2 Samuele 15:1-37
15 Lino nozyakainda zintu zyoonse eezyi, Abisalomu wakaba ankalaki akulijanina mabbiza abaalumi bali 50 ibakali kuzuza kumbele lyakwe.+
2 Abisalomu wakali kubuka mafwumofwumo akwiima kumbali aanzila kumulyango wamunzi.+ Lino kufwumbwa muntu wakajisi makani iwakali kuboola kumwami kuti amubetekele,+ Abisalomu wakali kumwiita akumubuzya kuti: “Ino wazwa kumunzi nzi?” Mpoonya wakali kwaamba kuti: “Ndemubelesi wako ndazwa kuli umwi waminzi yamisyobo ya Israyeli.”
3 Mpoonya Abisalomu wakali kumwaambila kuti: “Bona, makani aako ali kabotu alimwi aliluleme, pele taakwe uuliko kumwami uukonzya kukuswiilila.”
4 Alimwi Abisalomu wakali kwaamba kuti: “Nicali kabotu nindalisalidwe kuba mubetesi mucisi eeci! Mpoonya kufwumbwa muntu uujisi makani naa kaambo, naali kuboola kulindime eelyo nindali kubona kuti wabetekelwa cabululami.”
5 Kuti naa muntu waswena afwaafwi anguwe kuti amukotamine, Abisalomu wakali kumujata akumumyonta.+
6 Abisalomu wakali kucita mbubonya oobu kubana Israyeli boonse ibakali kuboola kumwami kuzoobetekelwa makani; aboobo Abisalomu wakazumanana koongelezya myoyo yabana Israyeli.+
7 Lino niyakamana myaka yone,* Abisalomu wakati kumwami: “Ndalomba kuti undizumizye kuunka ku Hebroni+ kutegwa ndikazuzikizye cikonke ncondakakonka kuli Jehova.
8 Nkaambo mebo ndemubelesi wako ndakakonkezya+ nindakali kukkala ku Gesuri+ ku Siriya kuti: ‘Ikuti naa Jehova akandipilusye ku Jerusalemu, ndiyoopa cituuzyo kuli* Jehova.’”
9 Aboobo mwami wakamwaambila kuti: “Koya muluumuno.” Eelyo wakanyamuka akuunka ku Hebroni.
10 Lino Abisalomu wakatuma basikutwela kumisyobo yoonse ya Israyeli akubaambila kuti: “Mwamvwa buyo mweembo walila, mwaambilizye kuti, ‘Abisalomu waba mwami mu Hebroni!’”+
11 Bantu ibakaunka antoomwe a Abisalomu kuzwa ku Jerusalemu bakali 200 ; bakatambwa akuunka kabatazyi cakali kucitika.
12 Kunze lyaboobo, naakatuula zipaizyo Abisalomu wakatuma bantu kuyakwiita Ahitofeli+ muna Gilo, sikulaya wa Davida,+ kuzwa kumunzi wakwe wa Gilo.+ Lino bantu ibakamusangana Abisalomu mukuzangila mwami bakali kuyaabuvwula.+
13 Mukuya kwaciindi kwakaboola muntu wakaambila Davida kuti: “Myoyo yabana Israyeli yaunka kuli Abisalomu.”
14 Mpoonya aawo Davida wakaambila babelesi bakwe boonse mbaakali limwi mu Jerusalemu kuti: “Atunyamuke tutije,+ nkaambo taakwe utiifwutuke kuli Abisalomu! Atufwambaane, buyo-buyo ulatweenzya akutucitila cibi akunyonyoona munzi apanga!”+
15 Eelyo babelesi bamwami bakaingula kuti: “Kufwumbwa mwami simaleleesu ncaasala kucita, tulilibambilide kucicita tobabelesi bako.”+
16 Aboobo mwami wakaunka abamuŋanda yakwe boonse kabamutobela, pele mwami wakasiya buyo bamwanakasuwa bakwe bali kkumi+ kuti balanganye ŋanda.*
17 Lino mwami wakazumanana mulweendo lwakwe abantu boonse kabamutobela, mpoonya bakaima ku Beti-mehaki.
18 Lino babelesi bakwe boonse mbaakanyamuka limwi* abana Kereti boonse, bana Peleti+ boonse abana Gati+ boonse, baalumi bali 600 ibakamutobela* kuzwa ku Gati+ bakali kuzabuka kubusyu bwamwami.
19 Mpoonya mwami wakaambila Itai+ muna Gati kuti: “Ino yebo ututobelela nzi? Kopiluka ukakkale amwami mupya, nkaambo uli muzwamasi, alimwi wakatija buya kuzwa kucisi cokwanu.
20 Wakaboola jilo, aboobo sena sunu inga ndakucita kuti ube simutuntuli antoomwe andiswe akuti utalike kunditobela ciindi ndayanda kuunka alimwi ankondeelede kuunka? Kopiluka akutolelezya banabokwanu, alimwi Jehova aatondezye luyando lutamani akusyomeka kulinduwe!”+
21 Pele Itai wakati kumwami: “Masimpe mbubonya Jehova mbwali muumi alimwi mbubonya anduwe omwami simalelaangu mboli muumi, kufwumbwa kubusena nkoya kuba omwami simalelaangu, kofwide naa koli muumi, nkukonya ooko andime nkondiya kuba!”+
22 Amvwe boobo Davida wakaambila Itai+ kuti: “Mbubo, koinda.” Aboobo Itai muna Gati wakazabuka antoomwe abaalumi bakwe boonse alimwi abana.
23 Lino bantu boonse mumunzi bakali koongolola kulila ciindi bantu aaba boonse nobakali kuzabuka kalonga, eelyo mwami wakaliimvwi afwaafwi a Kkuti lya Kidroni;+ bantu boonse bakali kuzabukila kunzila iiya kunkanda.
24 Zadoki+ awalo wakaliko antoomwe aba Levi+ boonse kabanyamwide bbokesi lyacizuminano+ ca Leza mwini-mwini;+ bakabikka Bbokesi lya Leza mwini-mwini ansi; kumane Abiyatara+ wakaunka ciindi bantu boonse nobakali kwiinda kuzwa mumunzi.
25 Pele mwami wakaambila Zadoki kuti: “Bweza Bbokesi lya Leza mwini-mwini ulipilusye kumunzi.+ Ikuti Jehova akandifwide luzyalo, uyoondipilusya alimwi kutegwa ndikalibone akubona mpolikkala.+
26 Pele ikuti akandaambile kuti, ‘Tiindakukkomanina,’ nkokuti aacite kufwumbwa cimubotela mumeso aakwe.”
27 Mwami wakaambila Zadoki mupaizi kuti: “Tee uli muntu uubona zyakumbele?+ Kopiluka kumunzi muluumuno, alimwi mubwezelezye abana banu bobilo, Ahimaazi mwanaako a Jonatani+ mwana wa Abiyatara.
28 Bona, ndiyoolindila azito zili afwaafwi ankanda kusikila ndikamvwe makani kuzwa kulinduwe.”+
29 Aboobo Zadoki a Abiyatara bakalipilusya Bbokesi lya Leza mwini-mwini ku Jerusalemu akukkala nkukonya ooko.
30 Davida naakali kuyaabutanta Cilundu ca Maolifa,+ wakali kuyaabulila; kumutwe wakalilivwumbide alimwi wakali kuyaabweenda katasamide mpato. Bantu boonse mbaakali limwi abalo bakalivwumba kumitwe yabo alimwi bakali kuyaabulila nobakali kuyaabutanta cilundu.
31 Mpoonya Davida wakaambilwa kuti: “Ahitofeli awalo uli akati kabaabo bamvwana a Abisalomu+ mukukuzangila.”+ Mpoonya Davida wakati: “O Jehova,+ kopa kuti lulayo lwa Ahitofeli lube mbuli lulayo lwamufwubafwuba!”+
32 Lino Davida naakasika atala aacilundu ooko bantu nkobakali kukombela Leza, Husai+ muna Ariki+ wakaliko ooko kuyoomuswaanganya kazapawide jansi lyakwe alimwi wakali avwu mumutwe.
33 Nokuba boobo Davida wakamwaambila kuti: “Ikuti unditobele, ulandibeda buyo mukuli.
34 Pele ikuti naa uunke kumunzi akwaambila Abisalomu kuti, ‘Ndili mubelesi wako, O Mwami. Ndakali mubelesi wabauso aciindi eciya, pele lino ndili mubelesi wako,’+ eelyo uyoondigwasya kunyonganya lulayo lwa Ahitofeli.+
35 Ooko uyooba antoomwe a Zadoki a Abiyatara ibapaizi. Weelede kumwaambila Zadoki a Abiyatara ibapaizi zyoonse nzyoyoomvwa kuzwa kuŋanda yamwami.+
36 Bona! Bali antoomwe abana babo, Ahimaazi+ mwana wa Zadoki a Jonatani+ mwana wa Abiyatara, aboobo kwiinda mulimbabo mukandaambile kufwumbwa ncomuyoomvwa.”
37 Aboobo Husai mweenzinyina wa Davida+ wakaunka mumunzi ciindi Abisalomu naakali kunjila mu Jerusalemu.
Bupanduluzi buyungizyidwe
^ Naa ambweni, “myaka iili 40.”
^ Naa “ndiyookomba.” Mu Chihebrayo, “ndiyoobelekela.”
^ Naa “ŋanda yamwami.”
^ Naa “ibakali kuzabuka kulubazu lwakwe.”
^ Nkokuti, Itai iwaambwa mukapango 19.
