Babetesi 4:1-24
4 Lino Ehudi naakafwa, bana Israyeli alimwi bakacita zibi mumeso aa Jehova.+
2 Aboobo Jehova wakabaaba mumaanza aa Jabini imwami wa Kanana,+ iwakali kweendelezya mu Hazori. Silutwe wampi yabasikalumamba bakwe wakali Sisera, iwakali kukkala mu Haroseti+ wabamasi.*
3 Bana Israyeli bakalilila Jehova,+ nkaambo Jabini wakajisi nkalaki zyankondo zili 900 izijisi zibulo zibosya zyabutale kumavwili,*+ alimwi wakabapenzya bana Israyeli+ myaka iili 20.
4 Lino Debora, musinsimi mukaintu,+ muka Lapidoti ngowakali kubeteka bana Israyeli aciindi eeco.
5 Wakali kukkala munsi lyacisamu camakunka ca Debora akati ka Rama+ a Beteli+ mumalundu aa Efraimu; bana Israyeli bakali kuunka kulinguwe kuyoomvwa mbeta zya Leza.
6 Wakatumina Baraki+ mwana wa Abinoamu kuti aboole kuzwa ku Kedesi-nafatali+ akumwaambila kuti: “Sena Jehova Leza wa Israyeli tanaapa malailile? Waamba kuti, ‘Koya utole baalumi bako ku Cilundu ca Tabori, ubweze abaalumi bali 10,000 kuzwa akati kabana ba Nafutali akuzwa akati kabana ba Zebuloni.
7 Ndiyoomuletela Sisera, silutwe wampi yabasikalumamba ba Jabini antoomwe ankalaki zyakwe zyankondo alimwi amakamu aakwe kukalonga ka Kisoni,+ eelyo ndiyoomwaaba mumaanza aanu.’”+
8 Mpoonya Baraki wakati kulinguwe: “Ikuti naa ulaunka andime, ambebo ndilaunka; pele kuti naa utaunki, andime tandikokuunka pe.”
9 Aboobo wakati: “Ndilaunka anduwe. Nokuba boobo, tokajani bulemu mulweendo oolu nkaambo Jehova uyakwaaba Sisera+ mumaanza aamukaintu.” Mpoonya Debora wakanyamuka akuunka a Baraki ku Kedesi.+
10 Baraki wakaita bana Zebuloni abana Nafutali+ kuti babungane antoomwe ku Kedesi, eelyo baalumi bali 10,000 bakamutobela. Awalo Debora wakaunka antoomwe anguwe.
11 Lino Heberi muna Keni wakalizandukide kuzwa kubana Keni,+ ibana ba Hobabu usyizyala+ Musa, alimwi wakaimikide tente lyakwe kumbali lyacisamu cipati mu Zaananimu, kufwaafwi a Kedesi.
12 Eelyo bantu bakaambila Sisera kuti Baraki mwana wa Abinoamu wasika ku Cilundu ca Tabori.+
13 Mpoonya aawo Sisera wakabungika nkalaki zyakwe zyankondo—nkalaki zili 900 izijisi zibulo zibosya zyabutale kumavwili*—amakamu woonse ngaakali limwi, kuzwa ku Haroseti wabamasi kusikila kukalonga ka Kisoni.+
14 Kumane Debora wakati kuli Baraki: “Nyamuka, nkaambo obuno mbobuzuba Jehova nayanda kwaaba Sisera mumaanza aako. Sena tali Jehova uukusololela?” Eelyo Baraki wakaselemuka kuzwa a Cilundu ca Tabori abaalumi bali 10,000 ibakali kumutobela.
15 Mpoonya Jehova wakanyonganya+ Sisera ankalaki zyakwe zyankondo zyoonse ampi yabasikalumamba bakwe boonse akaambo kapanga lya Baraki. Kumane Sisera wakaseluka munkalaki yakwe akutija amaulu.
16 Baraki wakatandaanya nkalaki zyankondo ampi yabasikalumamba kusikila ku Haroseti wabamasi. Aboobo impi yabasikalumamba ba Sisera boonse bakajaigwa apanga; kunyina wakasyaala naba omwe pe.+
17 Pele Sisera wakatija amaulu kuya kutente lya Jaeli+ muka Heberi+ muna Keni, nkaambo kwakali luumuno akati ka Jabini+ mwami wa Hazori abamuŋanda ya Heberi muna Keni.
18 Mpoonya Jaeli wakazwa kuyoocinga Sisera akumwaambila kuti: “Omwami wangu, koboola kuno, konjila. Utayoowi pe.” Aboobo wakanjila mutente lyakwe, eelyo wakamuvwumba payi.
19 Mpoonya Sisera wakati kulinguwe: “Ndilomba maanzi masyoonto ndinywe, ndafwa nyota.” Aboobo wakajalula kakomo kacikutu kamukupa akumupa wanywa,+ kumane wakamuvwumba alimwi.
20 Mpoonya Sisera wakaambila mukaintu kuti: “Koima amulyango watente, eelyo ikuti naa kusike muntu uukubuzya kuti, ‘Sena kuli muntu mutente oomu?’ Waambe kuti, ‘Peepe!’”
21 Pele Jaeli mukaintu wa Heberi wakabweza nembe yatente ansando. Kumane Sisera naakali koona kakatede, Jaeli wakaunka cakusobelela kulinguwe, wakamukankamina nembe mumpobe zyamutwe wakwe mane yaakupola ansi, eelyo wakafwa.+
22 Lino Baraki wakaunka ooko kayaabutobela Sisera, eelyo Jaeli wakazwa kuyoomucinga akumwaambila kuti: “Koboola ndikutondezye mwaalumi ngoyandaula.” Aboobo wakanjila anguwe mukati, akujana Sisera ulilede kafwide anembe mumpobe zyakwe.
23 Aboobo mubuzuba oobo, Leza wakabombya Jabini mwami wa Kanana kubusyu bwabana Israyeli.+
24 Eelyo bana Israyeli bakali kuyaabuba anguzu kwiinda Jabini mwami wa Kanana,+ kusikila bamunyonyoona.
Bupanduluzi buyungizyidwe
^ Naa “Haroseti-ha-goimu.”
^ Mu Chihebrayo, “nkalaki zyabutale zili 900.”
^ Mu Chihebrayo, “nkalaki zyabutale zili 900.”
