2 Samuele 4:1-12
4 Lino mwana wa Saulo Isibosete*+ naakamvwa kuti Abineri wafwa ku Hebroni,+ wakatyompwa* alimwi bana Israyeli boonse bakanyongana.
2 Kwakali baalumi bobilo, basilutwe bampi zyabasikusaala zyamwana wa Saulo: umwi wakali Baana eelyo umwi wakali Rekabu. Bakali bana ba Rimoni muna Beeroti wamusyobo wa Benjamini. (Nkaambo awalo munzi wa Beeroti+ wakali kubalilwa kucisi ca Benjamini.
3 Bana Beeroti bakatijila ku Gitaimu,+ alimwi ooko bacili beenzu kusikila sunu.)
4 Lino Jonatani+ mwana wa Saulo wakalijisi mwana musankwa iwakalemene maulu.+ Wakali amyaka yosanwe ciindi mulumbe nowakasika kuzwa ku Jezreeli+ wakuti Saulo a Jonatani bafwa, mpoonya sikumulela wakamubweza akutija anguwe, pele naakali kuyaabuzuza akaambo kakuyoowa, mwana ooyo wakawa eelyo wakalemana. Izina lyakwe wakali Mefiboseti.+
5 Lino aaba bana ba Rimoni muna Beeroti, Rekabu a Baana, bakaunka kuŋanda ya Isibosete kalitwa mwaaba ciindi walo naakalede kalyookezya acilungulungu.
6 Mpoonya bakanjila muŋanda mbuli kuti bayanda kubweza wiiti, eelyo bakamuyasa mwida; kumane Rekabu amwanookwabo Baana+ bakatija kakunyina iwakababona.
7 Nobakanjila muŋanda, wakalilede abulo bwakwe kuzyuli, mpoonya bakamuyasa akumujaya, kumane bakamukosola mutwe. Mpoonya bakuubweza akweenda masiku oonse munzila iiya ku Araba.
8 Mpoonya bakatola mutwe wa Isibosete+ kuli Davida ku Hebroni akumwaambila mwami kuti: “Ngooyu mutwe wa Isibosete mwana wa Saulo sinkondonyoko+ iwakali kuyanda kukujaya.+ Sunu Jehova wakubetekela makani simalelaangu akupilusizya Saulo alunyungu lwakwe cibi.”
9 Nokuba boobo, Davida wakaambila Rekabu amwanookwabo Baana, ibana ba Rimoni muna Beeroti kuti: “Masimpe mbubonya Jehova mbwali muumi, ooyo iwakandivwuna* kumapenzi aangu oonse,+
10 ciindi umwi muntu naakaboola kundaambila kuti, ‘Saulo wafwa,’+ walo kayeeya kuti waleta mulumbe mubotu, ndakamujata akumujaya+ ku Zikilaga. Oobu mbobulumbu mbwaakatambula kulindime sikuleta mulumbe ooyo!
11 Sena taciindi kubija kuti basizibi bajaya muntu uululeme abulo bwakwe muŋanda yakwe? Sena nywebo tandeelede kumupa mulandu wabulowa bwakwe+ akumulobya munyika?”
12 Kumane Davida wakalailila balombwana kuti babajaye.+ Bakabakosola maanza amaulu akubaanzika+ kumbali aakazyiba kali mu Hebroni. Pele bakaubweza mutwe wa Isibosete akuuzikka mucuumbwe ca Abineri mu Hebroni.
Bupanduluzi buyungizyidwe
^ Mu Chihebrayo, “mwana wa Saulo.”
^ Mu Chihebrayo, “maanza aakwe akalebuka.”
^ Mu Chihebrayo, “iwakavwuna buumi bwangu.”
