Babetesi 13:1-25
13 Bana Israyeli alimwi bakacita bubi mumeso aa Jehova,+ eelyo Jehova wakabaaba mumaanza aaba Filisiti+ myaka iili 40.
2 Lino kwakali mwaalumi umwi muna Zora+ iwakali wamukwasyi wabana Dani,+ izina lyakwe wakali Manowa.+ Mukaintu wakwe tanaakali kuzyala, aboobo tanaakajisi mwana pe.+
3 Mukuya kwaciindi mungelo wa Jehova wakalibonya kumukaintu ooyu akumwaambila kuti: “Bona, tozyali alimwi tojisi mwana. Pele uyoomita akuzyala mwana musankwa.+
4 Lino weelede kucenjela, kuti utanywi waini naa zyakunywa zimbi zikola+ alimwi toyelede kulya cintu cili coonse cisofweede.+
5 Bona! Uyoomita akuzyala mwana musankwa, alimwi teelede kugelwa mumutwe+ nkaambo mwana ooyo uuyooba mu Naziri wa Leza mbwatiikazyalilwe buyo,* alimwi ngonguwe uyooba kumbele mukuvwuna bana Israyeli kuzwa kumaanza aaba Filisiti.”+
6 Mpoonya mukaintu wakaunka akuyakwaambila mulumaakwe kuti: “Kuli muntu wa Leza mwini-wini waboolede kulindime, alimwi wali kulibonya mbuli kuti mungelo wa Leza mwini-mwini, wali kuyoosya kapati. Tiindamubuzya ankwaazwa, alimwi kunyina naandaambila zina lyakwe.+
7 Pele wandaambila kuti, ‘Bona! Uyoomita akuzyala mwana musankwa. Lino toyelede kunywa waini naa zyakunywa zimbi zikola alimwi toyelede kulya cintu cili coonse cisofweede nkaambo mwana ooyo uyooba mu Naziri wa Leza mbwatiikazyalilwe buyo* mane kusikila buzuba mbwayoofwa.’”
8 Eelyo Manowa wakakombelezya Jehova akwaamba kuti: “Akaka Jehova, ndalomba kuti muntu wa Leza mwini-mwini ngootumide aboole alimwi kuti azootuyiisye ncotweelede kucita kujatikizya mwana ooyo uuyoozyalwa.”
9 Aboobo Leza mwini-mwini wakaswiilila jwi lya Manowa, eelyo mungelo wa Leza mwini-mwini wakaboola alimwi kumukaintu naakakkede mumuunda; mulumaakwe Manowa tanaakaliko.
10 Eelyo cakufwambaana mukaintu wakazuza kuyakwaambila mulumaakwe kuti: “Bona! Mwaalumi uulya iwakaboolede buzuba obuya waboola alimwi.”+
11 Kumane Manowa wakanyamuka akuunka amukaintu wakwe kumwaalumi ooyo akumubuzya kuti: “Sena ndonduwe mwaalumi wakaambaula amukaintu wangu?” Eelyo wakati: “Inzya, ndendime.”
12 Mpoonya Manowa wakati: “Acikacitike ncobeni ncookaamba! Ino mbuti mbwayelede kukomezyegwa mwana, alimwi ino ncinzi ncayoocita?”+
13 Aboobo mungelo wa Jehova wakati kuli Manowa: “Mukaintu wako weelede kuzitantamuka zyoonse nzyondakamwaambila.+
14 Tayelede kulya cintu cili coonse cizwa kumisaansa alimwi tayelede kunywa waini naa zyakunywa zili zyoonse zikola+ alimwi tayelede kulya cintu cili coonse cisofweede.+ Zyoonse nzyondakamulailila, weelede kuzicita.”
15 Lino Manowa wakati kumungelo wa Jehova: “Akaka kolindila asyoonto, tukujaile kana kampongo.”+
16 Pele mungelo wa Jehova wakati kuli Manowa: “Nokuba kuti ndalindila, tandikoolya cakulya canu pe; pele kuti naa muyanda kutuulila Jehova cituuzyo cuumpwa, mulakonzya kucita oobo.” Nkaambo Manowa tanaakazyi kuti wakali mungelo wa Jehova.
17 Kumane Manowa wakati kumungelo wa Jehova: “Ino nduwe ni zina,+ kutegwa aakucitika majwi ngowaamba tukakulemeke?”
18 Pele mungelo wa Jehova wakamwaambila kuti: “Nkaambo nzi ncobuzya zina lyangu, mbwaanga lilagambya?”
19 Mpoonya Manowa wakabweza kana kampongo acituuzyo camaila akuzituula abbwe kuli Jehova. Leza wakali kucita cintu cigambya, Manowa amukaintu wakwe kabalangilila.
20 Lino mulilo nowakali kuya mujulu kuzwa acipaililo, mungelo wa Jehova wakaunkilila mujulu amulilo waacipaililo Manowa amukaintu wakwe kabalangilila. Nobakabona boobo, bakavwuntama ansi.
21 Mungelo wa Jehova tanaakalibonya limbi pe kuli Manowa amukaintu wakwe. Eelyo Manowa wakazyiba kuti wakali mungelo wa Jehova.+
22 Mpoonya Manowa wakaambila mukaintu wakwe kuti: “Masimpe tulafwa, nkaambo ngu Leza ngotwabona.”+
23 Pele mukaintu wakwe wakamwaambila kuti: “Ikuti Jehova naali kuyanda kutujaya, naatatambula cituuzyo cuumpwa+ acituuzyo camaila kuzwa kulindiswe, alimwi naatatutondezya zintu eezyi zyoonse akutwaambila nociba cimwi cazintu eezyi.”
24 Nikwakainda ciindi, mukaintu ooyo wakatumbuka mwana musankwa akumuulika zina lya Samusoni;+ alimwi mulombe ooyo naakali kuyaabukomena, Jehova wakazumanana kumulongezya.
25 Mukuya kwaciindi muuya wa Jehova wakatalika kubeleka alinguwe+ ku Mahane-dani,+ akati ka Zora a Esitaoli.+
Bupanduluzi buyungizyidwe
^ Mu Chihebrayo, “mbwayakuzwida buyo mwida.”
^ Mu Chihebrayo, “mbwayakuzwida buyo mwida.”
