Babetesi 14:1-20
14 Lino Samusoni wakaunka ku Timina, eelyo ooko wakabona mukaintu mu Filisiti.*
2 Aboobo wakaunka kuyakwaambila bausyi abanyina kuti: “Kuli mukaintu mu Filisiti ngundakabona ku Timina, lino amundigwasye kuti ndimukwate.”
3 Pele bausyi abanyina bakamwaambila kuti: “Sena kunyina musimbi akati kabasazima alimwi amumusyobo wesu woonse?+ Sena weelede kwiinka akuyookwata mukaintu akati kaba Filisiti batapalwidwe?” Pele Samusoni wakaambila bausyi kuti: “Amundigwasye buyo kuti ndimukwate, nkaambo ngonguwe wandibotela.”*
4 Bausyi abanyina tiibakazyi kuti makani aaya akazwa kuli Jehova, nkaambo wakali kuyandaula nzila yakulwana ba Filisiti, mbwaanga aciindi eeco ba Filisiti mbabakali kweendelezya bana Israyeli.+
5 Aboobo Samusoni wakaunka antoomwe abausyi abanyina ku Timina. Naakasika kumyuunda yamisaansa yaku Timina, azikulange buyo! wakabona syuumbwa* uzyaabumuvwulumina.
6 Mpoonya muuya wa Jehova wakamuselukila,+ eelyo wakamukwamuna syuumbwa ooyo muzibeela zyobilo mbuli kana kampongo kubelesya buyo maanza aakwe. Pele kunyina naakabaambila bausyi naa banyina ncaakacita.
7 Kumane wakaunka kuyoobandika amukaintu, alimwi mukaintu ooyo wakacili kumubotela Samusoni.+
8 Lino naakali kupiluka kuti akamubweze akumutola kuŋanda,+ wakaleya kuti abone mutunta wasyuumbwa, eelyo wakajana nzuki abuci mumutunta wasyuumbwa.
9 Aboobo wakagwisya buci amaanza aakwe akuzumanana kweenda kumwi kalya. Naakabeenzya bausyi abanyina, wakabapa buci bumwi, eelyo bakatalika kulya. Pele tanaakabaambila kuti wakabugwisya mumutunta wasyuumbwa.
10 Bausyi bakasika nkwaakali kukkala mukaintu ooyo, eelyo Samusoni wakapanga pobwe nkukonya ooko, nkaambo oobo mbobakali kucita bakubusi.
11 Lino bantu nobakamubona, bakamuletela beenzinyina basibwiinga bali 30 kuti babe anguwe.
12 Mpoonya Samusoni wakabaambila kuti: “Amuleke ndimulabikile kalabi. Ikuti mukalabunune mumazuba aapobwe aali ciloba, ndiyoomupa zisani zyamukati zili 30 azisani zyaatala zili 30.
13 Pele kuti mwaalilwe kukalabununa, ndinywe mutiindipe zisani zyamukati zili 30 azisani zyaatala zili 30.” Eelyo bakati: “Kolabika tumvwe.”
14 Aboobo wakabaambila kuti:
“Muli sikulya mwakazwa cakulya,Amuli singuzu mwakazwa cilweela.”+
Eelyo bakaalilwa kukalabununa kwamazuba otatwe.
15 Mubuzuba bwane, bakaambila muka Samusoni kuti: “Komoongelezya mulumaako+ kuti akulabunwide kalabi mpoonya utwaambile. Buyo-buyo tulakuumpa antoomwe amukwasyi wabauso. Sena mwakatutambila kuti muzootunyange zintu zyesu?”
16 Mpoonya muka Samusoni wakatalika kumulilila akwaamba kuti: “Ulindisulide; alimwi tondiyandi pe.+ Wakalabikila bantu bamusyobo wangu kalabi, pele tokalabununi kulindime.” Kumane Samusoni wakati kulinguwe: “Ino inga ndakalabununa buti kulinduwe, kakuli bataata abamaama bakandizyala tiindakabalabunwida?”
17 Pele mukaintu wakazumanana kumulilila mazuba oonse aapobwe aali ciloba. Mpoonya mubuzuba bwaciloba wakamwaambila nkaambo wakamukatazya. Kumane wakabaambila bantu bamusyobo wakwe ncokaamba kalabi aako.+
18 Aboobo mubuzuba bwaciloba kalitanabbila zuba,* baalumi bamumunzi bakamwaambila kuti:
“Ino ncinzi cilweela kwiinda buci,Alimwi ncinzi cilaanguzu kwiinda syuumbwa?”+
Kumane wakati kulimbabo:
“Ikuti nomwatalimya mpwizi yangu,+Nomwatakonzya kulabununa kalabi kangu.”
19 Eelyo muuya wa Jehova wakamupa nguzu,+ aboobo wakaunka ku Asikeloni+ akujaya baalumi babo bali 30 akubasamununa zisani zyabo akuzitola kubaalumi aabo ibakalabununa kalabi.+ Wakapiluka kuŋanda yabausyi kalutide.
20 Mpoonya muka Samusoni+ wakakwasyigwa kuli umwi wabeenzinyina ibakali kumusindikila.+
Bupanduluzi buyungizyidwe
^ Mu Chihebrayo, “mukaintu umwi wabana basimbi baba Filisiti.”
^ Mu Chihebrayo, “uli kabotu mumeso aangu.”
^ Naa “syuumbwa wabutambo uucili mwana-mwana.”
^ Naa ambweni, “katananjila muŋanda yamukati.”
