2 Makani 20:1-37
20 Kumane bana Moabu+ abana Amoni+ antoomwe abamwi bana Amonimu* bakaboola kuzoolwana Jehosafati.
2 Aboobo bantu bakaambila Jehosafati kuti: “Kwaboola nkamu mpati kuzwa kucooko cakulwizi,* ku Edomu,+ bali ku Hazazoni-tamara, nkokuti ku Eni-gedi.”+
3 Amvwe boobo, Jehosafati wakayoowa eelyo wakakanza* kuyandaula Jehova.+ Aboobo wakaambilizya kuti ba Juda boonse baliimye kulya.
4 Mpoonya ba Juda bakabungana antoomwe kuti babuzye makani kuli Jehova;+ bakaboola kuzwa kuminzi yoonse ya Juda kuzoobuzya makani kuli Jehova.
5 Mpoonya Jehosafati wakaima mumbungano ya Juda a Jerusalemu muŋanda ya Jehova kumbele lyalubuwa lupya,
6 eelyo wakati:
“O Jehova Leza wabamatata, sena toli Leza wakujulu;+ sena toli nduwe weendelezya mami oonse aabamasi?+ Mujanza lyako mulinguzu cakuti taakwe uukonzya kwiima kulwana nduwe.+
7 O Leza wesu, sena taakwe nookatanda bantu bamunyika eeyi kuzwa kubusyu bwabantu bako bana Israyeli akwiipa kulunyungu lwamulongwe wako Abrahamu kuti ibe yabo kukabe kutamani?+
8 Alimwi bakakkala mulinjiyo akukuyakila tempele ooko liitwa azina lyako+ kabati,
9 ‘Ikuti naa twasikilwa mapenzi, panga, lubeta lupati, cilwazi naa nzala, atwiime kumbele lyaŋanda eeyi akubusyu bwako (nkaambo zina lyako lili muŋanda eeyi)+ akukwiita kulomba lugwasyo mumapenzi eesu, ukaswiilile akutuvwuna.’+
10 Lino mbaaba baalumi baku Amoni, Moabu abantu bamumalundu aa Seiri,+ aabo mbootakazumizya bana Israyeli kuti babalwane ciindi nobakazwa mucisi ca Egepita. Bakabeenguluka buyo kakunyina kubanyonyoona.+
11 Lino batubukila akuboola kuzootutanda akutunyanga nyika njookatupa kaili lukono.+
12 O Leza wesu, sena tokoobabeteka?+ Nkaambo swebo tunyina nguzu zyakuzunda nkamu eeyi mpati iiboola kutulwana; alimwi tatuzyi ncotweelede kucita,+ pele meso eesu ali kulinduwe.”+
13 Lino ba Juda boonse bakaliimvwi kubusyu bwa Jehova antoomwe atwana twabo tuniini, bamakaintu babo alimwi abana babo.
14 Mpoonya akati kambungano, muuya wa Jehova wakasikila Jahazieli mwana wa Zekariya mwana wa Benaya mwana wa Jeieli mwana wa Mataniya imu Levi waluzubo lwa Asafu.
15 Aboobo wakati: “Amuswiilile noba Juda nyoonse, andinywe nomukkala mu Jerusalemu kubikkilizya a Mwami Jehosafati! Mboobu mbwaamba Jehova kulindinywe, ‘Mutayoowi nokuba kukankama akaambo kankamu eeyi mpati, nkaambo nkondo taili yanu pe, njiya Leza.+
16 Juunza mukaunke kuyoobalwana. Bayooletezya kazila kaku Zizi, eelyo muyoobajana nkolimanina kkuti* kufwaafwi ankanda ya Jerueli.
17 Tamukayandiki kwiilwana nkondo eeyi pe. Amwiime mumasena aanu, mwiime nji,+ akubona lufwutuko lwa Jehova ndwatiimucitile.*+ Noba Juda abana Jerusalemu, mutayoowi nokuba kukankama.+ Juunza mukaunke nkobabede, Jehova unooli andinywe.’”+
18 Mpoonya aawo Jehosafati wakakotama akuvwuntama ansi, eelyo abalo ba Juda boonse abantu bakkala mu Jerusalemu bakavwuntama ansi kubusyu bwa Jehova akukomba Jehova.
19 Mpoonya ba Levi ibakali balunyungu lwabana Kohati+ abalunyungu lwabana Kora, bakanyamuka akutembaula Jehova Leza wa Israyeli ajwi pati kapati.+
20 Bakabuka mafwumofwumo akuunka kunkanda ya Tekowa.+ Nobakali kuyaabuya, Jehosafati wakaima akwaamba kuti: “Amundiswiilile, nywebo noba Juda andinywe nomukkala mu Jerusalemu! Amusyome Jehova Leza wanu kutegwa mukacikonzye kwiima nji.* Amusyome basinsimi bakwe,+ eelyo muyoozwidilila.”
21 Lino naakamana kubuzyanya abantu, wakasala baalumi kuti kabaimbila+ Jehova akumutembaula kabasamide zisani zisalala izyeebeka kumwi kabeendela kumbele lyabasikalumamba kabaimba kuti: “Amumulumbe Jehova, nkaambo luyando lwakwe lutamani nkoluli lyoonse mane kukabe kutamani.”+
22 Lino nibakatalika koongolola kwiimba cakukondwa akutembaula Leza, Jehova wakabikka bantu basikuyubilila kuti balwane baalumi bana Amoni, bana Moabu abantu bamumalundu aa Seiri ibakali kusaala nyika ya Juda, aboobo bakajayana mulicabo.+
23 Eelyo bana Amoni abana Moabu bakatalika kulwana bantu bamumalundu aa Seiri+ akubanyonyoona cakumaninina; nibakamana kunyonyoona bana Seiri, bakatalika kujayana mulicabo.+
24 Pele ba Juda nibakasika kungazi yamulindizi yakunkanda+ akulanga kunkamu eeyo, bakabona buyo mitunta yabo kayaalabene ansi;+ kunyina naba omwe iwakafwutuka.
25 Aboobo Jehosafati abantu bakwe bakaunka kuyoosaala, eelyo bakajana zintu zinji kapati, zisani alimwi azintu ziyandisi nzyobakabweza kubantu aaba kusikila baalilwa kuzinyamuna.+ Cakabatolela mazuba otatwe kususa zisaalo eezyo nkaambo zyakali zinji kapati.
26 Mubuzuba bwane bakabungana antoomwe ku Kkuti* lya Beraka, eelyo ooko bakatembaula* Jehova. Nkakaambo kaako busena oobu bakabuulika kuti Kkuti lya Beraka*+—kusikila asunu.
27 Mpoonya ba Juda boonse abana Jerusalemu kabasololelwa a Jehosafati, bakapiluka ku Jerusalemu kabayaabusekelela nkaambo Jehova wakabagwasya kuzunda basinkondonyina.+
28 Aboobo bakasika ku Jerusalemu kabayaabulizya tuntimbwa amyeembo+ azibelesyo zimbi zyakwiimbya+ eelyo bakaunka kuŋanda ya Jehova.+
29 Eelyo buyoofwu buzwa kuli Leza bwakasikila mami oonse aamuzisi naakamvwa kuti Jehova wakalwana basinkondo babana Israyeli.+
30 Aboobo bwami bwa Jehosafati bwakali muluumuno alimwi Leza wakwe wakazumanana kumupa kulyookezya mumabazu oonse.+
31 Jehosafati wakazumanana kweendelezya cisi ca Juda. Wakali amyaka iili 35 naakaba mwami, alimwi wakeendelezya kwamyaka iili 25 mu Jerusalemu. Banyina bakali ba Azuba mwana wa Sili.+
32 Wakazumanana kweenda munzila zya Asa usyi.+ Tanaakaleya mulinzizyo, wakali kucita ziluleme mumeso aa Jehova.+
33 Pele masena imwakali kucitilwa bukombi bwakubeja tanaakagwisyigwa pe,+ alimwi bantu tiibakalinabamba myoyo yabo kukuyandaula Leza wabamausyi.+
34 Lino makani oonse aakaindi aamba zya Jehosafati, kuzwa kumatalikilo kusikila kumamanino alilembedwe akati kamakani aa Jehu+ mwana wa Hanani,+ aayo aakabikkilizyigwa mu Bbuku lyamakani aa Bami ba Israyeli.
35 Kumane Mwami Jehosafati wa Juda wakapanga cizuminano a Mwami Ahaziya wa Israyeli ooyo iwakacita zibi.+
36 Aboobo wakabeleka anguwe mukupanga mato aaunka ku Tarisi,+ eelyo bakapanga mato ku Ezioni-geberi.+
37 Nokuba boobo, Eliezere mwana wa Dodavahu waku Maresa wakasinsima kujatikizya Jehosafati kuti: “Akaambo kakuti wapanga cizuminano a Ahaziya, Jehova ulainyonyoona milimo yako.”+ Aboobo mato akanyonyooka+ cakuti tanaakacili kukonzya kuunka ku Tarisi.
Bupanduluzi buyungizyidwe
^ Naa ambweni, “bana Meuni.”
^ Kuboneka kuti, oolu Ndwizi Lutajisi Buumi.
^ Mu Chihebrayo, “wakagamika busyu bwakwe.”
^ Naa “nkokagolela kalonga.”
^ Naa “akubona mbwayoomufwutula Jehova.”
^ Naa “kuliyumya.”
^ Naa “Cibanda.”
^ Mu Chihebrayo, “bakalongezya.”
^ Nkokwaamba kuti “Cilongezyo.”
