2 Makani 12:1-16
12 Lino bwami bwa Rehoboamu mbobwakakkazikizyigwa buyo+ alimwi mbwaakabeda buyo anguzu, wakausiya Mulawo wa Jehova,+ alimwi abalo bana Israyeli boonse bakacita mbubonya oobo.
2 Mumwaka wasanu wabulelo bwa Mwami Rehoboamu, Mwami Sisaki+ wa Egepita wakaboola kuzoolwana Jerusalemu nkaambo tiibakasyomeka kuli Jehova.
3 Wakajisi nkalaki zili 1,200, basimabbiza bali 60,000 abasikalumamba batakonzyi kubalwa mbaakaboola limwi kuzwa ku Egepita–bana Libya, bana Suki abana Etiopiya.+
4 Wakaizunda minzi iikwabilidwe ya Juda mane wakazoosika aku Jerusalemu.
5 Lino musinsimi Semaya+ wakaboola kuli Rehoboamu abasilutwe ba Juda ibakabungene ku Jerusalemu akaambo kakuyoowa Sisaki, eelyo wakati kulimbabo: “Mboobu mbwaamba Jehova, ‘Nywebo mwakandisiya, aboobo andime ndilamusiya+ akumwaaba mumaanza aa Sisaki.’”
6 Mpoonya basilutwe bamu Israyeli amwami bakalibombya+ akwaamba kuti: “Jehova uliluleme.”
7 Lino Jehova naakabona kuti balibombya, Jehova wakaambila Semaya kuti: “Aaba bantu balibombya. Nsikoobanyonyoona pe,+ alimwi ino-ino ndilabavwuna. Tandikootila bukali bwangu mu Jerusalemu kwiinda muli Sisaki.
8 Pele balaba babelesi bakwe kutegwa babone lwiindano luliko akati kakubelekela ndime akubelekela bami* bamuzisi zimbi.”
9 Aboobo Mwami Sisaki wa Egepita wakaboola kuzoolwana Jerusalemu. Wakabweza zintu ziyandisi zyamuŋanda ya Jehova+ alimwi azintu ziyandisi zyamuŋanda yamwami. Wakazibweza zyoonse kubikkilizya antobo zyangolida nzyaakapangide Solomoni.+
10 Aboobo Mwami Rehoboamu wakapanga ntobo zyamukuba mubusena bwanzizyo akuzipa basilutwe babalindizi, aabo ibakali balindizi* bamulyango waŋanda yamwami.
11 Lyoonse mwami naakali kuboola kuŋanda ya Jehova, balindizi aaba bakali kunjila akuzibweza, mpoonya bamana bakali kuzipilusya kuŋanda yabalindizi.
12 Akaambo kakuti mwami wakalibombya, Jehova wakaleka kumunyemena+ alimwi tanaakabanyonyweeda limwi bantu boonse.+ Kunze lyaboobo, kwakacili kujanika zintu zibotu mu Juda.+
13 Mwami Rehoboamu wakayumya bwami bwakwe mu Jerusalemu alimwi wakazumanana kulela; Rehoboamu wakali amyaka iili 41 naakaba mwami, alimwi wakalela myaka iili 17 mu Jerusalemu, imunzi Jehova ngwaakasala akati kamisyobo yoonse ya Israyeli kuti abikke zina lyakwe. Banyina mwami bakali ba Naama, ibana Amoni.+
14 Pele wakacita zibi nkaambo tanaakabamba moyo wakwe kuyandaula Jehova.+
15 Lino makani aakaindi aamba zya Rehoboamu, kuzwa kumatalikilo kusikila kumamanino, alilembedwe akati kamakani aa Semaya+ musinsimi amakani aa Ido+ sizilengaano kweelana amulongo wamazyalani. Alimwi lyoonse kwakali kuba nkondo akati ka Rehoboamu a Jeroboamu.+
16 Kumane Rehoboamu wakoona abamausyi alimwi wakazikkwa mu Munzi wa Davida;+ mpoonya Abija+ mwanaakwe wakaba mwami mubusena bwakwe.
