Babetesi 19:1-30
-
Mulandu wakoonana wabana Benjamini ku Gibea (1-30)
19 Lino mumazuba aayo nokwakanyina mwami mu Israyeli,+ mu Levi umwi iwakali kukkala mumasena aali kule mumalundu aa Efraimu+ aciindi eeco, wakabweza mwanakasuwa umwi waku Betelehemu+ mucisi ca Juda kuti abe mukaintu wakwe.
2 Pele mwanakasuwa wakwe ooyu wakatalika kucita buvwuule, eelyo wakamusiya mulumi akuunka kuli bausyi ku Betelehemu mucisi ca Juda. Wakaakukkala ooko kwamyezi yone.
3 Mpoonya mulumaakwe wakamutobela kuti akamukombelezye kutegwa amupilusye; wakaunka amubelesi wakwe musankwa alimwi ambongolo zyobilo. Aboobo wakamunjizya muŋanda yabausyi. Eelyo bausyi mukaintu ooyo nibakamubona mwaalumi ooyu bakamutambula camaanza obilo.
4 Aboobo bausyizyala, nkokuti bausyi mukaintu, bakamukombelezya kuti akkale mazuba otatwe; bakali kulya akunywa alimwi wakali koona nkukonya ooko.
5 Lino mubuzuba bwane nobakabuka mafwumofwumo kuti baunke, bausyi mukaintu bakaambila mukwe wabo kuti: “Amusaangune kulya kutegwa mube anguzu,* mwamana mweende.”
6 Aboobo bakakkala bobilo akutalika kulya akunywa antoomwe; kumane bausyi mukaintu bakaambila mwaalumi kuti: “Akaka ndakulomba kuti woone asunu, alimwi ulikkomanisye.”*
7 Lino mwaalumi naakanyamuka kuti aunke, bausyizyala bakazumanana kumukombelezya, aboobo wakoona ooko alimwi.
8 Naakafwuma mubuzuba bwasanu kuti aunke, bausyi mukaintu bakati: “Akaka, amusaangune kulya kutegwa mube anguzu.”* Bakali kuwayawaya kusikila lyaunka zuba, alimwi boonse bobilo bakakkala akulya.
9 Lino mwaalumi naakanyamuka kuti aunke antoomwe amwanakasuwa wakwe amubelesi wakwe, bausyizyala, bausyi mukaintu, bakati kulinguwe: “Bona! Zuba lyaunka kale. Akaka, amoone alimwi. Liyanda kubbila zuba. Amoone, alimwi moyo wako ukondwe. Eelyo juunza mukafwume kulibambila lweendo lwanu, mukaunke nkomuzwa.”*
10 Nokuba boobo mwaalumi wakakaka koona alimwi, aboobo wakanyamuka akuunka mane wakasika ku Jebusi, nkokuti Jerusalemu.+ Wakali ambongolo zyakwe zyobilo izyakajisi zyakukkalila mwanakasuwa wakwe alimwi amubelesi wakwe.
11 Nibakasika afwaafwi aku Jebusi, izuba lyakali afwaafwi kubbila. Aboobo mubelesi wakaambila simalelaakwe kuti: “Sena tuleye mumunzi ooyu wabana Jebusi kutegwa toone?”
12 Pele simalelaakwe wakamwaambila kuti: “Tatweelede kuleya mumunzi wabamasi ibatali bana Israyeli. Atwiindilile tukasike ku Gibea.”+
13 Mpoonya wakaambila mubelesi wakwe kuti: “Atuunke kuli bumwi bwamasena aaya; tuyakoona ku Gibea naa ku Rama.”+
14 Aboobo bakaindilila, eelyo zuba lyakababbilila kabali afwaafwi aku Gibea mucisi ca Benjamini.
15 Mpoonya bakaleya ooko kutegwa boone mu Gibea. Eelyo nobakanjila mumunzi, bakakkala mulubuwa lwamunzi, pele kunyina wakabatola kuti bakoone muŋanda.+
16 Mukuya kwaciindi kwakaboola mudaala iwakazwide mukubeleka kumuunda kumangolezya. Mudaala ooyo wakali kuzwa kumalundu aa Efraimu,+ alimwi wakali kukkala mu Gibea kwaciindi cili mbocibede; pele bantu bamumunzi bakali bana Benjamini.+
17 Lino mudaala ooyo naakatambya meso akubona mwaalumi silweendo mulubuwa lwamunzi, wakamubuzya kuti: “Ino uya kuli, alimwi wazwa kuli?”
18 Wakati kulinguwe: “Twazwa ku Betelehemu mucisi ca Juda, tuya kucisi cili kule, kumalundu aa Efraimu ooko nkondizwa. Ndakaunkide ku Betelehemu mucisi ca Juda,+ lino nduunka kuŋanda ya Jehova,* pele kunyina wanditambula muŋanda yakwe pe.
19 Tulijisi bwizu acakulya cambongolo+ zyesu alimwi tulijisi cinkwa+ awaini nzyotukonzya kulya, mebo amukaintu alimwi amubelesi wesu. Kunyina ncotubulide pe.”
20 Nokuba boobo mudaala wakati: “Amube aluumuno! Ndilamupa kufwumbwa ncomubulide. Pele mutaoni mulubuwa lwamunzi.”
21 Aboobo wakabatola akubanjizya muŋanda yakwe alimwi mbongolo wakazipa cakulya. Kumane bakasamba kumaulu akutalika kulya akunywa.
22 Lino nobakacili kulikondelezya, baalumi babuyo bamumunzi bakaizinguluka ŋanda, kabatontana amulyango, eelyo bakazumanana kwaambila mudaala mukamwini ŋanda kuti: “Komuleta anze mwaalumi waboola muŋanda yako, kutegwa toonane anguwe.”+
23 Kumane mukamwini ŋanda wakaunka kulimbabo akubaambila kuti: “Peepe kaka bakwesu, mutaciti cibi. Muntu ooyu mweenzu wangu. Mutaciti cintu eeci cuusisya nsoni.
24 Ndilijisi mwana musimbi nakalindu alimwi kuli amwanakasuwa wamwaalumi ooyu. Amuleke ndimuletele mbabo, mubajate akubacita kufwumbwa mbomuyanda.+ Pele kumwaalumi ooyu mutaciti cintu eeci cuusisya nsoni.”
25 Pele baalumi aaba tiibakamuswiilila pe, aboobo mu Levi ooyo wakabweza mwanakasuwa wakwe akumuleta anze kulimbabo.+ Bakamujata akoonana anguwe alimwi bakamucita mbobayanda masiku woonse mane kubucedo. Kumane mafwumofwumo bakamuleka kuti aunke.
26 Mafwumofwumo, mukaintu ooyu wakaboola akuzoowida amulyango waŋanda yamudaala mwaakabede simalelaakwe alimwi wakalala aawo kusikila lyapola zuba.
27 Lino simalelaakwe naakabuka mafwumofwumo akujalula milyango yaŋanda kuti azwe anze akuzumanana alweendo lwakwe, wakajana mwanakasuwa wakwe ulilede amulyango waŋanda, maanza aakwe kaali amulyango.
28 Aboobo wakati kulinguwe: “Nyamuka, atweende.” Pele tanaakavwiila pe. Mpoonya wakamubweza wamubikka ambongolo akunyamuka kuya kumunzi wakwe.
29 Naakasika kuŋanda yakwe, wakabweza cipeni cakujazya banyama akumutendaula muzibeela-beela zili 12, alimwi wakatumizya cibeela comwe mucooko cimwi acimwi ca Israyeli.
30 Lino boonse ibakacibona eeci bakati: “Cintu cili boobu tacinacitikide naa kubonwa kuzwa ciindi bana Israyeli nobakazwa mucisi ca Egepita kusikila sunu. Amwaayeeyesye makani aaya,* mubuzyanye+ akutwaambila mbomuyeeya.”
Bupanduluzi buyungizyidwe
^ Naa “kutegwa moyo ukkale.”
^ Naa “moyo wako ukondwe.”
^ Naa “kutegwa moyo ukkale.”
^ Mu Chihebrayo, “kutente lyanu.”
^ Naa ambweni, “alimwi ndibelekela kuŋanda ya Jehova.”
^ Naa “Amubikke myoyo yanu kumakani aaya.”
