2 Samuele 10:1-19
-
Kuzunda Amoni a Siriya (1-19)
10 Nokwakainda ciindi mwami wabana Amoni+ wakafwa, eelyo Hanuni mwanaakwe wakaba mwami mubusena bwakwe.+
2 Mpoonya Davida wakati: “Ndilatondezya luyando lutamani kuli Hanuni mwana wa Nahasi mbubonya bausyi mbobakatondezya luyando lutamani kulindime.” Aboobo Davida wakatuma babelesi bakwe kuti bakamuumbulizye akaambo kalufwu lwabausyi. Pele babelesi ba Davida nobakasika munyika yabana Amoni,
3 basilutwe babana Amoni bakaambila Hanuni simalelaabo kuti: “Sena uyeeya kuti Davida ulemeka bauso naakutumina basikukuumbulizya? Sena takuli kuzoolanga-langa munzi akuutwela alimwi akuusaala Davida ncaatumina babelesi bakwe kulinduwe?”
4 Aboobo Hanuni wakajata babelesi ba Davida akubagela cisela camalezu aabo+ akukosola zisani zyabo mpozili akati, nkokuti mumatako akubaleka kuti baunke.
5 Lino Davida naakaambilwa makani aaya, mpoonya aawo wakatuma baalumi kuti bakacinge babelesi bakwe nkaambo bakaluuside kapati; eelyo mwami wakabaambila kuti: “Amukkale mu Jeriko+ kusikila malezu aanu akakomene, mpoonya mukaboole.”
6 Mukuya kwaciindi bana Amoni bakabona kuti baba cintu cinunka nsu kuli Davida, aboobo bana Amoni bakatuma batumwa kuyoobbadela bana Siriya baku Beti-rehobu+ abana Siriya baku Zoba+ kuti babagwasye munkondo. Ooko kwakazwa baalumi bali 20,000 beenda amaulu; alimwi bakabbadela amwami wa Maaka+ ikwakazwa baalumi bali 1,000 ; alimwi ku Isitobu* kwakazwa baalumi bali 12,000.+
7 Davida naakamvwa boobo, wakatuma Joabu ampi yabasikalumamba yoonse, kubikkilizya abasikalumamba bakwe basinguzu kapati.+
8 Lino bana Amoni bakaunka kuyoolibambila nkondo kumulyango wamunzi, kakuli bana Siriya baku Zoba abaku Rehobu antoomwe a Isitobu* aku Maaka, bakali balikke antoomwe mucibanda.
9 Joabu naakabona kuti basinkondonyina bali mukuboola, bamwi kumbele bamwi kusyule, wakasala basikalumamba bacibwene mu Israyeli akubabikka kuti balibambile kulwana bana Siriya.+
10 Baalumi bambi ibakasyaala wakabapa kuli* Abisai+ mwanookwabo kutegwa ababikke antoomwe kuti balibambile kulwana abana Amoni.+
11 Kumane wakati: “Ikuti naa bana Siriya bandiyumine, nkokuti weelede kundivwuna; pele ikuti naa bana Amoni bakuyumine, ndilakuvwuna.
12 Tweelede kuyuma akuba basicamba+ kulwanina bantu besu alimwi aminzi ya Leza wesu, eelyo Jehova ulacita kufwumbwa cibotu mumeso aakwe.”+
13 Mpoonya Joabu abaalumi mbaakali limwi bakaunka kuyoolwana bana Siriya, eelyo bana Siriya bakamutija.+
14 Lino bana Amoni nibakabona kuti bana Siriya batija, abalo bakamutija Abisai akupiluka mumunzi. Kuzwa waawo Joabu wakapiluka kuzwa kubana Amoni akuunka ku Jerusalemu.
15 Lino bana Siriya nobakabona kuti bazundwa abana Israyeli, bakalibunga-bunga alimwi.+
16 Aboobo Hadadezeri+ wakatuma bantu kuyoobaleta bana Siriya ibakali kumbali aa Mulonga,*+ eelyo bakaboola ku Helamu, Sobaki silutwe wampi yabasikalumamba ya Hadadezeri kabasololela.
17 Davida naakaamvwa makani aaya, mpoonya aawo wakabunganya bana Israyeli boonse akuzabuka Jordano akusika ku Helamu. Mpoonya bana Siriya bakalibambila akutalika kulwana Davida.+
18 Pele bana Siriya bakatija kubana Israyeli; alimwi Davida wakajaya bana Siriya basinkalaki bali 700 abasimabbiza bali 40,000, alimwi wakajaya Sobaki silutwe wampi yabo yabasikalumamba, ooyo iwakafwa nkukonya ooko.+
19 Lino bami boonse ibakali babelesi ba Hadadezeri nobakabona kuti bazundwa kubana Israyeli, cakufwambaana bakabamba luumuno abana Israyeli eelyo bakaba balelwa babo;+ aboobo bana Siriya bakayoowa kugwasya bana Amoni alimwi.
Bupanduluzi buyungizyidwe
^ Naa “ku Tobu.”
^ Naa “ku Tobu.”
^ Mu Chihebrayo, “mujanza lya.”
^ Nkokuti, Mulonga wa Firate.
