2 Makani 29:1-36
29 Hezekiya+ wakali amyaka iili 25 naakaba mwami, alimwi wakalela myaka iili 29 mu Jerusalemu. Banyina bakali ba Abija mwana wa Zekariya.+
2 Wakazumanana kucita ziluleme mumeso aa Jehova,+ mbubonya mbwaakacita Davida sikale wakwe.+
3 Mumwezi wakusaanguna, mumwaka mutaanzi wabulelo bwakwe wakajalula milyango yaŋanda ya Jehova akwiibambulula.+
4 Mpoonya wakaleta bapaizi aba Levi akubabunganya mubbuwa lyakali kujwe.
5 Wakati kulimbabo: “Amundiswiilile nywebo noba Levi. Amulisalazye+ akusalazya ŋanda ya Jehova Leza wabamauso, alimwi amugwisye zintu zisofweede mubusena busalala.+
6 Nkaambo bamatata tiibakasyomeka alimwi bakacita zibi mumeso aa Jehova Leza wesu.+ Bakamusiya akuleka kutondezya bulemu kutente lyakukombela lya Jehova alimwi bakamufwutatila.+
7 Alimwi bakajala milyango yakkoce+ akuzima malambe.+ Bakaleka kuumpa tununkilizyo+ akutuulila Leza wa Israyeli zipaizyo zyuumpwa+ mubusena busalala.
8 Aboobo bukali bwa Jehova bwakabukila Juda a Jerusalemu,+ eelyo wakabacita kuba cintu cipa kukankama, cintu cigambya alimwi akuba cintu cipa kusiba mulosi,* mbubonya mbuli mbomubwene ameso aanu.+
9 Amubone bamatata bakajaigwa apanga,+ abana besu basankwa abasimbi alimwi abamakaintu besu bakatolwa mubuzike akaambo kamakani aaya.+
10 Lino ndilayandisisya mumoyo wangu kupanga cizuminano a Jehova Leza wa Israyeli,+ kutegwa bukali bwakwe ibuyaka mbuli mulilo butuleke.
11 Nobana bangu, ecino tacili ciindi cakulilendekezya* pe, nkaambo Jehova wamusala kwiima kumbele lyakwe kutegwa mube babelesi bakwe+ abasikumuumpila tununkilizyo.”+
12 Mpoonya ba Levi bakanyamuka: Mahati mwana wa Amasai a Joeli mwana wa Azariya waluzubo lwabana Kohati;+ eelyo kuzwa kubana Merari,+ kwakali Kisi mwana wa Abidi a Azariya mwana wa Jehaleleli; kuzwa kubana Gerisoni,+ kwakali Joa mwana wa Zima a Edeni mwana wa Joa;
13 kuzwa kubana ba Elizafana, kwakali Simiri a Jeuli; kuzwa kubana ba Asafu,+ kwakali Zekariya a Mataniya;
14 kuzwa kubana ba Hemani,+ kwakali Jehieli a Simeyi; eelyo kuzwa kubana ba Jedutuni,+ kwakali Semaya a Uzieli.
15 Mpoonya bakabunganya banabokwabo antoomwe akulisalazya, eelyo bakaboola kuzoosalazya ŋanda ya Jehova mbubonya mwami mbwaakalailila kweelana amajwi aa Jehova.+
16 Mpoonya bapaizi bakanjila muŋanda ya Jehova kuti baisalazye eelyo bakagwisya zintu zyoonse zisofweede nzyobakajana mutempele lya Jehova akuzileta mulubuwa+ lwaŋanda ya Jehova. Kumane ba Levi bakazibweza akuzitola anze ku Kkuti lya Kidroni.+
17 Aboobo bakatalika kusalazya mubuzuba bwakusaanguna bwamwezi mutaanzi, eelyo mubuzuba bwalusele bwamwezi bakasika kukkoce lya Jehova.+ Bakaisalazya ŋanda ya Jehova mumazuba aali lusele, lino mubuzuba bwa 16 mumwezi wakusaanguna bakamanizya.
18 Kuzwa waawo bakanjila mwaakabede Mwami Hezekiya akumwaambila kuti: “Twaisalazya ŋanda ya Jehova yoonse, cipaililo cazituuzyo zyuumpwa+ azibelesyo zyaco zyoonse,+ alimwi atebulu lyazinkwa zyakwiilika*+ azibelesyo zyalyo zyoonse.
19 Alimwi zibelesyo zyoonse Mwami Ahazi nzyaakagwisya mutempele muciindi cabulelo bwakwe ciindi naakaleka kusyomeka+ twazibamba akuzisalazya,+ lino zili kumbele lyacipaililo ca Jehova.”
20 Mpoonya Mwami Hezekiya wakafwuma kakucili kooko akubunganya basilutwe bamunzi antoomwe, akuunka kuŋanda ya Jehova.
21 Bakaleta bapoho bali ciloba, bagutu bali ciloba, bagutu bacili bana ibali ciloba abajembwe bali ciloba kuti zibe cituuzyo cazibi zyabwami, zyatempele alimwi azyaba Juda.+ Aboobo wakaambila bapaizi, balunyungu lwa Aroni kuti bazituule acipaililo ca Jehova.
22 Mpoonya bakajaya ŋombe,+ eelyo bapaizi bakabweza bulowa akubusansaila acipaililo;+ kumane bakajaya bagutu akusansaila bulowa acipaililo, alimwi bakajaya bagutu bacili bana akusansaila bulowa acipaililo.
23 Kumane bakaleta bajembwe bacituuzyo cazibi afwaafwi amwami, eelyo mbungano yakabikka maanza alimbabo.
24 Mpoonya bapaizi bakajaya bajembwe aabo akubatuula antoomwe abulowa bwabo acipaililo kabali cituuzyo cazibi, kumanya milandu yabana Israyeli boonse, nkaambo mwami wakaamba kuti cituuzyo cuumpwa acituuzyo cazibi zyakali zyabana Israyeli boonse.
25 Lino wakabikkide ba Levi kuŋanda ya Jehova kabajisi miyuwa, tuntimbwa azibelesyo zyakwiimbya,+ kweelana amalailile aa Davida,+ Gadi+ sizilengaano wamwami a Natani+ musinsimi, nkaambo malailile aaya akazwa kuli Jehova kwiinda mubasinsimi bakwe.
26 Aboobo ba Levi bakaliimvwi azibelesyo zyakwiimbya zya Davida alimwi abapaizi kabajisi myeembo.+
27 Mpoonya Hezekiya wakabaambila kuti batuule cipaizyo cuumpwa acipaililo.+ Lino cituuzyo cuumpwa nicakatalika kutuulwa, lwiimbo lwa Jehova lwakatalika kwiimbwa antoomwe amyeembo kazitobelezya zibelesyo zyakwiimbya zya Mwami Davida wa Israyeli.
28 Lino mbungano yoonse yakalikoteme ansi ciindi lwiimbo nolwakali kwiimbwa amyeembo niyakali kulila–zyoonse eezyi zyakazumanana kucitika kusikila nicakamana kutuulwa cituuzyo cuumpwa.
29 Mbobakamanina buyo kutuula cituuzyo cuumpwa, mwami abantu boonse mbaakali limwi bakakotama akuvwuntama ansi.
30 Lino Mwami Hezekiya abasilutwe bakaambila ba Levi kuti batembaule Jehova kubelesya majwi aa Davida+ amajwi aa Asafu+ sizilengaano. Aboobo bakatembaula Leza akusekelela kapati, eelyo bakakotama akuvwuntama ansi.
31 Kumane Hezekiya wakati: “Lino mbwaanga mwasalwa* kuti mubelekele Jehova, amuboole akuleta zipaizyo alimwi azituuzyo zyakulumba kuŋanda ya Jehova.” Aboobo mbungano yakatalika kuleta zipaizyo alimwi azituuzyo zyakulumba, kufwumbwa iwakalyaabide amoyo woonse wakaleta zituuzyo zyuumpwa.+
32 Mweelwe wazituuzyo zyuumpwa nzyoyakaleta mbungano zyakali ŋombe zili 70, bagutu bali 100, bagutu bacili bana bali 200 —zyoonse eezyi zyakali cituuzyo cuumpwa kuli Jehova+—
33 alimwi azituuzyo zisalala zyakali ŋombe zili 600 ambelele zili 3,000.
34 Pele bapaizi bakali basyoonto cakuti tiibakali kukonzya kufwunda banyama aabo boonse bazituuzyo zyuumpwa, aboobo ibanabokwabo ba Levi bakabagwasya+ kusikila mulimo wamana alimwi kusikila ciindi bapaizi nobakalisalazya,+ nkaambo ba Levi bakali basungu* mukulisalazya kwiinda bapaizi.
35 Alimwi kwakali zituuzyo zyuumpwa+ zinji kubikkilizya amafwuta aazipaizyo zyalumvwano+ alimwi azituuzyo zinyugwa zyakutuula antoomwe azituuzyo zyuumpwa.+ Aboobo mulimo waŋanda ya Jehova wakatalika alimwi.*
36 Mpoonya Hezekiya abantu boonse bakasekelela akaambo kazintu Leza mwini-mwini nzyaakacitila bantu,+ nkaambo zintu eezyi zyakacitika cakutayeeyelwa.
Bupanduluzi buyungizyidwe
^ Naa “kuweela.”
^ Naa “cakulyookezya.”
^ Nkokuti, zinkwa zyacitondezyo.
^ Mu Chihebrayo, “Lino mwazuzya janza lyanu.”
^ Mu Chihebrayo, “bakaliluleme mumoyo.”
^ Naa “wakabambwa.”
