Babetesi 11:1-40
11 Lino Jefita+ muna Gileadi wakaba sikalumamba singuzu; wakali mwana wamukaintu muvwuule, eelyo wisi wakali Gileadi.
2 Pele muka Gileadi wakamuzyalila bana basankwa. Lino bana bamukaintu wakwe nobakakomena, bakamutanda Jefita akumwaambila kuti: “Tokabi alukono muŋanda yataata nkaambo uli mwana wamusyokwe.”
3 Aboobo Jefita wakatija kuzwa kubanabokwabo akuyookkala munyika ya Tobu. Mpoonya baalumi batakwe cakucita bakamusangana Jefita, eelyo bakamutobela.
4 Nokwakainda ciindi, bana Amoni bakalwana bana Israyeli.+
5 Lino bana Amoni nobakatalika kulwana bana Israyeli, mpoonya aawo baalu baku Gileadi bakaunka kuyooleta Jefita kuzwa kunyika ya Tobu.
6 Bakaambila Jefita kuti: “Koboola utubede musololi wabasikalumamba, kutegwa tubalwane bana Amoni.”
7 Pele Jefita wakati kubaalu baku Gileadi: “Sena tamuli ndinywe mwakandisula akunditanda muŋanda yataata?+ Ino mwaboolela nzi kulindime lino nomwabona kuti mwaba mumapenzi?”
8 Bamvwe boobo baalu baku Gileadi bakati kuli Jefita: “Nkakaambo kaako lino twaboola kulinduwe. Ikuti uunke andiswe kuyoolwana bana Amoni, uyooba musololi wabantu boonse bamu Gileadi.”+
9 Aboobo Jefita wakati kubaalu baku Gileadi: “Ikuti naa mwandipilusyila kulwana bana Amoni alimwi akuti Jehova abaabe mumaanza aangu, nkokuti ndiyooba musololi wanu!”
10 Kumane baalu baku Gileadi bakaambila Jefita kuti: “Jehova aabe kamboni* akati kesu, kuti naa tatukoocita kweelana ambowaamba.”
11 Aboobo Jefita wakaunka antoomwe abaalu baku Gileadi alimwi bantu bakamubikka kuba musololi wabo akuba silutwe wabasikalumamba. Jefita wakaainduluka majwi aaya oonse kuli Jehova ku Mizipa.+
12 Mpoonya Jefita wakatuma batumwa kumwami wabana Amoni+ akumubuzya kuti: “Ino nkaambo nzi ncooboolela kuzoondilwana* munyika yangu?”
13 Aboobo mwami wabana Amoni wakaambila batumwa ba Jefita kuti: “Nkaambo bana Israyeli bakabweza nyika yangu nobakazwa ku Egepita,+ kuzwa ku Arinoni+ kusikila ku Jaboki alimwi akusikila ku Jordano.+ Lino amwiipilusye muluumuno.”
14 Pele Jefita wakabatuma alimwi batumwa kumwami wabana Amoni
15 kuyoomwaambila kuti:
“Mboobu mbwaamba Jefita: ‘Bana Israyeli kunyina nobakabweza nyika yabana Moabu+ anyika yabana Amoni,+
16 nkaambo bana Israyeli nobakazwa mu Egepita, bakainda munkanda kusikila ku Lwizi Lusalala+ alimwi bakasika ku Kadesi.+
17 Mpoonya bana Israyeli bakatuma batumwa kumwami wa Edomu+ akumwaambila kuti: “Twalomba kaka twiinde munyika yako,” pele mwami wa Edomu tanaakabazumizya. Alimwi akumwami wa Moabu+ bakatuma batumwa, pele awalo wakakaka. Aboobo bana Israyeli bakazumanana kukkala mu Kadesi.+
18 Nobakeenda munkanda, bakayeenguluka nyika ya Edomu+ anyika ya Moabu. Bakainda kujwe Moabu+ nkoili kunyika akuyooyaka zilawo mucilawo ca Arinoni; alimwi tiibakanjila mu Moabu+ pe, nkaambo Arinoni ngowakali munyinza wa Moabu.
19 “‘Kuzwa waawo bana Israyeli bakatuma batumwa kuli Sihoni mwami wabana Amori, imwami wa Hesiboni akumwaambila kuti: “Twalomba kaka twiinde munyika yako kuya kunyika yesu.”+
20 Pele Sihoni wakabadooneka bana Israyeli kuti bainde munyika yakwe, eelyo wakabunganya bantu bakwe boonse akuyaka nkambi mu Jahazi akulwana bana Israyeli.+
21 Mpoonya Jehova Leza wa Israyeli wakaaba Sihoni abantu bakwe boonse mumaanza aabana Israyeli, aboobo bakabazunda akubweza nyika yoonse yabana Amori ibakali kukkala mumo.+
22 Aboobo bakacibweza cilawo coonse cabana Amori kuzwa ku Arinoni kusikila ku Jaboki akuzwa kunkanda kusikila ku Jordano.+
23 “‘Jehova Leza wa Israyeli nguwakatanda bana Amori kubusyu bwabantu bakwe bana Israyeli,+ sena lino nywebo muyanda kubaatula?
24 Sena tamubwezi kufwumbwa eeco Kemosi+ leza wanu ncaamupa kuti cibe canu? Aboobo kufwumbwa ooyo Jehova Leza wesu ngwaatupa kuti tumwaatule ngonguwe ngotuyakwaatula.+
25 Lino sena nywebo mulamwiinda Balaki+ mwana wa Zipori, imwami wa Moabu? Sena kuli naakakazyanya abana Israyeli naa kubalwana?
26 Ciindi bana Israyeli nobakali kukkala mu Hesiboni aminzi+ misyoonto* yanguwo alimwi amu Aroeri aminzi misyoonto yanguwo amuminzi yoonse iili kunkomwe ya Arinoni myaka iili 300, ino mwakalekela nzi kwiibweza minzi eeyo aciindi eeco?+
27 Pele mebo kunyina ncondamubisizya pe, nokuba boobo mulandibisizya kwiinda mukundilwana. Amuleke Jehova Mubetesi,+ abeteke sunu akati kabana Israyeli abana Amoni.’”
28 Pele mwami wabana Amoni tanaakaaswiilila majwi Jefita ngaakamutumina.
29 Muuya wa Jehova wakaboola ali Jefita,+ eelyo Jefita wakainda mucisi ca Gileadi aca Manase akwiinda mu Mizipe waku Gileadi+ alimwi kuzwa mu Mizipe waku Gileadi wakaindilila kuya kubana Amoni.
30 Mpoonya Jefita wakakonka+ kuli Jehova kuti: “Ikuti waabe bana Amoni mumaanza aangu,
31 nkokuti kufwumbwa ooyo uuyoozwa amulyango waŋanda yangu kuzoondicinga ndaakupiluka muluumuno kuzwa kubana Amoni, uyooba wa Jehova+ alimwi ndiyoomutuula mbuli cituuzyo cuumpwa.”+
32 Aboobo Jefita wakaunka kuyoolwana bana Amoni, eelyo Jehova wakabaaba mumaanza aakwe.
33 Wakabanyonyoona alunyonyooko lupati kuzwa ku Aroeri mane kuyoosika ku Miniti–wakazunda minzi iili 20–alimwi akusika ku Abeli-kerami. Aboobo bana Amoni bakazundwa kubusyu bwabana Israyeli.
34 Kumane Jefita wakaboola ku Mizipa+ kuŋanda yakwe, eelyo wakabona mwanaakwe musimbi kaboola kumucinga kayaabulizya nsakalala akuzyana. Ooyu ngomwana alikke ngwaakajisi. Kunze lyakwe wakanyina umbi, naba musankwa naba musimbi.
35 Lino naakamubona, wakazapula zisani zyakwe akwaamba kuti: “Maawe, mwanaangu! Wandipenzya mumoyo,* ani nduwe ngondakali kutanda. Pele ndakasyomezya kale kuli Jehova alimwi tandikonzyi kucinca pe.”+
36 Pele wakati kuli bausyi: “Taata, ikuti naa mwakasyomezya kuli Jehova, amundicitile kweelana ambomwakasyomezya,+ mbwaanga Jehova wamupa kuti mubapilusizye cisubulo basinkondonyoko, bana Amoni.”
37 Mpoonya wakaambila bausyi kuti: “Ncendilomba buyo nceeci: Mundileke nduunke kwamyezi yobilo, nduunke mumalundu kuyoolila bunakalindu bwangu antoomwe abasimbi beenzuma.”*
38 Eelyo bausyi bakati: “Koya!” Aboobo bakamuleka kuti aunke kwamyezi yobilo, mpoonya wakaunka abeenzinyina kuyoolila bunakalindu bwakwe kumalundu.
39 Noyakamana myezi yobilo, wakapiluka kuli bausyi, eelyo bakazuzikizya cikonke cabo kujatikizya nguwe.+ Musimbi ooyu tanaakazyiba musankwa pe. Lino eeci cakaba cilengwa* mu Israyeli cakuti:
40 Mwaka amwaka, basimbi bana Israyeli kabaunka kuyoolumbaizya mwana wa Jefita muna Gileadi, mazuba one mumwaka.
Bupanduluzi buyungizyidwe
^ Mu Chihebrayo, “yooyo uuswiilila.”
^ Mu Chihebrayo, “Ino uyoojana nzi yebo alimwi andime?”
^ Naa “yeengelede.”
^ Mu Chihebrayo, “Wandimana nguzu.”
^ Naa “ndikalile abeenzuma akaambo kakuti tandikakwatwi pe.”
^ Naa “mulawo.”
