Babetesi 17:1-13
-
Mituni ya Mika amupaizi wakwe (1-13)
17 Kwakali mwaalumi umwi wakali kukkala mumalundu aa Efraimu,+ izina lyakwe wakali Mika.
2 Mwaalumi ooyu wakaambila banyina kuti: “Sena mulaayeeyede mali aansiliva aali 1,100 ngomwakabbidwa alimwi ngomwakasinganya mumatwi aangu? Ali kulindime. Ndime ndakaabweza.” Mpoonya banyina bakati: “Jehova akuleleke mwanaangu.”
3 Aboobo wakaapilusya mali aansiliva aali 1,100 kuli banyina, pele banyina bakati: “Aaya mali aansiliva aali mujanza lyangu ndilaapa kuli Jehova kuti abe cintu cisalala akaambo kamwanaangu, kutegwa kupangwe cikozyanyo cibezedwe acikozyanyo cifwulidwe.+ Lino ndiyakwiipilusya nsiliva eeyi kulinduwe.”
4 Naakaapilusya mali aansiliva kuli banyina, banyina bakaabweza mali aansiliva aali 200 akupa mufwuzi. Eelyo wakapanga cikozyanyo cakubeza acikozyanyo cifwulidwe; mpoonya zyakabikkwa muŋanda ya Mika.
5 Lino Mika wakalijisi ŋanda yabaleza alimwi wakapanga kabaki kabupaizi+ amituni,*+ eelyo wakapa mwanaakwe umwi nguzu zyakuti abe mupaizi wakwe.+
6 Mumazuba aayo, kwakanyina mwami mu Israyeli.+ Muntu uuli woonse wakali kucita kufwumbwa ncaabona kuti nceciluzi mumeso aakwe.*+
7 Lino kwakali mulombwana waku Betelehemu+ mucisi ca Juda wamukwasyi wa Juda. Wakali mu Levi+ iwakali kukkala ooko kwaciindi cili mbocibede.
8 Mwaalumi ooyo wakazwa ku Betelehemu mucisi ca Juda kuti akajane busena bwakukkala. Lino naakali kweenda, wakasika mumalundu aa Efraimu kuŋanda ya Mika.+
9 Mpoonya Mika wakamubuzya kuti: “Ino wazwa kuli?” Kumane walo wakati: “Ndili mu Levi waku Betelehemu mucisi ca Juda, ndiyaabuyandaula busena bwakukkala.”
10 Eelyo Mika wakamwaambila kuti: “Kokkala andime, undibede taata* amupaizi. Ndinookupa mali aansiliva aali kkumi amwaka azisani zyeelede alimwi azyakulya.” Eelyo mu Levi ooyo wakanjila muŋanda yakwe.
11 Aboobo mu Levi wakazumina kukkala anguwe alimwi mulombwana ooyo wakaba mbuli umwi wabana bakwe.
12 Kuyungizya waawo, Mika wakabikka mu Levi kuti abe mupaizi wakwe,+ eelyo wakakkala muŋanda ya Mika.
13 Mpoonya Mika wakati: “Lino ndazyiba kuti Jehova unoondicitila kabotu nkaambo mu Levi wandibeda mupaizi.”
Bupanduluzi buyungizyidwe
^ Naa “abaleza bamuŋanda.”
^ Naa “ncaakali kuyeeya kuti nceciluzi.”
^ Naa “sikupa lulayo.”
