2 Samuele 24:1-25
24 Lino bukali bwa Jehova bwakabukila bana Israyeli+ alimwi, ciindi umwi naakoongelezya Davida* kuti: “Koya ukabale+ bana Israyeli aba Juda.”+
2 Aboobo mwami wakaambila Joabu+ silutwe wabasikalumamba ngwaakali limwi kuti: “Koinda mumisyobo yoonse ya Israyeli kuzwa ku Dani kusikila ku Beere-seba,+ mukabale bantu kutegwa ndizyibe mweelwe wabo.”
3 Pele Joabu wakaambila mwami kuti: “Jehova Leza wako abavwuzye bantu ziindi zili 100, alimwi meso aako omwami simalelaangu abone oobo, pele ino nkaambo nzi omwami simalelaangu ncoyanda kucita cintu cili boobu?”
4 Pele ijwi lyamwami lyakazunda majwi aa Joabu abasilutwe babasikalumamba. Aboobo Joabu abasilutwe babasikalumamba bakazwa kumwami akuunka kuyoobala bana Israyeli.+
5 Bakazabuka Jordano akuyooyaka nkambi ku Aroeri,+ nkuuli kululyo* munzi uuli akati kakkuti,* kulubazu lwanyika yabana Gadi, kutozya ku Jazeri.+
6 Kuzwa waawo bakaunka ku Gileadi+ akunyika ya Tatimu-hodesi akuzumanana kuya ku Dani-jaana akuzinguluka kuya kusika ku Sidoni.+
7 Mpoonya bakasika kumunzi wa Turo+ uuyakilidwe malambo akuminzi yoonse yabana Hivi+ ayabana Kanana mane bakasika ku Beere-seba,+ imunzi uuli mu Negebi+ mucisi ca Juda.
8 Aboobo bakeenda munyika yoonse, kumane bakapiluka ku Jerusalemu nokwakainda myezi iili fwuka amazuba aali 20.
9 Lino Joabu wakapa mweelwe wabantu bakabalwa kumwami. Basikalumamba bana Israyeli ibakajisi mapanga bakali 800,000, eelyo baalumi ba Juda bakali 500,000.+
10 Pele Davida wakapenga+ kapati mumoyo* akaambo kakubala mweelwe wabantu. Kumane Davida wakati kuli Jehova: “Ndabisya+ kapati akaambo kacintu eeci ncindacita. Lino akaka Jehova kondilekelela cibi eeci ndemubelesi wako,+ nkaambo ndacita cabufwubafwuba kapati.”+
11 Davida naakabuka mafwumofwumo, ijwi lya Jehova lyakaboola kumusinsimi Gadi,+ sizilengaano wa Davida, kaliti:
12 “Koya ukamwaambile Davida kuti, ‘Mboobu mbwaamba Jehova: “Ndakubikkila zintu zyotatwe kuti usale. Kosala comwe akati kanzizyo ncoyanda kuti ndikucitile.”’”+
13 Aboobo Gadi wakaunka kuli Davida akumwaambila kuti: “Sena kube nzala myaka iili ciloba* munyika yako?+ Naa myezi yotatwe yakutandaanizyigwa abasinkondonyoko?+ Naa kube mazuba otatwe aacilwazi cijaya munyika yako?+ Lino koyeeyesya akusala ncondeelede kuyoomwaambila ooyo iwandituma kulinduwe.”
14 Aboobo Davida wakaambila Gadi kuti: “Makani aaya andikatazya kapati. Naa mboobo, atuwide buyo mumaanza aa Jehova+ nkaambo luse lwakwe ndupati;+ pele utandilekeli kuwida mumaanza aamuntu pe.”+
15 Mpoonya Jehova wakatuma cilwazi+ cijaya mu Israyeli kuzwa mafwumofwumo kusikila kuciindi cakabikkidwe, cakuti kwakafwa+ bantu bali 70,000 kuzwa ku Dani kusikila ku Beere-seba.+
16 Lino mungelo naakatandabika janza lyakwe ku Jerusalemu kutegwa aunyonyoone munzi, Jehova wakausa* akaambo kamapenzi aayo,+ aboobo wakaambila mungelo iwakali kunyonyoona akati kabantu kuti: “Mbubo lino! Kolesya janza lyako.” Lino mungelo wa Jehova wakali afwaafwi acuumino camaila ca Arauna+ muna Jebusi.+
17 Lino Davida naakabona mungelo iwakali kujaya bantu, wakati kuli Jehova: “Mebo ndime ndakabisya, alimwi ndime ndakalubizya; pele mbelele eezyi+–ino zyacita nzi? Janza lyako alibe alindime alimwi aaŋanda yataata.”+
18 Aboobo Gadi wakaboola kuli Davida mubuzuba oobo akumwaambila kuti: “Koya ukayakile Jehova cipaililo acuumino camaila ca Arauna muna Jebusi.”+
19 Kumane Davida wakaunka kweelana amajwi ngaakamwaambila Gadi, aboobo wakacita mbubonya Jehova mbwaakamulailila.
20 Ciindi Arauna naakalanga akubona mwami ababelesi bakwe kababoola kulinguwe, mpoonya aawo wakaunka kumwami akuyoovwuntama ansi.
21 Arauna wakabuzya kuti: “Ino nkaambo nzi omwami simalelaangu ncooboolela kulindime ndemubelesi wako?” Mpoonya Davida wakaingula kuti: “Ndaboolela kuzikuula cuumino camaila kulinduwe kutegwa ndiyakile Jehova cipaililo, kutegwa cilwazi eeci cijaya bantu cilesyegwe.”+
22 Pele Arauna wakati kuli Davida: “Omwami simalelaangu kocibweza buyo akutuula cituuzyo ncoyanda.* Bona nzyeezyi ŋombe zyacituuzyo cuumpwa acilayi cakuumya maila azibelesyo zyaŋombe kuti zibe nkuni.
23 Mebo nde Arauna ndazipa zintu eezyi zyoonse kulinduwe Omwami.” Mpoonya Arauna wakati kumwami: “Jehova Leza wako atondezye kuti ulakukkomanina.”
24 Nokuba boobo, mwami wakati kuli Arauna: “Peepe, pele ndilacuula buya. Tandikootuula zipaizyo zyuumpwa eezyo nzyondatabbadelela kuli Jehova Leza wangu.” Aboobo Davida wakaula cuumino camaila alimwi aŋombe masyekeli* aansiliva aali 50.+
25 Kumane Davida wakayakila Jehova cipaililo+ nkukonya ooko akutuula zipaizyo zyuumpwa azipaizyo zyalumvwano. Aboobo Jehova wakaswiilila kukombelezya kwabo,+ eelyo cilwazi cijaya cakalesyegwa mu Israyeli.
Bupanduluzi buyungizyidwe
^ Naa “ciindi Davida naakoongelezyegwa.”
^ Naa “kumusanza.”
^ Naa “kakalonga.”
^ Naa “amanjezyeezya.”
^ Naa “cakamucisa kumoyo.”
^ Mu Chihebrayo, “cituuzyo cibotu mumeso aako.”
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
