2 Makani 3:1-17
3 Mpoonya Solomoni wakatalika kuyaka ŋanda ya Jehova+ mu Jerusalemu atala aa Cilundu ca Moriya,+ ooko Jehova nkwaakalibonya kuli Davida usyi,+ mubusena oobo Davida mbwaakabambide acuumino camaila ca Orinani+ muna Jebusi.
2 Wakatalika kuyaka mubuzuba bwabili bwamwezi wabili mumwaka wane wabulelo bwakwe.
3 Ntalisyo yaŋanda ya Leza mwini-mwini eeyo Solomoni njaakayaka yakali tukokola* tuli 60 mubulamfwu atukokola tuli 20 mubwamba+ kweelana ambobakali kupima kaindi.
4 Kkoce ilyakali kumbele lyatempele lyakali tukokola tuli 20 mubulamfwu, kweelana abwamba bwaŋanda,* eelyo kuya mujulu lyakali kulampa tukokola tuli 120; mpoonya mukati wakalizilulula angolida iisalalisya.+
5 Wakaivwumba ŋanda mpati amapulanga aamulombe, kumane wakaizilulula angolida mbotu,+ mpoonya wakaibotya azifwanikiso zyazisamu zyamakunka+ anketani zyakusakatizya.+
6 Kumane ŋanda wakaisakatizya amabwe mabotu mayandisi;+ ngolida+ njaakabelesya yakazwa ku Parivaimu.
7 Wakaizilulula ŋanda, ciluli, milyango, bwaanda bwayo alimwi azijazyo zyayo angolida;+ eelyo wakazekaula zifwanikiso zyabakerubi kubwaanda.+
8 Kumane wakapanga Busena Busalalisya;*+ bulamfwu bwambubo bwakaleelene abwamba bwaŋanda iini, nkokuti tukokola tuli 20, bwamba bwambubo bwakali tukokola tuli 20. Wakaizilulula angolida mbotu iikkwana matalenta* aali 600.+
9 Mpikili zyangolida zyakali kulema masyekeli* aali 50; eelyo twaanda twamujulu wakatuzilulula angolida.
10 Mpoonya mu Busena Busalalisya* wakapanga zikozyanyo zyabakerubi bobilo, kumane wakabazilulula angolida.+
11 Bulamfwu bwamababa oonse aabakerubi+ bwakali tukokola tuli 20; bbaba lyakerubi wakusaanguna lyakali kulampa tukokola tosanwe alimwi lyakali kuguma kubwaanda bwaŋanda, eelyo bbaba lyakwe limbi lyakali kulampa tukokola tosanwe alimwi lyakali kuguma bbaba lyakerubi uumbi.
12 Bbaba lyakerubi uumbi ililampa tukokola tosanwe lyakali kuguma kubwaanda bumbi eelyo bbaba lyakwe limbi ililampa tukokola tosanwe lyakali kugumana abbaba lyakerubi wakusaanguna.
13 Mababa aabakerubi aaba akasika kubulamfwu bwatukokola tuli 20 naakatandabede; alimwi bakaliimvwi kabalangide muŋanda mpati.*
14 Alimwi wakapanga cisitilizyo cantali+ yamubala wajulu, boya bwambelele bwamubala wacisombo, milembo yamubala wadowalowa alimwi amilembo iilukidwe kabotu, alimwi wakasuma zikozyanyo zyabakerubi alincico.+
15 Mpoonya wakapanga misemu yobilo+ kumbele lyaŋanda, umwi aumwi kaulampa tukokola tuli 35, alimwi mpumpu iyakabikkwa atala aamusemu umwi aumwi yakali tukokola tosanwe.+
16 Kumane wakapanga nketani zili mbuli tusakatizyo akuzibikka atala aamisemu, alimwi wakapanga mapomegranite aali 100 akwaabika kunketani.
17 Wakaimika misemu kumbele lyatempele, umwi kululyo* mpoonya umwi kulumwensyi;* kumane wakaulika musemu wakululyo kuti Jakini* mpoonya wakulumwensyi wakawuulika kuti Boazi.*
Bupanduluzi buyungizyidwe
^ Kakokola komwe kakaleelene amasentimita aali 44.5, pele bamwi baamba kuti kakokola kakaindi kaambwa waawa nkakaako ikakali kalamfwu ikakeelene amasentimita aali 51.8. Amubone Makani Aayungizyidwe B14.
^ Naa “tukokola tuli 20 mubwamba bwaŋanda.”
^ Talenta lyomwe lyakali kulema makkilogilamu aali 34.2. Amubone Makani Aayungizyidwe B14.
^ Mu Chihebrayo, “ŋanda.”
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
^ Mu Chihebrayo, “ŋanda.”
^ Nkokuti, ku Busena Busalala.
^ Naa “kumusanza.”
^ Naa “kunyika.”
^ Nkokwaamba kuti “Aasitikizye [nkokuti, Jehova].”
^ Ambweni nkokwaamba kuti “Canguzu.”
