2 Makani 35:1-27
35 Mpoonya Josiya wakacita Pobwe Lyakwiindilila+ kuli Jehova mu Jerusalemu akutuula cipaizyo ca Pobwe Lyakwiindilila+ mumwezi wakusaanguna mubuzuba bwa 14.+
2 Wakabikka bapaizi mumilimo yabo alimwi wakabayumya-yumya kuti babeleke mulimo wabo waŋanda ya Jehova.+
3 Mpoonya wakaambila ba Levi, bamayi babana Israyeli boonse,+ aabo ibakali kusalala kuli Jehova kuti: “Amubikke Bbokesi lisalala muŋanda eeyo Solomoni mwana wa Davida mwami wa Israyeli njaakayaka;+ tamuceelede kulinyamwida amagwezyo aanu pe.+ Lino amubelekele Jehova Leza wanu abantu bakwe bana Israyeli.
4 Alimwi amulibambile muziinga zyabamauso kweelana ankamu zyanu mbubonya mbwaakalemba Mwami Davida+ wa Israyeli a Solomoni mwanaakwe.+
5 Amwiime mubusena busalala kweelana ankamu yaziinga zyabamauso izyabanabokwanu, pele bantu bamwi boonse* beelede kwiima munkamu zyabo kweelana aziinga zyabamausyi izyaba Levi.
6 Amujaye munyama wacipaizyo ca Pobwe Lyakwiindilila+ akulisalazya alimwi akubamba banabokwanu kuti bacite kweelana ajwi lya Jehova kwiinda muli Musa.”
7 Josiya wakasanga kubantu mbelele ampongo, nkokuti bagutu bacili bana atujembwe, kuti zibe zyacipaizyo ca Pobwe Lyakwiindilila lyabaabo boonse bakajanika, antoomwe zyakali 30,000 alimwi aŋombe zili 3,000. Eezyi zyoonse zyakazwa kumbono zyamwami.+
8 Basilutwe bakwe abalo bakapa zyakusanga zyakuliyandila kubantu, kubapaizi akuba Levi. Hilikiya,+ Zekariya a Jehieli ibasololi baŋanda ya Leza mwini-mwini, bakapa bapaizi zipaizyo zya Pobwe Lyakwiindilila, mbelele ampongo zili 2,600 aŋombe zili 300.
9 Konaniya abanabokwabo ba Semaya a Netaneli antoomwe a Hasabiya, Jeieli a Jozabadi, basilutwe baba Levi, bakasanga kuba Levi zipaizyo zya Pobwe Lyakwiindilila, mbelele ampongo zili 5,000 aŋombe zili 500.
10 Milimo yakabambwa, alimwi bapaizi bakaima mumasena aabo, abalo ba Levi munkamu zyabo+ kweelana ambwaakalailila mwami.
11 Bakajaya zipaizyo zya Pobwe Lyakwiindilila,+ alimwi bapaizi bakasansaila bulowa mbobakatambula kuzwa kuba Levi+ ciindi ba Levi nobakali kufwunda zipaizyo.+
12 Kuzwa waawo, bakabamba zituuzyo zyuumpwa kuti bape bantu boonse ibakali munkamu kweelana aziinga zyabamausyi, kutegwa batuulile Jehova kweelana azilembedwe mubbuku lya Musa; eelyo azyalo ŋombe bakazicita mbubonya oobo.
13 Bakajika* cituuzyo ca Pobwe Lyakwiindilila amulilo kweelana acilengwa;+ eelyo zituuzyo zisalala bakazijika mumipika, mumpoto amumpani, kumane cakufwambaana bakacileta kubantu boonse.
14 Kumane bakabamba zipaizyo zyabo azyabapaizi, nkaambo bapaizi ibalunyungu lwa Aroni bakajisi bubi kutuula zipaizyo zyuumpwa amafwuta kusikila masiku, aboobo ba Levi bakabamba zipaizyo zyabo azyabapaizi ibalunyungu lwa Aroni.
15 Lino baimbi ibana ba Asafu+ bakali mumasena aabo kweelana amalailile aa Davida,+ aa Asafu,+ aa Hemani alimwi aa Jedutuni+ sizilengaano wamwami; abalo balindizi bamilyango bakali mumilyango iindene-indene.+ Tiibakeelede kusiya milimo yabo, nkaambo banabokwabo iba Levi bakababambila zipaizyo.
16 Aboobo mulimo woonse wa Jehova wakabambwa mubuzuba oobo kuti bacite Pobwe Lyakwiindilila+ akutuula zituuzyo zyuumpwa acipaililo ca Jehova kweelana ambwaakalailila Mwami Josiya.+
17 Bana Israyeli ibakajanika aciindi eeco bakacita Pobwe Lyakwiindilila alimwi a Pobwe lya Zinkwa Zitajisi Bumena mazuba aali ciloba.+
18 Tiikwakalinabede Pobwe Lyakwiindilila lili mbuli leeli mu Israyeli kuzwa mumazuba aamusinsimi Samuele; alimwi kunyina mwami uumbi wa Israyeli iwakacita Pobwe Lyakwiindilila lili mbuli leelyo ndyaakacita Josiya,+ bapaizi, ba Levi, ba Juda boonse abana Israyeli ibakajanika alimwi abantu bamu Jerusalemu.
19 Pobwe Lyakwiindilila eeli lyakacitwa mumwaka wa 18 wabulelo bwa Josiya.
20 Nozyakainda zintu zyoonse eezyi, Josiya naakamana kubamba tempele,* Mwami Neko+ wa Egepita wakaboola kulwana ku Karikemesi afwaafwi amulonga wa Firate. Mpoonya Josiya wakaunka kuyoomulwana.+
21 Aboobo Neko wakatuma batumwa kuli Josiya kuyoomwaambila kuti: “Ino ndijisi makani nzi anduwe, Omwami wa Juda? Tiindaboolela kulwana nduwe sunu pe, pele ndaboolela kulwana sinkondoma alimwi Leza wandaambila kuti ndifwambaane. Kuti koyanda kuti zintu zikweendele kabotu, kocileka kukazya Leza ooyo uuli andime, buyo-buyo ulakunyonyoona.”
22 Nokuba boobo Josiya tanaakaleka pe, pele kutegwa amulwane wakalisisa kuti atalizyibyi+ alimwi tanaakaswiilila majwi aa Neko aakazwa kumulomo wa Leza. Aboobo wakaboola kuzoolwana mu Cibanda ca Megido.+
23 Eelyo basimata bakamuyasa Mwami Josiya, mpoonya wakaambila babelesi bakwe kuti: “Amundigwisye okuno nkaambo bandicisa kapati.”
24 Aboobo babelesi bakwe bakamuselusya munkalaki yakwe akumubikka munkalaki yakwe yabili yankondo eelyo bakamutola ku Jerusalemu. Mpoonya wakafwa akuzikkwa mucuumbwe cabamausyi,+ eelyo ba Juda boonse abantu bamu Jerusalemu bakamulila Josiya.
25 Mpoonya Jeremiya+ wakaimba lwiimbo lwabuumba lwakulila Josiya, alimwi baimbi baalumi abamakaintu+ bacimwiimba Josiya munyimbo zyabo zyabuumba* kusikila sunu; alimwi kwakasalwa kuti kaziimbwa mu Israyeli alimwi zililembedwe akati kanyimbo zyabuumba.
26 Makani oonse aakaindi aamba zya Josiya amilimo yakwe yaluyando lutamani kweelana ambokulembedwe mu Mulawo wa Jehova,
27 alimwi anzyaakacita kuzwa kumatalikilo kusikila kumamanino alilembedwe mu Bbuku lya Bami ba Israyeli alimwi aba Juda.+
Bupanduluzi buyungizyidwe
^ Mu Chihebrayo, “bana babantu.”
^ Naa ambweni, “Bakayoka.”
^ Mu Chihebrayo, “ŋanda.”
^ Naa “munyimbo zyabo zyamalila.”
