2 Samuele 9:1-13
-
Luyando lutamani lwa Davida kuli Mefiboseti (1-13)
9 Mpoonya Davida wakati: “Sena kucili muntu uucisyeede mumukwasyi wa Saulo kutegwa nditondezye luyando lutamani kulinguwe akaambo ka Jonatani?”+
2 Lino mumukwasyi wa Saulo kwakali mubelesi wazina lya Ziba.+ Aboobo wakaitwa kuli Davida, eelyo mwami wakamubuzya kuti: “Sena ndonduwe Ziba?” Kumane wakaingula kuti: “Inzya, ndendime simalelaangu.”
3 Mpoonya mwami wakazumanana ulaamba: “Sena kuli uucisyeede mumukwasyi wa Saulo ooyo ngondikonzya kutondezya luyando lwa Leza lutamani?” Ziba wakaingula mwami kuti: “Kwakasyaala buyo mwana wa Jonatani uulemene maulu.”+
4 Eelyo mwami wakamubuzya kuti: “Ino uli kuli?” Ziba wakaingula mwami kuti: “Uli muŋanda ya Makiri+ mwana wa Amiyeli ku Lo-debara.”
5 Mpoonya aawo Mwami Davida wakatuma bantu kuyoomubweza kuzwa kuŋanda ya Makiri mwana wa Amiyeli ku Lo-debara.
6 Lino Mefiboseti mwana wa Jonatani imwana wa Saulo naakasika kuli Davida, mpoonya aawo wakakotama kumane wakavwuntama ansi. Mpoonya Davida wakati: “Mefiboseti!” Eelyo wakavwiila kuti: “Ndime aano simalelaangu.”
7 Davida wakati kulinguwe: “Utayoowi pe, nkaambo ncobeni ndilatondezya luyando lutamani+ kulinduwe akaambo ka Jonatani uso, alimwi ndilakupilusizya nyika yoonse yasyaanyokokulu Saulo alimwi yebo lyoonse tunoolya limwi* atebulu lyangu.”+
8 Amvwe boobo wakavwuntama ansi akwaamba kuti: “Ino ndime ni ndemubelesi wako, kuti undilanganye* boobu ndemubwa uufwide?”+
9 Lino mwami wakaita Ziba mubelesi wa Saulo akumwaambila kuti: “Zintu zyoonse izyakali zya Saulo azyakali zyamukwasyi wakwe woonse, ndazipa muzyukulu wa Saulo simalelaako.+
10 Mweelede kumulimina—yebo abana bako ababelesi bako—alimwi muyoomutebwida kutegwa bakabe acakulya bamukwasyi wamuzyukulu wasimalelaako. Pele walo Mefiboseti muzyukulu wasimalelaako lyoonse unoolida atebulu lyangu.”+
Lino Ziba wakajisi bana bali 15 ababelesi bali 20.+
11 Mpoonya Ziba wakati kumwami: “Osimalelaangu, ndilacita zyoonse nzyoondilailila ndemubelesi wako.” Aboobo Mefiboseti wakali kulya atebulu lya Davida* mbuli umwi wabana bamwami.”
12 Lino awalo Mefiboseti wakalijisi mwana musankwa musyoonto wazina lya Mika;+ alimwi boonse ibakali kukkala muŋanda ya Ziba bakaba babelesi ba Mefiboseti.
13 Mefiboseti wakali kukkala mu Jerusalemu, kalida atebulu lyamwami lyoonse;+ alimwi wakalilemene maulu.+
Bupanduluzi buyungizyidwe
^ Mu Chihebrayo, “tunoolya limwi cinkwa.”
^ Mu Chihebrayo, “undicebuke.”
^ Naa ambweni, “atebulu lyangu.”
