2 Makani 19:1-11
19 Mpoonya Mwami Jehosafati wa Juda wakapiluka muluumuno+ kuŋanda* yakwe ku Jerusalemu.
2 Lino Jehu+ mwana wa Hanani+ sizilengaano wakaunka kuyooswaangana a Mwami Jehosafati akumwaambila kuti: “Sena weelede kugwasya basizibi+ alimwi akuyanda baabo ibamusulide Jehova?+ Akaambo kaceeci bukali bwa Jehova bwakusikila.
3 Nokuba boobo, kuli bubotu bwajanwa mulinduwe,+ nkaambo wakagwisya misemu yazisamu yakukomba* kuzwa munyika alimwi wabamba moyo wako kukuyandaula* Leza mwini-mwini.”+
4 Jehosafati wakazumanana kukkala mu Jerusalemu, eelyo wakaunka alimwi akati kabantu kuzwa ku Beere-seba kusikila kumalundu aa Efraimu+ ikuti abapilusye kuli Jehova Leza wabamausyi.+
5 Alimwi wakasala babetesi mumunzi umwi aumwi munyika yoonse, nkokuti muminzi yoonse ya Juda iikwabilidwe.+
6 Mpoonya wakaambila babetesi kuti: “Amucenjele mbomucita zintu, nkaambo tamubetekeli muntu pe, mubetekela Jehova, alimwi ulaandinywe ciindi nomubeteka.+
7 Lino amuyoowe Jehova.+ Amucenjele kujatikizya zintu nzyomucita, nkaambo kuli Jehova Leza wesu kunyina kutalulama+ naa kusalulula+ nokuba kubweza cisinkamulomo.”+
8 Amwalo mu Jerusalemu Jehosafati wakabikka ba Levi bamwi, bapaizi alimwi abasilutwe bamwi baziinga zyabamausyi zya Israyeli kuti kababetekela Jehova akulanganya twaambo twabantu bamu Jerusalemu.+
9 Alimwi wakabalailila kuti: “Mboobu mbomweelede kunoocita cakuyoowa Jehova, cakusyomeka alimwi acamoyo woonse:*
10 Kufwumbwa ciindi banabokwanu ibakkala muminzi yabo nobaleta twaambo kulindinywe itujatikizya kutila bulowa,+ mubuzyo kujatikizya mulawo, milazyo, malailile alimwi ambeta, mweelede kubacenjezya kutegwa batabi amulandu kuli Jehova; buyo-buyo bukali bwakwe bulamusikila nywebo abanabokwanu. Oobu mbomweelede kucita kutegwa mutabi amulandu.
11 Ngooyu Amariya mupati wabapaizi uunoomulanganya mumakani oonse aa Jehova.+ Zebadiya mwana wa Isimayeli silutwe waŋanda ya Juda mumakani oonse aamwami. Alimwi ba Levi banooli andinywe kabali basololi. Amuyume akubeleka cabunkutwe alimwi Jehova aabe abaabo bacita zibotu.”*+
Bupanduluzi buyungizyidwe
^ Naa “kuŋanda yamwami.”
^ Amubone Bupanduluzi Bwamabala.
^ Naa “moyo wako ulikanzide kuyandaula.”
^ Naa “akulyaaba cakumaninina.”
^ Naa “aabe azintu zibotu.”