Babetesi 3:1-31
3 Njeeyi misyobo Jehova njaakalekela kuti kiikkede kutegwa kwiinda mulinjiyo asunke bana Israyeli boonse ibatakalinabwene nkondo zyabana Kanana+
2 (cakaba boobo kutegwa mazyalani aabana Israyeli azibe nkondo, kuti aabo ibatakalinalwanide nkondo baiye):
3 bami bosanwe baba Filisiti,+ bana Kanana boonse, bana Sidoni+ abana Hivi+ ibakkala mu Cilundu ca Lebano+ kuzwa ku Cilundu ca Baala-herimoni kusikila ku Lebo-hamati.*+
4 Misyobo eeyi yakali yakusunkizya bana Israyeli kubona naa balabamba milawo ya Jehova eeyo njaakapa bamausyi kwiinda muli Musa.+
5 Aboobo bana Israyeli bakakkala akati kabana Kanana,+ bana Heti, bana Amori, bana Perizi, bana Hivi abana Jebusi.
6 Bana Israyeli bakali kukwata bana babo basimbi akukwasya bana babo basimbi kubana babo basankwa, alimwi bakatalika kubelekela baleza babo.+
7 Aboobo bana Israyeli bakacita zintu zibi mumeso aa Jehova alimwi bakamuluba Jehova Leza wabo alimwi bakali kubelekela ba Baala+ amisemu yazisamu yakukomba.*+
8 Eelyo bukali bwa Jehova bwakabukila bana Israyeli, aboobo wakabaaba mumaanza aa Kusani-risatayimu imwami wa Mesopotamiya.* Bana Israyeli bakabelekela Kusani-risatayimu myaka iili lusele.
9 Ciindi bana Israyeli nobakakwiilila Jehova kuti abagwasye,+ Jehova wakabapa sikubavwuna,+ nkokuti Otiniyeli+ imwana wa Kenazi, musyoonto wa Kalebe.
10 Muuya wa Jehova wakaboola alinguwe,+ eelyo wakaba mubetesi wa Israyeli. Otiniyeli naakaunka kunkondo, Jehova wakaaba Kusani-risatayimu imwami wa Mesopotamiya* mumaanza aakwe aboobo wakazunda Kusani-risatayimu.
11 Kuzwa waawo munyika kwakaba luumuno kwamyaka iili 40. Mpoonya Otiniyeli imwana wa Kenazi wakafwa.
12 Bana Israyeli alimwi bakatalika kucita zintu zibi mumeso aa Jehova.+ Aboobo Jehova wakalekela Egiloni imwami wa Moabu+ kuti abazunde bana Israyeli, nkaambo bakacita zintu zibi mumeso aa Jehova.
13 Kuyungizya waawo, wakabaletela bana Amoni+ abana Amaleki.+ Bakalwana bana Israyeli akubweza munzi wazisamu zyamakunka.+
14 Bana Israyeli bakabelekela Egiloni mwami wa Moabu myaka iili 18.+
15 Mpoonya bana Israyeli bakalilila Jehova kuti abagwasye,+ aboobo Jehova wakabapa sikubavwuna,+ nkokuti Ehudi+ imwana wa Gera, imuna Benjamini,+ mwaalumi sicimwensyi.+ Mukuya kwaciindi bana Israyeli bakatumya zipego kuli Egiloni mwami wa Moabu kwiinda mulinguwe.
16 Lino Ehudi wakapanga ipanga lyakali kubosya koonse-koonse, lyakali kulampa kakokola* komwe, mpoonya wakalibikka mucisani cakwe acibelo cakwe calulyo.
17 Kumane wakatola cipego kuli Egiloni mwami wa Moabu. Lino Egiloni wakalineneede kapati.
18 Aboobo Ehudi naakamana kupa cipego eeco, wakaambila bantu bakanyamwide cipego kuti baunke.
19 Pele nobakasika aazikozyanyo zibezedwe* ku Giligala,+ walo wakapiluka kumwami akumwaambila kuti: “Ndijisi mulumbe wamaseseke ngondiyanda kukwaambila, omwami.” Aboobo mwami wakati: “Kolindila utaambi!” Mpoonya babelesi bakwe boonse bakazwa.
20 Kumane Ehudi wakaboola kulinguwe naakakkede alikke mukaanda kakwe kamujulu katontola. Eelyo Ehudi wakati: “Ndijisi mulumbe wakukwaambila uuzwa kuli Leza.” Amvwe boobo mwami wakanyamuka acuuno cakwe cabwami.
21 Mpoonya Ehudi wakasomona panga ajanza lyakwe lyalumwensyi kukasolo kakwe kakululyo akumuyasa andilyo mwida.
22 Panga acijatizyo candilyo lyakabbila cakuti mafwuta akalivwumba, nkaambo tanaakalisomona mwida lyakwe, eelyo tubi twakatalika kuzwa.
23 Ehudi wakazwida awindo, wakajala milyango yakaanda aako kamujulu akwiikkiya.
24 Naakazwa, babelesi bamwami bakapiluka, eelyo bakajana kuti milyango yakaanda kamujulu ilikkiidwe. Aboobo bakati: “Ambweni ulimukuligwasya* mukaanda kakwe katontola.”
25 Bakazumanana kulindila kusikila mane balibilika, pele nobakabona kuti tajaluli milyango yakaanda kamujulu, bakabweza makkii akujalula, eelyo bakajana mwami wabo ulilede ansi kafwide!
26 Nobakacili kwiima-ima Ehudi wakatija, alimwi wakainda kuzikozyanyo zibezedwe*+ akutijila ku Seira.
27 Naakasika, wakalizya mweembo+ mumalundu aa Efraimu;+ eelyo bana Israyeli bakaselemuka kuzwa mumalundu, walo kabasololela.
28 Mpoonya wakati kulimbabo: “Amunditobele, nkaambo Jehova waaba basinkondonyoko bana Moabu mumaanza aanu.” Eelyo bakamutobela akuyakwiima kuzito zya Jordano izyakali kusinkilizya bana Moabu, alimwi tiibakazumizya muntu naba omwe kuzabuka.
29 Aciindi eeco bakajaya baalumi bana Moabu+ basika ku 10,000, baalumi boonse aabo bakali zyandamene alimwi bakali basinguzu; kunyina naba omwe wakatija pe.+
30 Aboobo mubuzuba oobo bana Moabu bakazundwa kubana Israyeli; eelyo munyika kwakaba luumuno kwamyaka iili 80.+
31 Kuzwa nguwe, kwakali Samagara+ mwana wa Anati ooyo iwakajaya baalumi ba Filisiti+ bali 600 amusako wakubinzya ŋombe;+ awalo wakabavwuna bana Israyeli.
Bupanduluzi buyungizyidwe
^ Naa “kumanjililo aa Hamati.”
^ Amubone Bupanduluzi Bwamabala.
^ Mu Chihebrayo, “Aramu-naharaimu.”
^ Mu Chihebrayo, “Aramu.”
^ Ambweni kakokola kafwaafwi katandila kumasentimita aali 38. Amubone Makani Aayungizyidwe B14.
^ Naa ambweni, “aamigodi yamabwe.”
^ Mu Chihebrayo, “ulimukuvwumba maulu aakwe.”
^ Naa ambweni, “kumigodi yamabwe.”
