2 Makani 15:1-19
-
Asa wacinca zintu (1-19)
15 Lino muuya wa Leza wakasikila Azariya mwana wa Odedi.
2 Aboobo wakaunka kuyooswaangana a Asa akumwaambila kuti: “Kondiswiilila, O Asa alimwi aba Juda boonse abana Benjamini! Jehova unooli andinywe kufwumbwa buyo kuti andinywe mwazumanana kuba anguwe;+ alimwi kuti mwamuyandaula, uyoomulekela kuti mumujane,+ pele kuti mumusiye, awalo uyoomusiya.+
3 Kwaciindi cilamfwu* bana Israyeli tiibakajisi Leza mwini-mwini, tiibakajisi mupaizi uubayiisya, alimwi tiibakajisi mulawo pe.+
4 Pele nibakali mumapenzi, bakapiluka kuli Jehova Leza wa Israyeli akumuyandaula, mpoonya wakabalekela kuti bamujane.+
5 Mumazuba aayo kunyina wakali kukonzya kweenda cakuliiba pe,* nkaambo kwakali lupyopyongano lupati akati kabantu boonse bamunyika.
6 Cisi cakali kupwayaula cisinyina, munzi amunzinyina, nkaambo Leza nguwakapa kuti kube lupyopyongano amapenzi aindene-indene.+
7 Pele nywebo amuyume alimwi mutatyompwi pe,*+ nkaambo milimo yanu iyoolumbulwa.”
8 Lino Asa mbwaakaamvwida buyo majwi aa Azariya alimwi abusinsimi bwa Odedi musinsimi, wakaba acamba cakugwisya mituni iisesemya munyika yoonse ya Juda+ a Benjamini amuminzi njaakabweza yamumalundu aa Efraimu, alimwi wakayakulula cipaililo ca Jehova icakali kumbele lyakkoce lyaŋanda ya Jehova.+
9 Alimwi wakabunganya ba Juda boonse abana Benjamini alimwi abeenzu ibakali akati kabo ikuzwa kunyika ya Efraimu, Manase a Simeoni,+ nkaambo banji bakaboola kulinguwe kuzwa ku Israyeli nobakabona kuti Jehova Leza wakwe wakali anguwe.
10 Aboobo bakabungana antoomwe ku Jerusalemu mumwezi watatu mumwaka wa 15 wabulelo bwa Asa.
11 Mubuzuba oobo bakatuula zipaizyo kuli Jehova kuzwa kuzisaalo nzyobakaleta, bakatuula ŋombe zili 700 alimwi ambelele zili 7,000.
12 Kuyungizya waawo bakapanga cizuminano cakuyandaula Jehova Leza wabamausyi camoyo wabo woonse abuumi bwabo boonse.+
13 Kufwumbwa iwatakali kuyoomuyandaula Jehova Leza wa Israyeli wakeelede kujaigwa, kufwumbwa naa mwana naa mupati, mwaalumi naa mukaintu.+
14 Mpoonya bakakonka kuli Jehova ajwi lipati, loongololo lwakusekelela, myeembo alimwi ampeta.
15 Aboobo ba Juda boonse bakasekelela akaambo kacikonke ncobakakonka, nkaambo bakakonka amoyo wabo woonse alimwi bakamuyandaula Leza eelyo wakabalekela kuti bamujane,+ aboobo Jehova wakazumanana kubapa kulyookezya mumabazu oonse.+
16 Mwami Asa wakabatanda ba Maaka+ bakaapanyina acuuno ceelede banyina mwami,* nkaambo bakapangide mutuni uusesemya wakubelesya kukomba musemu wacisamu wakukomba.*+ Asa wakaugonkaula mutuni wabo uusesemya akuupwayaula alimwi akuwuumpa ku Kkuti lya Kidroni.+
17 Pele masena aakukombela tanaakagwisyigwa+ mu Israyeli.+ Nokuba boobo, moyo wa Asa wakalimaninide kuli Leza mubuumi bwakwe boonse.*+
18 Mpoonya wakaleta zintu muŋanda ya Leza mwini-mwini eezyo walo abausyi nzyobakasalazya–nkokuti nsiliva, ngolida azibelesyo ziindene-indene.+
19 Lino kwakanyina nkondo mane kusikila mumwaka wa 35 wabulelo bwa Asa.+
Bupanduluzi buyungizyidwe
^ Mu Chihebrayo, “Kwamazuba manji.”
^ Mu Chihebrayo, “kwakanyina luumuno kuli yooyo wakali kuzwa naa ooyo wakali kunjila.”
^ Mu Chihebrayo, “maanza aanu atalebuki pe.”
^ Naa “namalelo.”
^ Amubone Bupanduluzi Bwamabala.
^ Mu Chihebrayo, “mazuba aakwe oonse.”
