2 Samuele 16:1-23
16 Lino Davida naakaindilila asyoonto mpocili atala eeni cilundu,+ Ziba+ mubelesi wa Mefiboseti+ wakaboola kuzoomuswaanganya kajisi mbongolo zyobilo izyakanyamwide zinkwa izili 200 azibbuubbu zyamisaansa miyumu izili 100 azinkwa izili 100 zyamicelo* yacilimo alimwi anongo mpati yawaini.+
2 Mpoonya mwami wakati kuli Ziba: “Ino waziletela nzi zintu eezyi?” Eelyo Ziba wakaingula kuti: “Imbongolo nzyabamuŋanda yamwami kuti kababelesya, eelyo zinkwa amicelo yacilimo nzyabalombwana kuti kabalya, mpoonya waini ngwabaabo ibakatala munkanda kuti banywe.”+
3 Kumane mwami wakamubuzya kuti: “Ino mwana* wasimalelaako+ uli kuli?” Mpoonya Ziba wakati: “Ulikkede mu Jerusalemu, nkaambo wakati, ‘Sunu bana Israyeli balandipilusizya bwami bwabataata.’”+
4 Eelyo mwami wakati kuli Ziba: “Bona! Zintu zya Mefiboseti zyoonse nzizyako.”+ Ziba wakati: “Ndakotama ansi kubusyu bwako. Andijane luzyalo mumeso aako omwami simalelaangu.”+
5 Mwami Davida naakasika ku Bahurimu, kwakaboola mwaalumi umwi wamumukwasyi wa Saulo wazina lya Simeyi,+ imwana wa Gera. Wakaboola kazyaabusinganya.+
6 Wakali kufwusa Davida mabwe akubabelesi boonse ba Mwami Davida akubantu boonse alimwi akubaalumi basinguzu ibakali kululyo akulumwensyi lwakwe.
7 Ngaaya majwi Simeyi ngaakali kwaamba naakali kusinganya mwami: “Kozwa, kozwa, yebo osikutila bulowa! Omwaalumi wabuyo!
8 Jehova wakupilusizya mulandu woonse wakutila bulowa bwamukwasyi wa Saulo, ooyo ngookanyanga bwami, pele Jehova wapa bwami mumaanza aamwanaako Abisalomu. Lino mapenzi akusikila nkaambo uli sikutila bulowa!”+
9 Mpoonya Abisai mwana wa Zeruya+ wakati kumwami: “Ino nkaambo nzi mubwa ooyu uufwide+ ncasinganya mwami simalelaangu?+ Amuleke nduunke ndikamukosole mutwe.”+
10 Pele mwami wakati: “Ino makani aaya amujatikizya buti nywebo nobana ba Zeruya?+ Amumuleke andisinganye,+ nkaambo ngu Jehova wamwaambila kuti,+ ‘Komusinganya Davida!’ Alimwi ino nguni uunga wamwaambila kuti, ‘Ino ucitila nzi boobu?’”
11 Eelyo Davida wakati kuli Abisai ababelesi bakwe boonse: “Ikuti mwanaangu ngundakalizyalila uyandaula buumi bwangu,+ sena muna Benjamini+ inga takokwiinda kucita oobo? Amumuleke andisinganye, nkaambo Jehova nguwamwaambila!
12 Ambweni sunu Jehova ulaabona mapenzi aangu+ alimwi Jehova ulandipilusizya bubotu muciindi cakusinganizyigwa nkondasinganizyigwa sunu.”+
13 Mpoonya Davida abaalumi mbaakali limwi bakazumanana kweenda munzila, eelyo walo Simeyi wakali kweendela mumbali aacilundu kumbali lya Davida kumwi kasinganya+ akufwusa mabwe amavwu manji.
14 Mukuya kwaciindi mwami abantu boonse mbaakali limwi bakasika nkobakali kuunka kabakatede, mpoonya bakalyookezya.
15 Lino Abisalomu abaalumi boonse bana Israyeli bakasika mu Jerusalemu, alimwi Ahitofeli+ wakali anguwe.
16 Lino Husai+ muna Ariki,+ mweenzinyina wa Davida naakasika kuli Abisalomu wakati: “Aaongole mwami!+ Aaongole mwami!”
17 Abisalomu wakati kuli Husai: “Sena oolu ndoluyando lutamani ndotondezya kumweenzinyoko? Ino wakalekela nzi kuunka anguwe?”
18 Aboobo Husai wakati kuli Abisalomu: “Peepe, ndili kulubazu lwayooyo iwasalwa a Jehova, abantu aaba alimwi abana Israyeli boonse. Ndiyookkala anguwe.
19 Alimwi ndaamba kuti, Ino nguni ngondeelede kubelekela? Sena tali mwanaakwe? Mbubonya mbondakali kubelekela bauso, ndiyookubelekela anduwe.”+
20 Kumane Abisalomu wakati kuli Ahitofeli: “Ndipe maano.*+ Ino tulacita buti?”
21 Mpoonya aawo Ahitofeli wakati kuli Abisalomu: “Koona abamwanakasuwa+ bauso, aabo mbaakasiya kuti balanganye ŋanda.*+ Eelyo bana Israyeli boonse bayoomvwa kuti wacita cintu capa kuti ube cintu cinunka nsu kuli uso, mpoonya aabo boonse mboli limwi bayooyumizyigwa.”
22 Aboobo bakabambila Abisalomu tente atala aaciluli,+ eelyo Abisalomu wakoonana abamwanakasuwa bausyi+ kabalangilila bana Israyeli boonse.+
23 Mumazuba aayo, lulayo ndwaakali kupa Ahitofeli+ lwakali kubonwa mbuli kuti ndijwi lya Leza mwini-mwini. Oobu mbombubo lulayo loonse lwa Ahitofeli mbolwakali kulemekwa a Davida alimwi a Abisalomu.
Bupanduluzi buyungizyidwe
^ Ikapati nkuyu alimwi ambweni atukunka.
^ Naa “muzyukulu.”
^ Naa “lulayo.”
^ Naa “ŋanda yamwami.”
