2 Samuele 13:1-39
13 Lino Abisalomu mwana wa Davida, wakalijisi mwanookwabo musimbi mubotu kapati wazina lya Tamara,+ mpoonya Amunoni+ mwana wa Davida wakamuyanda.
2 Amunoni wakakatazyigwa kapati mumoyo cakuti wakaciswa akaambo ka Tamara mucizyi wakwe, nkaambo wakali nakalindu, alimwi cakali kuboneka kuti tacikonzyeki kuli Amunoni kumucita cintu cili coonse.
3 Lino Amunoni wakajisi mweenzinyina wazina lya Jehonadabu+ mwana wa Simeya+ imwanookwabo a Davida; alimwi Jehonadabu wakali mwaalumi uucenjede kapati.
4 Aboobo wakati kuli Amunoni: “Ino nkaambo nzi yebo omwana wamwami ncousa kapati lyoonse? Sena tokoondaambila?” Amunoni wakamwiingula kuti: “Ndiyanda Tamara, imucizyi+ wamwanookwesu Abisalomu.”
5 Jehonadabu wakati kulinguwe: “Kolala buyo abulo bwako akulicengeezya kuciswa. Bauso baboola kuzookubona, ubaambile kuti, ‘Ndalomba mundaambilile Tamara mucizyi wangu kuti aboole kuzoondipa cakulya. Ikuti naa wandibambila cakulya icibambilwa mulwazi* kandilangilila mpoonya wandilisya, inga ndalya.’”
6 Aboobo Amunoni wakalala akulicengeezya kuciswa, eelyo mwami wakanjila kuyoomubona. Mpoonya Amunoni wakati kumwami: “Ndalomba mundaambilile Tamara mucizyi wangu kuti aboole andipangile zinkwa zyobilo kandilangilila kutegwa andilisye ndemulwazi.”
7 Kumane Davida wakatuma mulomo kuŋanda kuli Tamara wakuti: “Koya kuŋanda yamwanookwanu Amunoni ukamubambile cakulya.”*
8 Aboobo Tamara wakaunka kuŋanda yamwanookwabo Amunoni nkwaakalede. Wakabweza fulaulu akuukanda akupanga zinkwa kalangilila.
9 Kumane wakabweza mpani yakajisi cinkwa akumupa. Pele Amunoni wakakaka kulya akwaamba kuti: “Abazwe bantu boonse!” Aboobo boonse bakazwa.
10 Lino Amunoni wakaambila Tamara kuti: “Koleta cakulya* kuzyuli kutegwa undilisye.” Aboobo Tamara wakabweza zinkwa nzyaakapanga akuzitola kuli Amunoni mwanookwabo kuzyuli.
11 Lino naakamuletela cakulya kuti alye, wakamujata akumwaambila kuti: “Ona andime, omucizyi wangu.”
12 Pele Tamara wakati kulinguwe: “Peepe mwanookwesu! Utandibisizyi, nkaambo eeci cilatondwa mu Israyeli.+ Utaciti cintu eeci cabufwubafwuba.+
13 Ino inga ndakkala buti amasampu aali boobu? Alimwi yebo uyooba mbuli umwi wabaalumi bafwubafwuba mu Israyeli. Lino komwaambila mwami, nkaambo takookukasya kundikwata.”
14 Pele Amunoni tanaakamuswiilila pe, aboobo mukuba aanguzu kwiinda nguwe wakamujata akoona anguwe.
15 Mpoonya Amunoni wakamusula kapati mucizyi wakwe, cakuti lusulo ndwaakaba andulo kulinguwe lwakali lupati kwiinda luyando ndwaakajisi kulinguwe. Kumane Amunoni wakamwaambila kuti: “Nyamuka; koya!”
16 Mpoonya Tamara wakati kulinguwe: “Peepe mwanookwesu, nkaambo kunditanda ooku nkonditanda lino nkubi kapati kwiinda kubisya nkoocita kulindime!” Pele tanaakamuswiilila pe.
17 Mpoonya wakaita mulindizi wakwe akumwaambila kuti: “Komugwisya muntu ooyu kubusyu bwangu, wamana ukkiye kumulyango.”
18 (Lino wakasamide jansi lilibedelede,* nkaambo oobo mbobakali kusama bana bamwami banakalindu.) Aboobo mulindizi wa Amunoni wakamutola anze Tamara akukkiya kumulyango.
19 Mpoonya Tamara wakalilambika mulota mumutwe+ akuzapula jansi lyuubauba ndyaakasamide; alimwi wakalijata kumutwe kayaabweenda kumwi kalila.
20 Abone boobu Abisalomu+ mwanookwabo wakati kulinguwe: “Sena ngu Amunoni mwanookwanu wakujata? Mbubo omucizyi wangu, koumuna buyo. Ooyu mwanookwanu.+ Utaabikki kumoyo makani aaya.” Kumane Tamara wakatalika kukkala alikke kuŋanda ya Abisalomu mwanookwabo.
21 Lino Mwami Davida naakaamvwa makani aaya oonse, wakanyema kapati.+ Pele tanaakali kuyanda kumumvwisya bubi Amunoni mwanaakwe, nkaambo wakali kumuyanda, mbwaanga ngowakali mwanaakwe mutaanzi kuzyalwa.
22 Abisalomu kunyina ncaakaamba kuli Amunoni, cibe cibi naa cibotu; nkaambo Abisalomu wakalimusulide+ Amunoni akaambo kakujata Tamara+ mucizyi wakwe akoona anguwe.
23 Lino nikwakainda myaka yobilo basikugela mbelele ba Abisalomu bakali ku Baala-hazore, kufwaafwi a Efraimu,+ eelyo Abisalomu wakatamba bana basankwa boonse bamwami.+
24 Aboobo Abisalomu wakaboola kumwami akumwaambila kuti: “Mbelele zyangu ndemubelesi wako zili mukugelwa! Ndalomba kuti tuunke anduwe omwami alimwi ababelesi bako.”
25 Pele mwami wakati kuli Abisalomu: “Peepe mwanaangu. Ikuti naa toonse tuunke, tulakuminya.” Nokuba kuti wakazumanana kumukombelezya, tanaakazumina kuunka pe, pele wakamulongezya buyo.
26 Mpoonya Abisalomu wakati: “Ikuti utaunki, nkokuti ndalomba kuti mwanookwesu Amunoni aunke andiswe.”+ Mwami wakamwiingula kuti: “Ino nkaambo nzi ncoyanda kuti aunke anduwe?”
27 Pele Abisalomu wakamukombelezya mwami, aboobo wakamuzumizya Amunoni abana basankwa boonse bamwami kuti baunke anguwe.
28 Mpoonya Abisalomu wakalailila babelesi bakwe kuti: “Mumulangisisye Amunoni akondwa kapati akaambo kawaini, eelyo ndilamwaambila kuti, ‘Amumujaye Amunoni!’ Mpoonya nywebo mumujaye. Mutayoowi pe. Ndime ndamwaambila. Amuyume akuba basicamba.”
29 Aboobo babelesi ba Abisalomu bakacita kuli Amunoni mbubonya mbwaakabalailila Abisalomu; eelyo bana bamwami bamwi boonse bakanyamauka, umwi aumwi wakatanta amyuulu* yakwe akutija.
30 Nobakacili munzila, Davida wakatambula mulumbe wakuti: “Abisalomu wabajaya bana bamwami boonse alimwi kunyina naba omwe wasyaala.”
31 Amvwe boobo mwami wakanyamuka akuzapula zisani zyakwe akwaalabana ansi, eelyo abalo babelesi bakwe bakaliimvwi afwaafwi anguwe kabazapwide zisani zyabo.
32 Nokuba boobo, Jehonadabu+ mwana wa Simeya,+ mwanookwabo a Davida wakati: “Simalelaangu, utayeeyi kuti bana bako balombe boonse bajaigwa pe, ngu Amunoni alikke wafwa.+ Abisalomu ngowalailila kuti ajaigwe+ akaambo kakuti wakali mukanzide kuzwa ciindi naakajata Tamara+ mucizyi wakwe+ akoona anguwe.
33 Lino omwami simalelaangu utaasyomi* makani aakuti, ‘Bana bamwami boonse bafwa’; ngu Amunoni alikke wafwa.”
34 Lino Abisalomu wakatija.+ Kumane mulindizi wamunzi wakatambya meso aakwe, eelyo wakabona bantu banji kababoola kunzila yakali kusyule lyakwe mumbali aacilundu.
35 Mpoonya Jehonadabu+ wakati kumwami: “Bona! Bana bamwami bapiluka. Cacitika mbubonya mbundaamba ndemubelesi wako.”
36 Mbwaakamanina buyo kwaambaula, bana bamwami bakasika akutalika koongolola kulila; mpoonya awalo mwami ababelesi bakwe boonse bakalila kapati.
37 Pele Abisalomu wakatijila kuli Talimai+ mwana wa Amihudi mwami wa Gesuri. Eelyo Davida wakamulila mwanaakwe mazuba manji.
38 Lino Abisalomu naakatija akuunka ku Gesuri,+ wakakkala ooko myaka yotatwe.
39 Kumane Mwami Davida wakayeeya kuswaya Abisalomu, nkaambo buumba bwalufwu* lwa Amunoni bwakalimanide kale.
Bupanduluzi buyungizyidwe
^ Naa “cinkwa cakuumbulizya.”
^ Naa “cinkwa cakuumbulizya.”
^ Naa “cinkwa cakuumbulizya.”
^ Naa “lyeebeka lijisi madeekko.”
^ Ooyu munyama uuzyalwa ikuti mbongolo yaswaangana abbiza.
^ Mu Chihebrayo, “ataabikki mumoyo wakwe.”
^ Naa “wakaumbulizyigwa akaambo kalufwu.”
