2 Samuele 19:1-43
19 Lino Joabu wakaambilwa kuti: “Mwami ulalila, alimwi taleki kumulila Abisalomu.”+
2 Aboobo buzuba oobo luzundo* lwakasanduka kuba malila kubantu boonse, nkaambo bakamvwa kuti mwami wakali kulila mwanaakwe.
3 Mubuzuba oobo bantu bakapiluka mumunzi+ cakaumuumu mbuli bantu bafwide nsoni akaambo kakuti bakatija kunkondo.
4 Mwami wakalivwumba kumeso, alimwi wakazumanana koongolola kulila kati: “Maawe mwanaangu Abisalomu! Abisalomu mwanaangu, mwanaangu!”+
5 Mpoonya Joabu wakaunka kuŋanda yamwami akumwaambila kuti: “Sunu wabausya nsoni babelesi bako boonse, aabo sunu ibavwuna buumi bwako, bwabana bako basankwa+ abasimbi,+ bwabamakaintu bako alimwi abwabamwanakasuwa bako.+
6 Uyanda baabo bakusulide akusula baabo bakuyanda, nkaambo wacisalazya sunu kuti basilutwe ababelesi bako tabakwe mpindu kulinduwe, nkaambo ndili masimpe kuti, ikuti sunu Abisalomu naali muumi mpoonya swebo toonse tobamwi katufwide, nicabota mumeso aako.
7 Lino konyamuka uunke ukaumbulizye* babelesi bako, nkaambo ndakonka kwiinda muli Jehova kuti, ikuti utaunki, taakwe mwaalumi naba omwe uutiisyaale anduwe sunu masiku. Alimwi eeci cilakubijila kapati kwiinda mapenzi oonse aakakucitikila kuzwa nookacili mwana kusikila sunu.”
8 Aboobo mwami wakanyamuka akukkala kumulyango wamunzi, eelyo bantu boonse bakaambilwa kuti: “Imwami ulikkede kumulyango wamunzi.” Mpoonya bantu boonse bakaboola kumwami.
Pele bana Israyeli ibakali kulubazu lwa Abisalomu bakalitijide kale umwi aumwi kuya kuŋanda yakwe.+
9 Bantu boonse mumisyobo yoonse ya Israyeli bakali kukazyanya kabati: “Mwami wakatuvwuna kuli basinkondoma+ alimwi wakatuvwuna akuba Filisiti; pele lino watija kuzwa mucisi akaambo ka Abisalomu.+
10 Awalo Abisalomu ooyo ngotwakananika kuti abe mwami wesu,+ wafwa munkondo.+ Aboobo ino nkaambo nzi ncomuumwine buyo akutamupilusya mwami?”
11 Mwami Davida wakatumina mulumbe ooyu kuli Zadoki+ a Abiyatara+ ibapaizi wakuti: “Amwaambile baalu bamu Juda+ kuti, ‘Ino nkaambo nzi nywebo ncomwamuka kupilusya mwami kuŋanda yakwe kakuli majwi aabana Israyeli boonse asika nkwabede?
12 Nywebo muli banabokwesu; muli zifwuwa zyangu anyama yangu.* Ino nkaambo nzi ncomwamuka kupilusya mwami?’
13 Alimwi mumwaambile Amasa+ kuti, ‘Sena toli zifwuwa zyangu anyama yangu? Aboobo Leza andisubule ikuti naa tokabi silutwe wampi yabasikalumamba bangu kuzwa sunu mubusena bwa Joabu.’”+
14 Eelyo wakazula* myoyo yaba Juda boonse akubapa kuti bakamantane, aboobo bakatumina mwami mulumbe wakuti: “Kopiluka antoomwe ababelesi bako boonse.”
15 Lino mwami wakatalika kupiluka mane wakasika ku Jordano, alimwi bantu baku Juda bakaboola ku Giligala+ kuti bamucinge mwami akumusindikila kuti azabuke Jordano.
16 Mpoonya Simeyi+ mwana wa Gera, muna Benjamini iwaku Bahurimu, wakafwambaana kuunka antoomwe aba Juda kuyoocinga Mwami Davida,
17 alimwi wakali antoomwe abaalumi bali 1,000 kuzwa kubana Benjamini. Awalo Ziba+ mubelesi wamuŋanda ya Saulo abana bakwe bali 15 alimwi ababelesi bakwe bali 20, bakacikonzya kufwambaana kusika ku Jordano mwami katanasika.
18 Aboobo wakazabuka* acito kuti akazabusye basiŋanda bamwami akucita kufwumbwa nzyaakali kuyanda. Pele Simeyi mwana wa Gera wakavwuntama ansi kubusyu bwamwami ciindi naakali kuyanda kuzabuka Jordano.
19 Kumane wakati kumwami: “Utandipi mulandu simalelaangu alimwi utayeeyi cibi ncindakakucitila ndemubelesi wako+ buzuba buya nookazwa mu Jerusalemu. Mwami atacibikki kumoyo pe,
20 nkaambo mebo ndemubelesi wako ndilizyi kuti ndime ndakabisya; aboobo sunu ndime ndasaanguna kuboola akati kabamuŋanda ya Josefa kuzoocinga mwami simalelaangu.”
21 Mpoonya aawo Abisai+ mwana wa Zeruya+ wakati: “Sena Simeyi teelede kujaigwa akaambo kamakani aaya, nkaambo wakasinganya munanike wa Jehova?”+
22 Pele Davida wakati: “Ino makani aaya amujatikizya buti nywebo nobana ba Zeruya+ ikuti mutalike kundibukila sunu? Sena kuli weelede kujaigwa sunu mu Israyeli? Sena tandizyi kuti sunu ndili mwami mu Israyeli?”
23 Mpoonya mwami wakati kuli Simeyi: “Tokoofwa pe.” Eelyo mwami wakakonka kulinguwe.+
24 Mefiboseti+ muzyukulu wa Saulo awalo wakaboola kuzoobona mwami. Tanaakali kusamba kumaulu, kugela cilezu cakwe nokuba kuwasya zisani zyakwe kuzwa buzuba mwami naakaunka kusikila buzuba naakapiluka muluumuno.
25 Naakasika ku* Jerusalemu kuzooswaangana amwami, mwami wakati kulinguwe: “Mefiboseti, ino nkaambo nzi ncootakaunka andime?”
26 Eelyo walo wakati: “Omwami simalelaangu, mubelesi wangu+ wakandeena. Nkaambo mebo ndemubelesi wako ndakamwaambilide kuti, ‘Leka ndibweze mbongolo yangu kutegwa nditante akuunka antoomwe amwami,’ mbwaanga ndili mulema.+
27 Pele wakandibejekezya ndemubelesi wako. Nokuba boobo yebo omwami simalelaangu+ uli mbuli mungelo wa Leza mwini-mwini, aboobo kocita kufwumbwa cibotu mumeso aako.
28 Iŋanda yataata yoonse niyakanyonyoonwa amwami simalelaangu, pele mebo ndemubelesi wako wakandibikka kuba akati kabaabo balida atebulu lyako.+ Aboobo ino ncinzi acimbi ncondikonzya kulilila kumwami?”
29 Nokuba boobo mwami wakamwaambila kuti: “Nkaambo nzi ncocizumanana kwaamba boobu? Ndaamba kale kuti, yebo a Ziba mweelede kuwaabana muunda.”+
30 Kumane Mefiboseti wakaambila mwami kuti: “Kaubweza buyo woonse, mbwaanga mwami simalelaangu waboola kuŋanda yakwe muluumuno.”
31 Mpoonya Barizilai+ muna Gileadi awalo wakaboola kuzwa ku Rogelimu kutegwa asindikile mwami ku Jordano.
32 Barizilai wakalicembeede kapati, wakajisi myaka iili 80 alimwi nguwakali kutumina mwami cakulya ciindi naakakkede ku Mahanaimu,+ nkaambo wakalivwubide kapati.
33 Aboobo mwami wakaambila Barizilai kuti: “Kozabuka antoomwe andime, eelyo unoolya cakulya antoomwe andime ku Jerusalemu.”+
34 Pele Barizilai wakati kumwami: “Ino ndicijisi mazuba* ongaye aakupona kutegwa nduunke amwami ku Jerusalemu?
35 Sunu ndijisi myaka iili 80.+ Sena ndicikonzya kuzyiba cibotu acibi? Sena ndemubelesi wako ndicikonzya kulabila ncondilya akunywa? Sena ndicicikonzya kuswiilila majwi aabaimbi basankwa abasimbi?+ Aboobo ino nkaambo nzi ndemubelesi wako ncondiceelede kukubeda mukuli omwami simalelaangu?
36 Omwami, ndemubelesi wako ndali kukusindikila buyo kusikila ku Jordano. Ino nkaambo nzi mwami ncandilumbula boobu?
37 Kondileka ndemubelesi wako ndipiluke kutegwa ndikafwide kumunzi wangu afwaafwi abusena bwakazikkilwa bataata abamaama.+ Pele ngooyu mubelesi wako Kimuhamu.+ Kozabuka anguwe omwami simalelaangu, alimwi umucitile kufwumbwa cibotu mumeso aako.”
38 Aboobo mwami wakati: “Kimuhamu ulazabuka andime alimwi ndiyoomucitila kufwumbwa cibotu mumeso aako; kufwumbwa ncotiindilombe ndilakucitila.”
39 Lino bantu boonse bakatalika kuzabuka Jordano, alimwi awalo mwami naakazabuka, mwami wakamyonta Barizilai+ akumulongezya; kumane Barizilai wakapiluka kuŋanda yakwe.
40 Eelyo mwami naakazabuka akuunka ku Giligala,+ Kimuhamu wakazabuka anguwe. Mpoonya ba Juda boonse acisela cabana Israyeli bakazabuka akuleta mwami.+
41 Mpoonya baalumi bana Israyeli boonse bakaboola kumwami akumwaambila kuti: “Ino nkaambo nzi bakwesu iba Juda ncobakubweza cakusisikizya alimwi akukuleta yebo abasiŋanda bako mutala lya Jordano antoomwe abaalumi bako boonse?”+
42 Baalumi ba Juda boonse bakavwiila baalumi bana Israyeli kuti: “Nkaambo mwami ngwamukowa wesu.+ Ino nkaambo nzi ncomwanyema akaambo kamakani aaya? Sena kuli cintu cili coonse camwami ncotwalya naa cipego ncotwapegwa?”
43 Nokuba boobo bana Israyeli bakavwiila ba Juda kuti: “Tujisi zyaabilo zili kkumi mubwami, aboobo tulijisi nguzu kapati kuli Davida kwiinda ndinywe. Nkaambo nzi lino ncomwatunyansya? Sena tiitweelede kuba bataanzi mukuleta mwami?” Pele majwi aaba Juda akazunda* kwiinda majwi abana Israyeli.
Bupanduluzi buyungizyidwe
^ Naa “lufwutuko.”
^ Mu Chihebrayo, “ukaambaule cakubasika amoyo.”
^ Naa “basazima mbotuzyalwa limwi.”
^ Mu Chihebrayo, “wakanyona.”
^ Naa ambweni, “bakazabuka.”
^ Naa ambweni, “kuzwa ku.”
^ Mu Chihebrayo, “mazuba aamyaka.”
^ Naa “akalaanguzu.”
