Babetesi 18:1-31
18 Mumazuba aayo kwakanyina mwami mu Israyeli.+ Alimwi mumazuba aayo musyobo wa Dani+ wakali kuyandaula busena bwakukkala, nkaambo kusikila kuciindi eeco tiibakaningapegwa lukono akati kamisyobo yabana Israyeli.+
2 Bana Dani bakatuma baalumi bosanwe kuzwa mumukwasyi wabo, baalumi basimide bazwa ku Zora aku Esitaoli,+ kuyootwela nyika akwiilanga-langa mboibede. Aboobo bakabaambila kuti: “Kamuya mukailange-lange mboibede nyika.” Nobakasika mumalundu aa Efraimu kuŋanda ya Mika,+ bakoona nkukonya ooko.
3 Nobakasika afwaafwi aŋanda ya Mika, bakalizyiba jwi* lyamulombwana ooyu mu Levi, aboobo bakaleya kulinguwe akumubuzya kuti: “Ino nguni wakakuleta okuno? Ino utyani okuno? Alimwi ncinzi ncokkalilide okuno?”
4 Wakati kulimbabo: “Mika wakandicitila boobu aboobu, eelyo wakandinjizya mulimo wakuti ndimubede mupaizi.”+
5 Mpoonya bakati kulinguwe: “Kotubuzyila kuli Leza kutegwa tuzyibe naa lweendo lwesu lulaba kabotu.”
6 Mupaizi ooyo wakati kulimbabo: “Kamuya muluumuno. Jehova uli andinywe mulweendo lwanu.”
7 Aboobo baalumi aabo bosanwe bakazumanana mulweendo lwabo, mpoonya bakasika ku Laisi.+ Ooko bakajana bantu bakali kukkala nkuko mbobakali kulisyoma akukkala cakuliiba mbubonya mbuli cilengwa cabana Sidoni. Bakali kukkala caluumuno acakutayoowa+ alimwi kwakanyina sinkondo wakali kubadyaaminina munyika yabo. Bakali kule abana Sidoni, alimwi bakanyina cilongwe amasi aambi.
8 Nobakapiluka kubanabokwabo ku Zora aku Esitaoli,+ banabokwabo bakati kulimbabo: “Ino mwakeenda buti?”
9 Balo bakati: “Atuunke tukabalwane, nkaambo twaibona nyika yabo, nimbotu loko. Nkaambo nzi ncomuwayawaya? Mutamuki kuunka kuyakwiibweza nyika.
10 Mwaakusika, muyoojana kuti bantu baliliibide+ alimwi nyika nimpati. Leza wayaaba mumaanza anu, ninyika iitabulwi cintu cili coonse ansi aano.”+
11 Mpoonya baalumi bali 600 kuzwa mumukwasyi wabana Dani bakabweza zilwanyo akunyamuka kuzwa ku Zora aku Esitaoli.+
12 Bakaunka akuyooyaka nkambi ku Kiriati-jearimu+ mucisi ca Juda. Nkakaambo kaako busena oobo ibuli kumbo kwa Kiriati-jearimu babwiita kuti Mahane-dani*+ kusikila sunu.
13 Bakeenda kuzwa kooko kuya kumalundu aa Efraimu, mpoonya bakasika kuŋanda ya Mika.+
14 Mpoonya baalumi bosanwe ibakaunkide kuyootwela nyika ya Laisi+ bakaambila banabokwabo kuti: “Sena mulizyi kuti mumaanda aaya kuli kabaki kabupaizi, mituni,* cikozyanyo cibezedwe acikozyanyo cifwulidwe?+ Amuyeeye akuzyiba ncomweelede kucita.”
15 Eelyo baalumi aabo bakaleya akuunka kuŋanda yamulombwana ooyu mu Levi,+ kuŋanda ya Mika, kumane bakamubuzya mbwapona.
16 Aciindi eeco baalumi bana Dani+ bali 600, ibakajisi zilwanyo zyankondo bakaliimvwi kumulyango.
17 Lino baalumi bosanwe ibakaunkide kuyootwela nyika+ bakanjila mumunzi kuyoobweza cikozyanyo cibezedwe, kabaki kabupaizi,+ mituni*+ acikozyanyo cifwulidwe.+ (Mupaizi+ uulya wakaliimvwi amulyango wamunzi antoomwe abaalumi bali 600 ibakajisi zilwanyo zyankondo.)
18 Baalumi aaba bakanjila muŋanda ya Mika akubweza cikozyanyo cibezedwe, kabaki kabupaizi, mituni* acikozyanyo cifwulidwe. Mpoonya mupaizi wakababuzya kuti: “Ino mutyani?”
19 Pele balo bakamuvwiila kuti: “Koumuna buyo. Jala mulomo wako akututobela, ukatubede taata* amupaizi. Ino ncili cibotu–kuti uzumanane kuba mupaizi muŋanda yamuntu omwe+ naa kuti ube mupaizi wamusyobo amukwasyi mu Israyeli?”+
20 Aboobo mupaizi wakakkutila amakani aaya, eelyo wakabweza kabaki kabupaizi, mituni* acikozyanyo cibezedwe+ akubatobela bantu aabo.
21 Mpoonya nobakanyamuka kuti baunke, bakasolozya bana, banyama bavwubwa azintu ziyandisi kumbele lyabo.
22 Lino nibakeenda musinzo uuli mbuubede kuzwa kuŋanda ya Mika, bantu ibakabambene aŋanda ya Mika bakalibunga-bunga akutandila bana Dani, eelyo bakabeenzya.
23 Lino nobakali koongolola kwiita bana Dani, mpoonya bana Dani bakabaceba akubuzya Mika kuti: “Ino wabaanzi? Nkaambo nzi ncomwalibunga-bunga boobu?”
24 Aboobo wakati: “Mwandibwezela baleza bangu mbondakapanga, alimwi awalo mupaizi mwamubweza. Ino ndilasyaala anzi? Aboobo, ino inga mwandibuzya buti kuti, ‘Ino wabaanzi?’”
25 Bana Dani bakavwiila kuti: “Utatusabili pe; buyo-buyo aaba baalumi banyemede inga bakulwana, eelyo ulasweekelwa buumi, yebo abamuŋanda yako.”
26 Eelyo bana Dani bakazumanana mulweendo lwabo; alimwi Mika naakabona kuti bakali anguzu kapati kwiinda nguwe, wakapiluka kuŋanda yakwe.
27 Lino nobakabweza cikozyanyo ncaakapangide Mika alimwi amupaizi wakwe, bakaunka ku Laisi,+ kubantu bakaliibide.+ Eelyo bakabajaya amapanga, kumane munzi bakawuumpa amulilo.
28 Kwakanyina sikubavwuna pe, nkaambo kwakali kule aku Sidoni alimwi bakanyina cilongwe amasi aambi alimwi munzi wa Laisi wakali mucibanda ca Beti-rehobu.+ Mpoonya bakauyakulula munzi akukkala mulinguwo.
29 Kuyungizya waawo, munzi ooyu bakawuulika zina lyausyi lyakuti Dani,+ ooyo iwakazyalilwa mu Israyeli.+ Pele kumatalikilo wakali kwiitwa kuti Laisi.+
30 Kumane bana Dani bakaliimikizyila cikozyanyo cibezedwe,+ mpoonya Jonatani+ mwana wa Gerisomu+ imwana wa Musa, antoomwe abana bakwe, bakaba bapaizi bamusyobo wabana Dani kusikila buzuba bantu bamunyika eeyo nobakatolwa kucisi cimbi kabali baange.
31 Bakaimika cikozyanyo cibezedwe eeco Mika ncaakapanga, alimwi cakaliimvwi ooko mazuba oonse ciindi ŋanda ya Leza mwini-mwini niyakali ku Silo.+
Bupanduluzi buyungizyidwe
^ Naa “bakauzyiba mwaambo.”
^ Nkokwaamba kuti “Nkambi ya Dani.”
^ Naa “baleza bamuŋanda.”
^ Naa “baleza bamuŋanda.”
^ Naa “baleza bamuŋanda.”
^ Naa “sikupa lulayo.”
^ Naa “baleza bamuŋanda.”
