2 Samuele 18:1-33
18 Mpoonya Davida wakabala baalumi mbaakali limwi akubabikkila basilutwe babantu bali zyuulu abasilutwe babantu bali myaanda.+
2 Kuyungizya waawo, Davida wakatuma cipaanzi catatu cabaalumi kabasololelwa a Joabu,+ cipaanzi catatu cabantu kabasololelwa a Abisai+ mwana wa Zeruya,+ mwanookwabo a Joabu, alimwi acipaanzi catatu kabasololelwa a Itai+ muna Gati. Mpoonya mwami wakaambila baalumi aaba kuti: “Andime ndilaunka antoomwe andinywe.”
3 Pele bakati: “Toyelede kuunka pe,+ nkaambo ikuti tukatije tabakatubikkili maano;* alimwi ikuti cisela cesu tukafwe, tabakatubikkili maano nkaambo yebo uleelene abantu bali 10,000 bali akati kesu.+ Aboobo inga cainda kubota kuti watutumina buyo lugwasyo kuzwa kumunzi.”
4 Mwami wakati kulimbabo: “Ndilacita kufwumbwa ncomubona kuti ncibotu mumeso aanu.” Eelyo mwami wakaima kumbali aamulyango wamunzi, kumane baalumi boonse bakaunka munkamu zyabantu bali 100 ankamu zyabantu bali 1,000.
5 Kumane mwami wakalailila Joabu, Abisai a Itai kuti: “Mumulanganye kabotu mulombwana Abisalomu akaambo kandime.”+ Baalumi boonse bakalimvwide mwami naakali kulailila basilutwe boonse kujatikizya Abisalomu.
6 Baalumi bakaunka musyokwe kuyooswaangana abana Israyeli, eelyo nkondo yakabeda mucisaka ca Efraimu.+
7 Ooko bana Israyeli+ bakazundwa kubabelesi ba Davida+ alimwi buzuba oobo kwakajaigwa bantu banji–baalumi bali 20,000.
8 Nkondo yakamwaika mucisi coonse. Alimwi bantu ibakafwida mucisaka bakali banji kwiinda bantu bakajaigwa apanga buzuba oobo.
9 Mpoonya Abisalomu wakaswaangana ababelesi ba Davida. Abisalomu wakatantide amyuulu,* eelyo myuulu eeyo yakainda munsi aamitabi iivwavwabede yacisamu cipati, kumane masusu aakwe akajatwa mucisamu aboobo wakatalika kulengelela mujulu,* pele myuulu njaakatantide yakaindilila.
10 Mpoonya muntu umwi wakamubona eelyo wakaambila Joabu kuti:+ “Ndamubona Abisalomu kalengelela mucisamu cipati.”
11 Joabu wakati kumwaalumi ooyo iwakamulwiida makani: “Ikuti naa wamubona, ino walekela nzi kumujaya mpoonya aawo akumulosezya ansi? Eelyo nindakupa mali aansiliva aali 10 alutambo.”
12 Pele mwaalumi wakaambila Joabu kuti: “Nokuba kuti inga ndapegwa* mali aansiliva aali 1,000, tandikonzyi kutandabika janza lyangu kujaya mwana wamwami pe, nkaambo toonse twakalimvwide mwami naakamulailila, yebo, Abisai a Itai kuti, ‘Kufwumbwa naa nduwe ni, umulanganye mulombwana Abisalomu.’+
13 Ikuti nindataatobela malailile aaya akumujaya,* mwami naazyiba alimwi yebo niwatandivwuna pe.”
14 Kumane Joabu wakati: “Nditasowi aciindi kwaambaula anduwe!” Aboobo wakabweza masumo* otatwe mujanza lyakwe akuyasa Abisalomu kumoyo eelyo naakacili muumi mucisamu cipati.
15 Mpoonya babelesi bali kkumi basikunyamwida Joabu zilwanyo bakaboola akuyasa Abisalomu kusikila wafwa.+
16 Lino Joabu wakalizya mweembo eelyo baalumi bakapiluka kukutandaanya bana Israyeli, aboobo Joabu wakabalesya bantu.
17 Kumane bakamubweza Abisalomu akumusowela mucilindi cipati icili mucisaka akulundika mulwi mupati wamabwe atala lyakwe.+ Mpoonya bana Israyeli boonse bakatija akuya mumaanda aabo.
18 Lino Abisalomu naakacili muumi wakabweza musemu akuwiimika mu Kkuti* lya Mwami,+ nkaambo wakayeeya kuti: “Tandijisi mwana musankwa uuyoopa kuti zina lyangu kaliyeeyegwa.”+ Aboobo musemu ooyo wakawuulika zina lyakwe mwini, alimwi uciitwa kuti Musemu wa Abisalomu kusikila sunu.
19 Lino Ahimaazi+ mwana wa Zadoki wakati: “Amuleke ndizuzaane kuyakwaambila mwami makani aaya, nkaambo Jehova wamubetekela makani akumuvwuna kumaanza aabasinkondonyina.”+
20 Pele Joabu wakati kulinguwe: “Sunu toyelede kuba sikutola mulumbe pe. Uyakuutola buzuba bumbi, pele sunu utaciti oobo pe, nkaambo mwana wamwami wafwa.”+
21 Mpoonya Joabu wakaambila muna Kusi+ kuti: “Koya ukaambile mwami ncoobona.” Eelyo muna Kusi wakakotama kuli Joabu amane wakazuza.
22 Kumane Ahimaazi mwana wa Zadoki alimwi wakati kuli Joabu: “Lino akaka, kufwumbwa naa ncinzi citiicitike, kondileka andime ndizuze kutobela muna Kusi.” Nokuba boobo Joabu wakati: “Ino nkaambo nzi mwanaangu ncoyanda kuti ayebo uzuze kakuli kunyina mulumbe wakuti utole?”
23 Pele alimwi wakati: “Lino akaka, kufwumbwa naa ncinzi citiicitike, kondileka ndizuze.” Aboobo Joabu wakati kulinguwe: “Kozuza!” Eelyo Ahimaazi wakazuza munzila iigama kucooko ca Jordano,* mane wakaakumwiindilila muna Kusi.
24 Lino Davida wakakkede akati kamilyango yobilo yamunzi,+ eelyo mulindizi+ wakatanta aciluli cabwaanda buli kumulyango. Wakalanga, akubona mwaalumi kazyaabuzuza alikke.
25 Aboobo mulindizi wakaita mwami akumwaambila. Mwami wakati: “Ikuti naa uli alikke, nkokuti waleta mulumbe.” Naakali kuzyaabuswena afwaafwi,
26 mulindizi wakabona mwaalumi aumbi kazyaabuzuza. Mpoonya mulindizi wakaita mulindizi wakumulyango akumwaambila kuti: “Bona! Aumbi mwaalumi uzyaabuzuza alikke!” Eelyo mwami wakati: “Awalo ooyu ngusikuleta mulumbe.”
27 Mulindizi wakati: “Ndabona kuti mwaalumi wakusaanguna uzuza mbuli Ahimaazi+ mwana wa Zadoki,” eelyo mwami wakati: “Ooyu mwaalumi mubotu, alimwi uleta mulumbe mubotu.”
28 Mpoonya Ahimaazi wakaita akwaambila mwami kuti: “Ndijisi mulumbe mubotu!” Kumane wakavwuntama ansi kumwami. Eelyo wakati: “Aatembaulwe Jehova Leza wako, iwaaba baalumi ibakazangila* mwami simalelaangu!”+
29 Nokuba boobo mwami wakati: “Sena zyoonse zili kabotu kumulombwana Abisalomu?” Eelyo Ahimaazi wakati: “Ndabona lupyopyongano ciindi Joabu naatuma mubelesi wako andime, pele tiindazyiba cali kucitika.”+
30 Aboobo mwami wakati: “Imina kumbali ooku.” Eelyo wakaswena kumbali akwiima aawo.
31 Mpoonya awalo muna Kusi wakasika,+ eelyo wakati: “Koutambula mulumbe ooyu omwami simalelaangu: Sunu Jehova wakubetekela makani akukuvwuna kumaanza aabantu boonse ibakakuzangila.”+
32 Pele mwami wakabuzya muna Kusi kuti: “Sena zyoonse zili kabotu kumulombwana Abisalomu?” Eelyo muna Kusi wakati: “Basinkondonyoko omwami simalelaangu abantu boonse ibakakuzangila kuti bakubisizye ababe mbubonya mbuli mulombwana ooyo.”+
33 Eeci cakamunyonganya mwami, eelyo wakatanta kukaanda kaaciluli kali atala aamulyango akutalika kulila. Lino mboobu mbwaakali kwaamba naakali kweenda: “Mwanaangu Abisalomu, mwanaangu, mwanaangu Abisalomu! Nikwafwa buyo ndime mubusena bwako, Abisalomu mwanaangu, mwanaangu!”+
Bupanduluzi buyungizyidwe
^ Mu Chihebrayo, “tabakabikki moyo kulindiswe.”
^ Ooyu munyama uuzyalwa ikuti mbongolo yaswaangana abbiza.
^ Mu Chihebrayo, “akati kajulu anyika.”
^ Mu Chihebrayo, “mumaanza aangu ndapiminwa.”
^ Naa “Ikuti buumi bwakwe nindabucitila calweeno.”
^ Naa ambweni, “mivwi; myuumba.” Mu Chihebrayo, “mingwala.”
^ Naa “Cibanda.”
^ Mu Chihebrayo, “iigama kucooko.”
^ Mu Chihebrayo, “ibakatambika maanza aabo kuzangila.”
