2 Makani 9:1-31
9 Lino mwami mukaintu waku Sheba+ wakaimvwa mpuwo ya Solomoni, aboobo wakaboola kuli Solomoni ku Jerusalemu kuti amusunke amibuzyo iikatazya.* Wakaboola abasikumusindikila banji, ankamela zyakanyamwide mafwuta aamabbona, ngolida zinji+ amabwe mayandisi. Wakaunka kuli Solomoni akumwaambila zyoonse izyakali mumoyo wakwe.+
2 Mpoonya Solomoni wakayiingula mibuzyo yakwe yoonse. Kunyina cakamukatazya* Solomoni kupandulwida mwami mukaintu ooyu.
3 Lino mwami mukaintu waku Sheba naakabona busongo bwa Solomoni,+ ŋanda njaakayaka,+
4 zyakulya zyakutebulu lyakwe,+ mbobakali kukkala kutebulu babelesi bakwe, mbobakali kukutauka babelesi basikwaaba zyakulya azisani nzyobakasamide, mbobakali kukutauka babelesi basikwaaba zyakunywa azisani nzyobakasamide alimwi azipaizyo zyuumpwa nzyaakali kutuula lyoonse kuŋanda ya Jehova,+ wakagonkelwa.*
5 Aboobo wakati kumwami: “Mpuwo njondakamvwa kucisi cangu kujatikizya milimo* yako abusongo bwako njamasimpe.
6 Pele nzyondakamvwa tiindakazisyoma kusikila ndaboola akulibonena ameso aangu.+ Lino bona! Nzyondakaambilwa tazisiki akucisela pe kujatikizya busongo bwako butalivwulili.+ Busongo bwako bulainda aampuwo njondakamvwa.+
7 Bali acoolwe bantu bako alimwi bali acoolwe babelesi bako ibaima kumbele lyako lyoonse kabaswiilila busongo bwako!
8 Aatembaulwe Jehova Leza wako iwakukkomanina akukubikka acuuno cakwe cabwami kuti ube mwami wa Jehova Leza wako. Akaambo kakuti Leza wako ulaciyanda cisi cabana Israyeli+ kuti cizumanane kukabe kutamani, wakakusala kuba mwami wancico kuti ubeteke akucita bululami.”
9 Mpoonya mwami mukaintu ooyu wakapa mwami matalenta* aangolida aali 120+ amafwuta aamabbona manji alimwi amabwe mayandisi. Kunyina nokwakaletedwe mafwuta aamabbona manji boobu mbuli yaayo mwami mukaintu waku Sheba ngaakaletela Mwami Solomoni.+
10 Kunze lyaboobo, babelesi ba Hiramu ababelesi ba Solomoni ibakali kuleta ngolida kuzwa ku Ofiri+ bakaleta azisamu zyaalugumi amabwe mayandisi.+
11 Mwami wakapanga matantilo aaŋanda ya Jehova+ alimwi aaŋanda yamwami kuzwa kuzisamu zyaalugumi,+ alimwi atuntimbwa azibelesyo zimbi zyakwiimbya zyabaimbi.+ Zintu zili boobu tiizyakalinabwenwe munyika ya Juda.
12 Mwami Solomoni awalo wakapa mwami mukaintu waku Sheba zyoonse nzyaakali kuyanda alimwi anzyaakalomba, wakamupa zinji kwiinda alizyeezyo* nzyaakaletela mwami. Mpoonya wakapiluka akuunka kucisi cakwe antoomwe ababelesi bakwe.+
13 Lino ngolida iyakali kuboola kuli Solomoni mwaka amwaka yakali kulema matalenta aangolida aali 666,+
14 kunze lyayeeyo iyakali kuletwa abasambazi, basimakwebo abami boonse babana Arabiya alimwi abeendelezi banyika ibakali kuleta ngolida ansiliva kuli Solomoni.+
15 Mwami Solomoni wakapanga ntobo zipati zili 200 zyangolida iisangene alubulo lumbi+ (kuntobo mpati imwi aimwi wakabikka ngolida iisangene alubulo lumbi iilema masyekeli* aali 600)+
16 antobo zyangolida zisyoonto zili 300 (kuntobo nsyoonto imwi aimwi wakabikka ngolida iilema mamaina* otatwe). Mpoonya mwami wakazibikka mu Ŋanda ya Cisaka caku Lebano.+
17 Alimwi mwami wakapanga cuuno cabwami caminyanga icipati akucizilulula angolida iisalalisya.+
18 Kwakali matantilo aakajisi malyatilo aali cisambomwe kusika waawo mpocakabede cuuno cabwami, acilyatilo camaulu cangolida cakalijisilidi kucuuno cabwami, alimwi kwakali zilyookezezyo zyamaboko mumabazu oonse obilo aacuuno alimwi kwakali zikozyanyo zyabasyuumbwa bobilo+ baimvwi mumbali aazilyookezezyo zyamaboko.
19 Alimwi kwakali zikozyanyo zyabasyuumbwa bali 12+ ibakaimvwi mumalyatilo aali cisambomwe, omwe kulubazu lumwi lwamatantilo alimwi aumwi kulubazu lumbi lwamatantilo. Kunyina bwami bumbi bwakacitide cili boobu.
20 Zinywido zyoonse zya Mwami Solomoni zyakali zyangolida, azinywido zyoonse zyamu Ŋanda ya Cisaka caku Lebano zyakali zyangolida iisalalisya. Kunyina cakali cansiliva pe, nkaambo nsiliva tiiyakali kubonwa kuti ncintu mumazuba aa Solomoni.+
21 Nkaambo mato aamwami akali kuunka ku Tarisi+ antoomwe ababelesi ba Hiramu.+ Lyoonse kwainda myaka yotatwe, mato aaku Tarisi akali kuboola kaazwide ngolida, nsiliva, minyanga,+ basokwe alimwi amapiikkokko.
22 Aboobo Mwami Solomoni wakali kubainda bami boonse baanyika buvwubi abusongo.+
23 Alimwi bami boonse baanyika bakali kuyanda kumubona* Solomoni kutegwa bamvwe busongo bwakwe oobo Leza mwini-mwini mbwaakabikka mumoyo wakwe.+
24 Umwi aumwi wakali kuleta cipego—zibelesyo zyansiliva, zibelesyo zyangolida, zisani,+ zilwanyo, mafwuta aamabbona, mabbiza amamyuulu*—alimwi eeci cakali kucitika mwaka amwaka.
25 Solomoni wakalijisi zimpati zyamabbiza zili 4,000 ankalaki alimwi amabbiza* aali 12,000,+ alimwi wakazibikka muminzi yankalaki afwaafwi amwami mu Jerusalemu.+
26 Alimwi wakeendelezya bami boonse kuzwa ku Mulonga* kusikila kunyika yaba Filisiti akumunyinza wa Egepita.+
27 Mwami wakaivwuzya kapati nsiliva mu Jerusalemu cakuti yakaba buyo mbuli mabwe, alimwi azyalo zisamu zyakkedari zyakavwula kapati cakuti zyakaba buyo mbuli zisamu zyamukuyu izili mu Sepela.+
28 Alimwi bakali kuleta mabbiza kuli Solomoni kuzwa ku Egepita+ akuzisi zimbi zyoonse.
29 Lino makani oonse aakaindi aamba zya Solomoni+ kuzwa kumatalikilo kusikila kumamanino, alilembedwe akati kamakani aa Natani+ musinsimi alimwi amubusinsimi bwa Ahija+ muna Silo alimwi amumakani aazilengaano zya Ido+ sizilengaano kujatikizya Jeroboamu+ mwana wa Nebati.
30 Solomoni wakalela bana Israyeli boonse mu Jerusalemu myaka iili 40.
31 Kumane Solomoni wakoona abamausyi. Mpoonya bakamuzikka mu Munzi wa Davida usyi;+ eelyo Rehoboamu mwanaakwe wakaba mwami mubusena bwakwe.+
Bupanduluzi buyungizyidwe
^ Naa “atulabi.”
^ Mu Chihebrayo, “kunyina cakasisidwe.”
^ Mu Chihebrayo, “kunyina muuya wakacili mulinguwe.”
^ Naa “majwi.”
^ Talenta lyomwe lyakali kulema makkilogilamu aali 34.2. Amubone Makani Aayungizyidwe B14.
^ Naa ambweni, “kuyungizya aazipego eezyo.”
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
^ Maina yomwe mu Magwalo aa Chihebrayo yakali kulema magilamu aali 570. Amubone Makani Aayungizyidwe B14.
^ Mu Chihebrayo, “bakayandaula busyu bwa.”
^ Aaba mbanyama bazyalwa ikuti mbongolo yaswaangana abbiza.
^ Naa “abasimabbiza.”
^ Nkokuti, Mulonga wa Firate.
