akucita mbubonya mbwaakaamba muntu wa Leza mwini-mwini. Wakaunka abamuŋanda yakwe akuyookkala munyika yaba Filisiti+ myaka iili ciloba.
3 Noyakamana myaka iili ciloba, mukaintu ooyo wakapiluka kuzwa kunyika yaba Filisiti akuunka kuyoolilila mwami kujatikizya ŋanda yakwe amuunda wakwe.
4 Lino mwami wakali kwaambaula a Gehazi imubelesi wamuntu wa Leza mwini-mwini akumwaambila kuti: “Akaka kondilwiida milimo mipati yoonse njaakacita Elisha.”+
5 Eelyo kaciluula kumwami Elisha mbwaakabusya mufwu,+ mukaintu ooyo iwakabusyilwa mwana wakaboola kumwami akutalika kulila kujatikizya ŋanda yakwe amuunda wakwe.+ Mpoonya aawo Gehazi wakati: “Omwami simalelaangu, ooyu ngomukaintu ngondali kwaamba alimwi ooyu ngomwanaakwe Elisha ngwaakabusya.”
6 Kumane mwami wakabuzya mukaintu, eelyo wakamulwiida makani. Mpoonya mwami wakamupa umwi wabasilutwe akumulailila kuti: “Komupilusizya zintu zyakwe zyoonse alimwi ampindu yoonse yamumuunda wakwe kuzwa ciindi naakazwa munyika kusikila sunu.”
7 Elisha wakasika ku Damasiko+ ciindi Beni-hadadi+ mwami wa Siriya naakacisidwe. Aboobo wakaambilwa kuti: “Imuntu wa Leza mwini-mwini+ waboola okuno.”
8 Mpoonya mwami wakaambila Hazaeli+ kuti: “Kobweza cipego akuunka kuyooswaangana amuntu wa Leza mwini-mwini.+ Ukabuzye kuli Jehova kwiinda mulinguwe kuti, ‘Sena ndilapona kubulwazi oobu?’”
9 Aboobo Hazaeli wakaunka kuyoomuswaanganya kajisi cipego azintu zibotu zyamisyobo yoonse zyaku Damasiko zyakanyamwidwe ankamela zili 40. Wakasika akwiima kumbele lyakwe akwaamba kuti: “Mwanaako Beni-hadadi mwami wa Siriya wandituma kulinduwe kuzoobuzya kuti, ‘Sena ndilapona kubulwazi oobu?’”
10 Mpoonya Elisha wakamwiingula kuti: “Koya ukamwaambile kuti, ‘Kupona ulapona,’ pele Jehova wandiyubunwida kuti masimpe simalelaako ulafwa.”+
11 Eelyo wakazumanana kumulanga cakuti wakafwa nsoni. Mpoonya muntu wa Leza mwini-mwini wakalila.
12 Mpoonya Hazaeli wakabuzya kuti: “Ino ulila nzi simalelaangu?” Eelyo wakaingula kuti: “Ndilizyi mapenzi ngoyoobaletela bana Israyeli.+ Uyoobaumpila masena aabo aakwabilidwe, baalumi babo basyomwa uyoobajaya apanga, bana babo uyoobajaya alimwi bamakaintu babo bamitide uyoobaandula.”+
13 Hazaeli wakati: “Ino mebo ndemubelesi wako ndime ni, ndemubwa buyo kuti nkacite cintu cili boobu?” Pele Elisha wakati: “Jehova wanditondezya kuti uyooba mwami wa Siriya.”+
14 Kumane wakazwa kuli Elisha akupiluka kuli simalelaakwe ooyo iwakamubuzya kuti: “Ino Elisha wakwaambila kuti nzi?” Wakaingula kuti: “Wandaambila kuti, ‘Masimpe kupona ulapona.’”+
15 Pele buzuba bwakatobela Hazaeli wakabweza ngubo, wiinyika mumaanzi akumuvwumba* kumeso anjiyo kutegwa afwundilile kusikila wafwa.+ Mpoonya Hazaeli wakaba mwami mubusena bwakwe.+
16 Lino Jehoramu+ mwana wa Mwami Jehosafati wa Juda, wakaba mwami mumwaka wasanu wabulelo bwa Jehoramu,+ mwana wa Ahabu mwami wa Israyeli, ciindi Jehosafati naakali mwami wa Juda.
17 Wakali amyaka iili 32 naakaba mwami, eelyo wakalela kwamyaka iili lusele mu Jerusalemu.
18 Wakeenda munzila zyabami bana Israyeli,+ mbubonya mbobakacita bamuŋanda ya Ahabu,+ nkaambo wakakwete mwana musimbi wa Ahabu;+ alimwi wakazumanana kucita zibi mumeso aa Jehova.+
19 Pele Jehova tanaakayanda kuleta lunyonyooko kubwami bwa Juda akaambo ka Davida mubelesi wakwe,+ nkaambo wakamusyomezyede kumupa lambe,+ walo abana bakwe lyoonse.
20 Mumazuba aakwe, bana Edomu bakazangila bulelo bwa Juda,+ mpoonya bakalibikkila mwami wabo.+
21 Aboobo Jehoramu wakaunka ku Zairi ankalaki zyakwe zyoonse eelyo masiku wakanyamuka akuzunda bana Edomu ibakamuzingulukide antoomwe abasilutwe bankalaki; eelyo basikalumamba bakatijila kumatente aabo.
22 Pele bana Edomu bazumanana kuzangila bulelo bwa Juda kusikila sunu. Bana Libina+ abalo bakazanga aciindi eeco.
23 Makani oonse aakaindi aamba zya Jehoramu azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Juda.
24 Mpoonya Jehoramu wakoona abamausyi alimwi wakazikkwa kubusena kwakazikkilwa bamausyi mu Munzi wa Davida.+ Eelyo Ahaziya+ mwanaakwe wakaba mwami mubusena bwakwe.
25 Mumwaka wa 12 wabulelo bwa Jehoramu mwana wa Ahabu mwami wa Israyeli, Ahaziya mwana wa Mwami Jehoramu wa Juda wakaba mwami.+
26 Ahaziya wakali amyaka iili 22 naakaba mwami, eelyo wakalela kwamwaka omwe mu Jerusalemu. Banyina bakali ba Ataliya+ muzyukulu* wa Mwami Omuri+ wa Israyeli.
27 Wakeenda munzila zyabamuŋanda ya Ahabu+ alimwi wakazumanana kucita zibi mumeso aa Jehova mbubonya mbuli bamuŋanda ya Ahabu, nkaambo wakali musazinyina abamuŋanda ya Ahabu nkwaakakwatila.+
28 Aboobo wakaunka antoomwe a Jehoramu mwana wa Ahabu ku Ramoti-gileadi+ kuyoolwana Mwami Hazaeli wa Siriya, pele bana Siriya bakamucisa Jehoramu.+
29 Aboobo Mwami Jehoramu wakapiluka ku Jezreeli+ kuti akapone zilonda nzyobakamucisa bana Siriya ku Rama* ciindi naakalwana a Mwami Hazaeli wa Siriya.+ Ahaziya mwana wa Jehoramu mwami wa Juda wakaunka kuyoobona Jehoramu mwana wa Ahabu ku Jezreeli nkaambo bakamucisa.*
Bupanduluzi buyungizyidwe
^ Naa “ngwaakapa kuti apone alimwi.”
^ Naa “akumubikka.”
^ Mu Chihebrayo, “mwana musimbi.”
^ Eeyi njenzila mfwaafwi yakulemba “Ramoti-gileadi.”
^ Naa “wakalicisidwe.”
