2 Makani 28:1-27
28 Ahazi+ wakali amyaka iili 20 naakaba mwami alimwi wakalela myaka iili 16 mu Jerusalemu. Tanaakacita ziluleme mumeso aa Jehova mbuli mbwaakacita Davida sikale wakwe.+
2 Muciindi caboobo, wakeenda munzila zyabami babana Israyeli,+ alimwi wakafwula zikozyanyo zyalubulo+ zyaba Baala.
3 Kuyungizya waawo wakali kuuntumuna busi bwazipaizyo mu Kkuti lya Mwana wa Hinomu* alimwi wakaumpa bana bakwe mumulilo+ kweelana azilengwa zisesemya zyabamasi+ aabo Jehova mbaakatanda kubusyu bwabana Israyeli.
4 Alimwi wakazumanana kutuula zipaizyo akuuntumuna busi bwazipaizyo mumasena aakukombela,+ mumalundu alimwi amunsi aazisamu zyoonse zifwefwema.+
5 Aboobo Jehova Leza wakwe wakamwaaba mumaanza aamwami waku Siriya,+ aboobo bakamuzunda akumubwezela bantu banji akubatola mubuzike ku Damasiko.+ Wakaabwa amumaanza aamwami wa Israyeli, ooyo wakazunda akujaya bantu bakwe banji.
6 Nkaambo Peka+ mwana wa Remaliya wakajaya baalumi boonse basicamba ibali 120,000 mucisi ca Juda mubuzuba bomwe akaambo kakuti bakasiya Jehova Leza wabamausyi.+
7 Kumane Zikiri, sikalumamba muna Efraimu, wakajaya Maaseya mwana wamwami a Azirikamu mweendelezi waŋanda yamwami* alimwi a Elikana iwakali wabili kumwami.
8 Kuyungizya waawo, bana Israyeli bakabweza banabokwabo bali 200,000 akubatola mubuzike–bamakaintu, bana babo basankwa abasimbi; alimwi bakabweza azisaalo zinji kuzwa kulimbabo, eelyo bakazitola ku Samariya.+
9 Pele musinsimi wa Jehova wazina lya Odedi wakaliko ooko. Musinsimi ooyo wakaunka kumpi yabasikalumamba iyakali kuboola ku Samariya akubaambila kuti: “Amubone! Akaambo kakuti Jehova Leza wabamauso wakanyemena ba Juda, wakabaaba mumaanza aanu,+ eelyo nywebo mwakabajaya cabukali bupati cakuti bwakasika akujulu.
10 Mpaawa lino muyanda kucita bantu bamu Juda amu Jerusalemu kuba babelesi banu baalumi abamakaintu.+ Nokuba boobo, sena andinywe tamujisi milandu kuli Jehova Leza wanu?
11 Lino amundiswiilile akubapilusya baange aabo mbomwakabweza kubanabokwanu, nkaambo bukali bwa Jehova ibuyaka mbuli mulilo buli alindinywe.”
12 Mpoonya aawo basilutwe bamwi bana Efraimu nkokuti Azariya mwana wa Jehohanana, Berekiya mwana wa Mesilemoti, Jehizikiya mwana wa Salumu a Amasa mwana wa Hadilai, bakaunkila baabo bakazwa kunkondo,
13 akubaambila kuti: “Mutaleti baange okuno pe, nkaambo eeci cilapa kuti tube amulandu kuli Jehova. Ncomuyanda kucita cilayungizya buyo kuzibi zyesu akumulandu wesu, nkaambo mulandu wesu mupati kale alimwi kuli bukali bupati ali bana Israyeli.”
14 Aboobo basikalumamba aabo bakabaleka baange akusiya zisaalo+ nzyobakasaalide mumaanza aabasilutwe ambungano yoonse.
15 Mpoonya baalumi aabo ibakasalidwe kweelana amazina aabo bakabweza baange, eelyo boonse akati kabo ibatakajisi zisani bakabasamika kuzwa kuzisaalo. Aboobo bakabasamika akubapa mpato, zyakulya azyakunywa alimwi amafwuta aakunana. Kuyungizya waawo, bakabakkwezyeka ambongolo aabo ibakagonkeledwe akubatola kubanabokwabo ku Jeriko, imunzi wamakunka. Kumane bakapiluka ku Samariya.
16 Aciindi eeco Mwami Ahazi wakalomba bami baku Asuri kuti bamugwasye.+
17 Alimwi bana Edomu bakalwana akusaala ba Juda alimwi akutola bantu mubuzike.
18 Abalo ba Filisiti+ bakasaala minzi yamu Sepela+ amu Negebi yaku Juda akubweza Beti-semesi,+ Aijaloni,+ Gederoti, Soko aminzi misyoonto* yanguwo, Timina+ aminzi misyoonto yanguwo alimwi a Gimuzo aminzi misyoonto yanguwo; alimwi bakakkala oomo.
19 Jehova wakababombya ba Juda akaambo ka Mwami Ahazi wa Israyeli, nkaambo wakalekela kutalilemeka mu Juda kwalo ikwakapa kuti kube kutasyomeka kapati kuli Jehova.
20 Mpoonya Mwami Tiligati-pilineseri+ wa Asuri wakaboola kumulwana akumupenzya+ muciindi cakumuyumya.
21 Nkaambo Ahazi wakabweza zintu zyakali muŋanda ya Jehova, muŋanda yamwami+ alimwi amumaanda aabasilutwe akuzipa kacili cipego kumwami wa Asuri; pele tiicakamugwasya pe.
22 Ciindi naakali mumapenzi, Mwami Ahazi wakaindilizya kutasyomeka kuli Jehova.
23 Wakatalika kutuula zipaizyo kuli baleza baku Damasiko+ ibakamuzunda,+ eelyo wakati: “Akaambo kakuti baleza babami baku Siriya balabagwasya, ndilabatuulila zipaizyo kutegwa bandigwasye.”+ Pele baleza aabo bakamupa kulebwa, walo abana Israyeli boonse.
24 Kuyungizya waawo, Ahazi wakabunganya zibelesyo zyamuŋanda ya Leza mwini-mwini; kumane wakazipwayaula zibelesyo zyamuŋanda ya Leza mwini-mwini+ akujala milyango yaŋanda ya Jehova+ akulipangila zipaililo muzyooko zyoonse zyanzila zyamu Jerusalemu.
25 Muminzi yoonse ya Juda wakapanga masena aakukombela aakuuntumwida busi bwazipaizyo kuli baleza bambi+ cakuti wakanyemya Jehova Leza wabamausyi.
26 Makani oonse aakaindi aamba zyanguwe anzila zyakwe, kuzwa kumatalikilo kusikila kumamanino alilembedwe mu Bbuku lyamakani aa Bami ba Juda aba Israyeli.+
27 Kumane Ahazi wakoona abamausyi alimwi bakamuzikka mumunzi, nkokuti mu Jerusalemu, nkaambo tiibakamutola kumasena aakuzikkila aabami ba Israyeli.+ Eelyo Hezekiya mwanaakwe wakaba mwami mubusena bwakwe.
Bupanduluzi buyungizyidwe
^ Amubone Bupanduluzi Bwamabala, “Gehena.”
^ Mu Chihebrayo, “waŋanda.”
^ Naa “yeengelede.”
