2 Samuele 7:1-29
7 Lino mwami naakakkala muŋanda* yakwe+ alimwi Jehova naakamupa kulyookezya kuli basinkondonyina boonse ibakamuzingulukide,
2 mwami wakaambila Natani+ musinsimi kuti: “Bona, mebo ndikkede muŋanda iiyakidwe amasamu aakkedari+ kakuli Bbokesi lya Leza mwini-mwini likkede mutente.”+
3 Natani wakavwiila mwami kuti: “Koya ukacite kufwumbwa cili mumoyo wako, nkaambo Jehova uli anduwe.”+
4 Lino masiku ngoonya aayo Jehova wakaambila Natani kuti:
5 “Koya ukamwaambile mubelesi wangu Davida kuti, ‘Mboobu mbwaamba Jehova: “Sena nduwe weelede kundiyakila ŋanda kuti ndikkale mumo?+
6 Nkaambo nsinakkede muŋanda kuzwa buzuba nindakagwisya bana Israyeli mu Egepita kusikila buzuba obuno,+ pele ndakali kweendeenda mutente lyakukombela.+
7 Ciindi coonse eeci ncindali kweendeenda akati kabana Israyeli* boonse, sena kuli jwi noliba lyomwe ndyondakaambilide umwi wabasololi bamisyobo yabana Israyeli, ooyo ngondakabikka kweembela bantu bangu bana Israyeli kuti, ‘Ino nkaambo nzi ncomwatakandiyakila ŋanda yamasamu aakkedari?’”’
8 Lino mboobu mboyelede kumwaambila mubelesi wangu Davida, ‘Jehova wamakamu waamba kuti: “Ndakakubweza kumacelelo nkowakali kweembelela mbelele+ kuti ube musololi wabantu bangu bana Israyeli.+
9 Ndinooli anduwe kufwumbwa nkowaunka,+ alimwi ndiyoobanyonyoona basinkondonyoko boonse kubusyu bwako;+ alimwi ndiyookupangila zina lipati+ mbuli zina lyabantu bali aampuwo kapati munyika.
10 Ndiyoosala busena bwabantu bangu bana Israyeli akubabikka kuti bakkale ooko, alimwi bayookkala kakunyina kunyonganizyigwa; basizibi tabakabapenzyi limbi mbuli mbobakabacita kusaanguna,+
11 kuzwa buzuba nondakabikka babetesi+ kuti beendelezye bantu bangu bana Israyeli. Ndiyoomupa kulyookezya kuzwa kuli basinkondonyoko boonse.+
“‘“Alimwi Jehova wakwaambila kuti, Jehova uyookupangila ŋanda.*+
12 Lino waakufwa+ akuzikkwa antoomwe abamauso, ndiyoobusya lunyungu lwako, nkokuti mwanaako* musankwa, alimwi ndiyookkazikizya bwami bwakwe.+
13 Ngonguwe uuyooyaka ŋanda iiyooleta bulemu kuzina lyangu,+ alimwi ndiyookkazikizya cuuno cabwami bwakwe kukabe kutamani.+
14 Mebo ndiyooba bausyi, eelyo walo uyooba mwanaangu.+ Ikuti wabisya ndiyoomulaya amusako wabantu alimwi azimboko zyabana babantu.*+
15 Luyando lwangu lutamani tandikalugwisyi kulinguwe mbuli mbondakalugwisya kuli Saulo,+ ooyo ngundakagwisya akaambo kanduwe.
16 Ciinga cako abwami bwako ziyakwiima nji kubusyu bwako mane kukabe kutamani; acuuno cako cabwami ciyookkazikizyigwa mane kukabe kutamani.”’”+
17 Natani wakaambila Davida majwi aaya oonse alimwi acilengaano eeci coonse.+
18 Mpoonya Mwami Davida wakaboola akukkala kubusyu bwa Jehova akwaamba kuti: “Ino mebo ndime ni, O Mwami Singuzuzyoonse Jehova? Alimwi ino ciinga cangu ncinzi cakuti inga wacicitila zintu zyoonse eezyi?+
19 Kuyungizya aali zyeezyi, O Mwami Singuzuzyoonse Jehova, alimwi waamba kuti ciinga camubelesi wako cicinakwiimvwi nji amuya myaka; alimwi aaya ngamalailile* ngobapedwe bantu boonse, O Mwami Singuzuzyoonse Jehova.
20 Ino ncinzi cimbi ncondikonzya kwaamba kulinduwe mebo nde Davida mubelesi wako mbwaanga yebo ulindizyi kabotu,+ O Mwami Singuzuzyoonse Jehova?
21 Akaambo kajwi lyako alimwi kweelana ancowayanda moyo wako* wacita zintu zipati zyoonse eezyi alimwi waziyubununa kumubelesi wako.+
22 Nkakaambo kaako ncoli mupati ncobeni,+ O Mwami Singuzuzyoonse Jehova. Kunyina uuli mbuli nduwe,+ alimwi kunyina Leza uumbi kunze lyanduwe;+ zyoonse nzyotwakamvwa amatwi eesu zilacisinizya eeci.
23 Alimwi ino nguuli musyobo anyika uuli mbuli bantu bako bana Israyeli?+ Yebo O Leza wakaunka akubafwutula kuti babe bantu bako,+ wakalipangila zina+ kwiinda mukubacitila zintu zipati alimwi ziyoosya.+ Wakatanda misyobo abaleza bayo akaambo kabantu bako, aabo mbookafwutula kuzwa ku Egepita.
24 Wakakkazikizya bana Israyeli kuti babe bantu bako lyoonse;+ alimwi yebo O Jehova waba Leza wabo.+
25 “Lino O Jehova Leza, kocizuzikizya cisyomezyo ncookaamba kujatikizya mubelesi wako alimwi aciinga cakwe lyoonse, alimwi kocita mbubonya mbookasyomezya.+
26 Izina lyako alilemekwe kukabe kutamani+ kutegwa bantu baambe kuti, ‘Jehova wamakamu ngu Leza wa Israyeli,’ alimwi ciinga camubelesi wako Davida aciime nji kubusyu bwako.+
27 Nkaambo yebo O Jehova wamakamu, Leza wa Israyeli, wayubunwida mubelesi wako kuti, ‘Ndilakuyakila ŋanda.’*+ Nkakaambo kaako mubelesi wako ncaaba acamba cakupaila* mupailo ooyu kulinduwe.
28 Lino O Mwami Singuzuzyoonse Jehova, nduwe Leza mwini-mwini, alimwi majwi aako ngamasimpe,+ alimwi wasyomezya zintu eezyi zibotu kumubelesi wako.
29 Aboobo acikukkomanisye kulongezya ŋanda yamubelesi wako, alimwi iime nji kubusyu bwako mane kukabe kutamani;+ nkaambo yebo O Mwami Singuzuzyoonse Jehova wasyomezya, alimwi lulongezyo lwako aŋanda eeyi yamubelesi wako alube alinjiyo mane kukabe kutamani.”+
Bupanduluzi buyungizyidwe
^ Naa “muŋanda yabwami.”
^ Mu Chihebrayo, “bana ba Israyeli.”
^ Naa “ciinga cabami.”
^ Mu Chihebrayo, “ooyo uuzwa muzizo zyako zyamukati.”
^ Naa ambweni, “ba Adamu.”
^ Naa “ooyu ngomulawo.”
^ Naa “kweelana akuyanda kwako.”
^ Naa “ciinga cabami.”
^ Mu Chihebrayo, “ncaajana moyo wakwe kuti apaile.”