Babetesi 10:1-18
10 Lino Abimeleki naakafwa, kwakabuka sikuvwuna bana Israyeli,+ nkokuti Tola mwana wa Puwa imwana wa Dodo, mwaalumi muna Isakara. Wakali kukkala mu Samiri, mumalundu aa Efraimu.
2 Wakabeteka bana Israyeli myaka iili 23. Kumane wakafwa akuzikkwa mu Samiri.
3 Musyule lyakwe kwakabuka Jairi muna Gileadi, alimwi wakabeteka bana Israyeli myaka iili 22.
4 Wakajisi bana basankwa bali 30 ibakali kutanta ambongolo zili 30 alimwi bakajisi minzi iili 30, iiciitwa kuti Havoti-jairi+ kusikila sunu; iili munyika ya Gileadi.
5 Kuzwa waawo Jairi wakafwa akuzikkwa mu Kamoni.
6 Alimwi bana Israyeli bakacita bubi mumeso aa Jehova,+ bakatalika kukomba ba Baala,+ zikozyanyo zya Asitoreti, baleza babana Aramu,* baleza babana Sidoni, baleza babana Moabu,+ baleza babana Amoni+ abaleza baba Filisiti.+ Bakasiya Jehova alimwi tiibakamubelekela pe.
7 Mpoonya bukali bwa Jehova bwakababukila bana Israyeli, eelyo wakabaaba mumaanza aaba Filisiti abana Amoni.+
8 Aboobo bakabadyaaminina akubapenzya kapati bana Israyeli kuzwa mumwaka ooyo–bakabapenzya myaka iili 18 bana Israyeli boonse ibakali kujwe lya Jordano munyika yabana Amori iyakali mu Gileadi.
9 Alimwi bana Amoni bakali kuzabuka Jordano kuyoolwana musyobo wa Juda, Benjamini a Efraimu; eelyo bana Israyeli bakapenga citaambiki.
10 Mpoonya bana Israyeli bakalilila Jehova kuti abagwasye+ kabati: “Twakubisizya, nkaambo twakusiya O Leza wesu akutalika kukomba ba Baala.”+
11 Pele Jehova wakaambila bana Israyeli kuti: “Sena tiindakamuvwuna kubana Egepita,+ bana Amori,+ bana Amoni, ba Filisiti+
12 bana Sidoni, ba Amaleki abana Midiyani, ciindi nobakamupenzya? Nomwakandililila ndakamuvwuna kuzwa mumaanza aabo.
13 Pele mwakandisiya akutalika kukomba baleza bambi.+ Nkakaambo kaako tandikamuvwuni alimwi pe.+
14 Kamuya kuli baleza aabo mbomwasala mukalombe lugwasyo kulimbabo.+ Abamuvwune mbabo mumapenzi aanu.”+
15 Pele bana Israyeli bakati kuli Jehova: “Twabisya. Kotucita kufwumbwa mboyanda. Akaka kotuvwuna sunu lyalo.”
16 Mpoonya bakagwisya baleza beenzu akati kabo akubelekela Jehova,+ aboobo tanaakacili kukonzya kubalangilila buyo bana Israyeli kabapenga.*+
17 Mukuya kwaciindi bana Amoni+ bakayobololwa antoomwe, eelyo bakayaka nkambi mu Gileadi. Aboobo bana Israyeli bakabungana antoomwe akuyaka nkambi mu Mizipa.
18 Eelyo bantu alimwi abasololi ba Gileadi bakatalika kwaambilana kuti: “Ino nguni uutiitusololele mukulwana bana Amoni?+ Ooyo aabe silutwe wabantu boonse bakkala mu Gileadi.”
Bupanduluzi buyungizyidwe
^ Naa “Siriya.”
^ Naa “alimwi wakapenga mumoyo akaambo kakupenga kwabana Israyeli.”
