2 Makani 6:1-42
6 Aciindi eeco Solomoni wakati: “Jehova, wakaamba kuti uyookkala mumudima uusiya mbi.+
2 Lino mebo ndakuyakila ŋanda iisumpukide, busena bugaminide monookkala kukabe kutamani.”+
3 Mpoonya mwami wakacenguluka akutalika kulongezya mbungano yabana Israyeli yoonse, ciindi mbungano yabana Israyeli yoonse noyakaimvwi.+
4 Kumane wakati: “Aatembaulwe Jehova Leza wa Israyeli, ooyo iwakaamba lwakwe mwini kuli Davida taata alimwi kwiinda mumaanza aakwe wazuzikizya ncaakaamba naakati,
5 ‘Kuzwa buzuba nindakagwisya bantu bangu mu Egepita, tandinasalide munzi akati kamisyobo yoonse ya Israyeli kuti ndiyakilwe ŋanda kutegwa zina lyangu lizumanane ooko,+ alimwi tandinasalide muntu kuti abe musololi wabantu bangu bana Israyeli.
6 Pele ndasala Jerusalemu+ kuti zina lyangu lizumanane kukkala ooko, alimwi ndasala Davida kuti asololele bantu bangu bana Israyeli.’+
7 Alimwi Davida taata wakali kuyandisisya mumoyo wakwe kuyaka ŋanda yiitwa azina lya Jehova Leza wa Israyeli.+
8 Pele Jehova wakaambila Davida taata kuti, ‘Wakali kuyandisisya mumoyo wako kuti uyake ŋanda yiitwa azina lyangu, alimwi wakacita kabotu kuyeeya boobo mumoyo wako.
9 Nokuba boobo, toli nduwe uuyooyaka ŋanda yiitwa azina lyangu, pele mwanaako uuyoozyalwa kulinduwe* ngonguwe uutiikayake ŋanda yiitwa azina lyangu.’+
10 Jehova wazuzikizya cisyomezyo ncaakaamba, nkaambo ndanjila mubusena bwa Davida taata alimwi ndakkala acuuno cabwami ca Israyeli+ mbubonya Jehova mbwaakasyomezya.+ Alimwi ndayaka ŋanda yiitwa azina lya Jehova Leza wa Israyeli,
11 alimwi mulinjiyo ndabikka Bbokesi lyacizuminano+ eeco Jehova ncaakapangana abana Israyeli.”
12 Mpoonya wakaima kucipaililo ca Jehova kumbele lyambungano yoonse yabana Israyeli, eelyo wakatambika maanza aakwe.+
13 (Nkaambo Solomoni wakapangide cibumbili camukuba akucibikka akati kalubuwa lwamukati.+ Cakajisi tukokola* tosanwe mubulamfwu, tukokola tosanwe mubwamba alimwi atukokola totatwe kuya mujulu; eelyo wakaima alincico.) Mpoonya wakafwugama kumbele lyambungano yoonse yabana Israyeli, eelyo wakatambika maanza aakwe kujulu,+
14 kumane wakati: “O Jehova Leza wa Israyeli, kunyina Leza uuli mbuli nduwe kujulu naa anyika, uubamba cizuminano akutondezya luyando lutamani kubabelesi bako aabo ibeenda kubusyu bwako camoyo woonse.+
15 Wacibamba cisyomezyo ncookasyomezya mubelesi wako Davida taata.+ Wakasyomezya amulomo wako alimwi sunu wacizuzikizya ajanza lyako.+
16 Aboobo lino O Jehova Leza wa Israyeli, kocizuzikizya cisyomezyo ncookasyomezya mubelesi wako Davida taata nookati: ‘Takukabuli mwaalumi walunyungu lwako uukkala acuuno cabwami ca Israyeli kubusyu bwangu, kufwumbwa buyo kuti bana bako bakabikkile maano kwiinda mukweenda mumulawo wangu+ mbubonya yebo mbowali kweenda kubusyu bwangu.’+
17 Lino akaka O Jehova Leza wa Israyeli, acizuzikizyigwe cisyomezyo ncookasyomezya mubelesi wako Davida.
18 “Pele sena masimpe Leza inga wakkala abantu anyika?+ Bona! Naaba majulu, inzya, mujulu lyamajulu tokonzyi kukkwana;+ aboobo sena inga wakkwana muŋanda eeyi njindayaka?+
19 Lino koswiilila mupailo wangu ndemubelesi wako akulomba kwangu kwakuti undifwide luzyalo, O Jehova Leza wangu, alimwi koswiilila kulila kwangu kwakukombelezya kuti ndigwasyigwe amupailo ooyu ngondipaila sunu kulinduwe ndemubelesi wako.
20 Meso aako kaalangide kuŋanda eeyi syikati amasiku ibusena mbookaamba kuti uyoobikka zina lyako,+ kutegwa uswiilile mupailo wamubelesi wako ngwapaila kalangide kubusena oobu.
21 Alimwi koswiilila mupailo wamubelesi wako wakulomba lugwasyo alimwi akulomba kwabantu bako bana Israyeli nobakomba kujatikizya busena oobu,+ uswiilile kuzwa kubusena bwako ooko nkokkala, nkokuti kujulu;+ inzya, uswiilile akulekelela.+
22 “Ikuti naa muntu wabisizya mweenzinyina mpoonya ooyo ngwaabisizya wamupa kukonka cikonke ciletela kusinganizyigwa,* kumane ooyo sikubisya nacili mucikonke eeco cakusinganizyigwa* waboola kumbele lyacipaililo cako muŋanda eeyi,+
23 uswiilile kujulu akubweza ntaamu alimwi akubeteka babelesi bako kwiinda mukupa sizibi cisubulo kweelana acibi ncaacita,+ akwaamba yooyo uululeme kuti takwe mulandu* alimwi akumupa bulumbu kweelana akululama kwakwe.+
24 “Ikuti naa bantu bako bana Israyeli bazundwa kuli basinkondonyina akaambo kakuti bazumanana kukubisizya,+ mpoonya bapiluka kulinduwe akulemeka zina lyako+ akupaila+ alimwi akukombelezya kuti ubafwide luzyalo muŋanda eeyi,+
25 uswiilile kujulu+ akulekelela cibi cabantu bako bana Israyeli alimwi akubapilusya kunyika eeyo njookabapa balo alimwi abamausyi.+
26 “Iciindi julu nolisinka alimwi nokunyina mvwula+ akaambo kakuti bazumanana kukubisizya,+ mpoonya bapaila kabalangide kubusena oobu akulemeka zina lyako, alimwi ikuti beempwa kuzibi zyabo akaambo kakuti wababombya,*+
27 uswiilile kujulu akulekelela cibi cababelesi bako bana Israyeli, nkaambo uyoobayiisya nzila mbotu njobeelede kutobela;+ alimwi uwisye mvwula+ anyika njookapa bantu bako kuti lube lukono lwabo.
28 “Ikuti naa kwaba nzala mucisi,+ naa cilwazi,+ naa kupya kapati kwamuwo, naa cilwazi cazisyango,+ naa cikwikwi, naa cisozi cinyonyoona;+ ikuti naa basinkondonyina babasinkila muminzi yabo yamucisi*+ naa kwaba cipenzyo cimbi cili coonse naa bulwazi buli boonse,+
29 kufwumbwa mupailo,+ naa kulomba kuli koonse kwakufwidwa luzyalo+ kwamuntu uuli woonse naa kwabantu bako bana Israyeli boonse (nkaambo umwi aumwi ulilizyi penzi lyakwe amacise aakwe)+ ciindi nobatandabika maanza aabo kuŋanda eeyi,+
30 nkokuti uswiilile kujulu kubusena bwako nkokkala,+ alimwi ubalekelele;+ alimwi upe bulumbu kuli umwi aumwi kweelana anzila zyakwe zyoonse, nkaambo uluuzyi moyo wakwe (yebo olikke nduwe wiizyi kabotu myoyo yabantu),+
31 ikutegwa bakuyoowe kwiinda mukweenda munzila zyako mazuba oonse ngobapona anyika njookapa bamatata.
32 “Alimwi kujatikizya muzwamasi uutali umwi wabantu bako bana Israyeli iwaboola kuzwa kucisi cakule akaambo kazina* lyako lipati+ alimwi ajanza lyako lyanguzu alimwi litandabede, eelyo waboola akuzoopaila kalangide kuŋanda eeyi,+
33 uswiilile kujulu, kubusena bwako nkokkala, akumucitila muzwamasi ooyo zyoonse nzyaakulomba kutegwa bantu boonse baanyika balizyibe zina lyako+ akukuyoowa mbubonya mbuli bantu bako bana Israyeli mbobakuyoowa, alimwi akuti bazyibe kuti zina lyako lilaitwa aŋanda eeyi njondayaka.
34 “Ikuti naa bantu bako baunka kunkondo kuyoolwana basinkondonyina ooko nkoobatuma,+ eelyo bapaila+ kulinduwe kabalangide kumunzi ngookasala alimwi akuŋanda njindakayaka akaambo kazina lyako,+
35 nkokuti uswiilile kujulu mupailo wabo akulomba kwabo kwakuti ubafwide luzyalo, alimwi weelede kubabetekela makani.+
36 “Ikuti naa bakubisizya (nkaambo taakwe muntu uutabisyi),+ mpoonya wabakalalila akubaaba kuli basinkondonyina, eelyo basikubasaala babatola mubuzike kucisi cabasinkondonyina, kule naa afwaafwi,+
37 mpoonya baakuliyeeya mucisi eeco nkobakatolwa mubuzike akupiluka kulinduwe akulomba kufwidwa luzyalo mucisi nkobali baange kabati, ‘Twabisya akucita zitaluleme; twacita zintu zibyaabi,’+
38 eelyo bapiluka kulinduwe amyoyo yabo yoonse+ abuumi bwabo boonse mucisi cabuzike+ ooko nkobakatolwa mubuzike, alimwi ikuti bapaila kulinduwe kabalangide kunyika eeyo njookapa bamausyi amunzi ngookasala+ alimwi akuŋanda njondayaka akaambo kazina lyako,
39 uswiilile kujulu kubusena bwako nkokkala, mipailo yabo akulomba kwabo kwakuti ubafwide luzyalo, alimwi ubabetekele makani+ akubalekelela bantu bako ibakakubisizya.
40 “Lino akaka O Leza wangu, meso aako aabone alimwi matwi aako aaswiilile mupailo uupailwa abusena* obuno.+
41 Lino nyamuka O Jehova akunjila mukulyookezya kwako,+ yebo alimwi a Bbokesi lyanguzu zyako. O Jehova Leza, bapaizi bako abasame lufwutuko alimwi bantu bako basyomeka abasekelele akaambo kabubotu bwako.+
42 O Jehova Leza, utamukaki* munanike wako.+ Koluyeeya luyando lwako lutamani kuli Davida mubelesi wako.”+
Bupanduluzi buyungizyidwe
^ Mu Chihebrayo, “mwanaako, ooyo uuyoozwa mucibuno cako.”
^ Kakokola komwe kakaleelene amasentimita aali 44.5. Amubone Makani Aayungizyidwe B14.
^ Naa “ooyo ngwaabisizya wamusinganya.” Nkokuti, cikonke icakajisi cisubulo cakusinganizyigwa ikuti naa muntu wakonka cakubeja naa ikuti tiicazuzikizyigwa.
^ Mu Chihebrayo, “nacili muciimo cakusinganizyigwa.”
^ Mu Chihebrayo, “uliluleme.”
^ Naa “wabapenzya.”
^ Mu Chihebrayo, “mucisi camilyango yabo.”
^ Naa “kampuwo.”
^ Naa “kujatikizya busena.”
^ Mu Chihebrayo, “utafwutatili busyu bwa.”
