2 Petro 3:1-18
3 Nobayandwa, oolu lino ndugwalo lwabili ndondimulembela, oomo mbubonya mbuli mulugwalo lwangu lwakusaanguna, mondisensemuna mizeezo yanu mibotu kwiinda mukumuyeezya,+
2 ikutegwa mwiibaluke majwi aakaambwa musyule* abasinsimi basalala alimwi amulawo wa Mwami alimwi Mufwutuli wesu kwiinda mubaapostolo banu.
3 Cakusaanguna, amuzyibe kuti kumazuba aamamanino kuyooboola basikasampusampu akusampaula kwabo, ibayootobela zisusi zyabo beni+
4 kabaamba kuti: “Ino nkuli ikubako kwakwe ooko kwakasyomezyegwa?+ Kayi, kuzwa buzuba bamatata nobakoona mulufwu, izintu zyoonse zyazumanana mbubonya mbozyakabede kuzwa kumatalikilo aazilenge.”+
5 Nkaambo acaali tabakabikkili maano kaambo kakuti kwiinda mujwi lya Leza, ikaindi kwakali majulu alimwi anyika njumu yakasumpwidwe atala aamaanzi alimwi yakazingulukidwe amaanzi;+
6 akuti kwiinda muzintu eezyi inyika yakuciindi eciya yakanyonyoonwa noyakapaizyigwa maanzi aazambangulwe.+
7 Pele kujwi ndimunya eelyo majulu alimwi anyika ziliko lino zyabambilwa mulilo alimwi zyayobolwa kusikila mubuzuba bwalubeta abwalunyonyooko lwabantu basampaula Leza.+
8 Nokuba boobo nobayandwa, mutakalubi kaambo aaka kakuti, buzuba bomwe kuli Jehova* buli mbuli myaka iili cuulu alimwi myaka iili cuulu ili mbuli buzuba bomwe.+
9 Jehova* tamukide pe kujatikizya cisyomezyo+ cakwe kweelana ambobayeeya bamwi kuti wamuka, pele umukkazikila moyo nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa.+
10 Nokuba boobo, buzuba bwa Jehova*+ buyoosika mbuli mubbi,+ eelyo majulu naayooloba amuzuzumo mupati mukulaba kwaliso,+ pele zintu zyakujulu aanyika mbwaanga ziyoopya kapati, ziyakweenzemuka alimwi nyika amilimo iili mumo ziyoobikkwa antangalala.+
11 Mbwaanga zintu eezyi zyoonse ziyakweenzemuka boobu, amuyeeye buyo naa mweelede kuba bantu bali buti mubukkale busalala alimwi amilimo yakubelekela Leza cakulyaaba,
12 nomulindila akuyeeyesya* kusika* kwabuzuba bwa Jehova,*+ eelyo majulu naayoonyonyoonwa mumulilo uuvwilima+ alimwi zintu zyakujulu noziyoonyenguluka akupya kutaambiki!
13 Pele kuli majulu mapya anyika mpya nzyotulindila swebo kweelana acisyomezyo+ cakwe, alimwi muli zyeezyi muyooba bululami.+
14 Aboobo, nobayandwa, mbwaanga nywebo mulindila zintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.+
15 Kuyungizya waawo, amubone kukkazika moyo kwa Mwami wesu kuti ndufwutuko, mbubonya awalo mukwesu uuyandwa Paulo mbwaakamulembela kweelana abusongo mbwaakapegwa,+
16 kaamba zintu eezyi mbubonya mbwacita mumagwalo aakwe oonse. Nokuba boobo, mulingawo kuli zintu zimwi zikatazya kumvwa, alimwi zintu eezyi nzyobapilinganya ibantu aabo batakwe luzyibo* alimwi batakkalikene mbubonya mbobacita Magwalo aambi, cakuti balalinyonyoona beni.
17 Aboobo nywebo nobayandwa, mbomujisi kale luzyibo oolu, amucenjele kutegwa mutaleyi antoomwe ambabo kwiinda mukulubizya kwabantu babi alimwi akuleka kuzyandamana.+
18 Citabi boobo pe, pele amuzumanane kukomena muluzyalo lwa Leza amuluzyibo lwa Mwami a Mufwutuli wesu Jesu Kristo. Kulinguwe akube bulemu lino alimwi mane kukabe kutamani. Ameni.
Bupanduluzi buyungizyidwe
^ Naa “zintu zyakasinsimwa.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “akuyandisisya.” Mu Chigiriki, “akubindaanya.”
^ Mu Chigiriki, “kubako.”
^ Amubone Makani Aayungizyidwe A5.
^ Naa “batayiisyidwe.”
