Babetesi 6:1-40
6 Pele alimwi bana Israyeli bakatalika kucita zintu zibi mumeso aa Jehova,+ aboobo Jehova wakabaaba mumaanza aabana Midiyani myaka iili ciloba.+
2 Bana Midiyani bakabadyaaminina bana Israyeli.+ Akaambo kabana Midiyani, bana Israyeli bakalipangila masena aakuyubila* mumalundu, mumampangala amumasena aakatazya kusika.+
3 Kwakali kunga bana Israyeli basyanga mbuto, bana Midiyani, bana Amaleki+ abantu ba Kujwe+ bakali kubalwana.
4 Bakali kuyaka nkambi kutegwa babalwane akubanyonyweeda zisyango kusikila ku Gaza, alimwi tiibakali kubasiila bana Israyeli cakulya cili coonse, noiba mbelele naa ŋombe naa mbongolo.+
5 Nkaambo bakali kuboola abanyama babo bavwubwa amatente, kabali banji mbuli cikwikwi,+ alimwi balo ankamela zyabo tiibakali kukonzya kubalwa,+ bakali kuboola munyika kuti bainyonyoone.
6 Aboobo bana Israyeli bakapenga citaambiki akaambo kabana Midiyani; eelyo bakalilila Jehova kuti abagwasye.+
7 Lino bana Israyeli nobakalilila Jehova kuti abagwasye akaambo kabana Midiyani,+
8 Jehova wakatuma musinsimi kubana Israyeli iwakabaambila kuti: “Mboobu mbwaamba Jehova Leza wa Israyeli, ‘Ndakamugwisya mu Egepita, muŋanda yabuzike.+
9 Aboobo ndakamuvwuna kumaanza aabana Egepita akuli basikumupenzya boonse alimwi ndakamutandila basikumupenzya aabo akumupa nyika yabo.+
10 Alimwi ndakamwaambila kuti: “Ndime Jehova Leza wanu.+ Mutabayoowi baleza babana Amori, bamukamwini nyika oomo momukkala.”+ Pele tiimwakandimvwida* pe.’”+
11 Kumane mungelo wa Jehova wakaboola+ akukkala munsi lyacisamu cipati cakali mu Ofira, ica Joasi muna Abiezeri.+ Mwanaakwe Gideoni+ wakali kuuma wiiti mucisinino cawaini kutegwa ausise kubana Midiyani.
12 Mpoonya mungelo wa Jehova wakalibonya kulinguwe akumwaambila kuti: “Jehova uli anduwe,+ yebo osikalumamba singuzu.”
13 Amvwe boobo Gideoni wakati kulinguwe: “Omwami wangu, ikuti naa Jehova uli andiswe, ino nkaambo nzi zintu zyoonse eezyi ncozyatucitikila?+ Ino ili kuli milimo yakwe yoonse iigambya njobakatulwiida+ bamatata kuti, ‘Jehova wakatugwisya mu Egepita’?+ Lino mpaawa Jehova watusiya+ akutwaaba mumaanza aabana Midiyani.”
14 Mpoonya Jehova wakamulanga akumwaambila kuti: “Koya munguzu zyako nzyojisi alimwi uyoobavwuna bana Israyeli kuzwa mumaanza aabana Midiyani.+ Sena tandili ndime ndakutuma?”
15 Gideoni wakamuvwiila kuti: “Akaka Jehova. Ino ndiyoobelesya nzi kuvwuna bana Israyeli? Bona! Ciinga* cangu nceciniini kapati akati kaziinga zya Manase alimwi mebo ndendime musyoonto kapati muŋanda yabataata.”
16 Pele Jehova wakamwaambila kuti: “Akaambo kakuti ndinooli anduwe,+ uyoobajaya bana Midiyani mbuli kuti muntu omwe buyo.”
17 Kumane wakati kulinguwe: “Ikuti naa wandifwida luzyalo, konditondezya citondezyo cakuti nduwe waambaula andime.
18 Akaka, utazwi aano mane ndipiluke akukuletela cipego akucibikka kumbele lyako.”+ Eelyo wakati: “Mebo ndinookkede aano kusikila upiluke.”
19 Mpoonya Gideoni wakanjila muŋanda akubamba kana kampongo akupanga zinkwa zitajisi bumena aefa* yafulaulu.+ Nyama wakaibikka mumutaanga,* eelyo musinza wakaubikka mumupika; kumane wakamutolela akumubikkila munsi lyacisamu cipati.
20 Lino mungelo wa Leza mwini-mwini wakati kulinguwe: “Bweza nyama azinkwa zitajisi bumena akuzibikka aalya abbwe lipati, akutila musinza atala.” Eelyo wakacita mbubonya oobo.
21 Mpoonya mungelo wa Jehova wakatandabika musako wakwe iwakali mujanza lyakwe, mpoonya mpela yanguwo yakaguma nyama azinkwa zitajisi bumena, eelyo kwakazwa mulilo mubbwe akuumpa nyama azinkwa zitajisi bumena.+ Kumane mungelo wa Jehova wakazibaana.
22 Lino Gideoni wakazyiba kuti wakali mungelo wa Jehova.+
Mpoonya aawo Gideoni wakati: “Maawe, Mwami Singuzuzyoonse Jehova, ndabona mungelo wa Jehova cantongolameso!”+
23 Pele Jehova wakamwaambila kuti: “Koba aluumuno. Utayoowi; tokoofwa pe.”+
24 Aboobo Gideoni wakayakila Jehova cipaililo ooko alimwi ciciitwa kuti Jehova-salomu*+ kusikila sunu. Ciciliko ku Ofira wabana Abiezeri.
25 Lino masiku aayo Jehova wakamwaambila kuti: “Bweza mupoho wabauso muniini, nkokuti mupoho wabili uuli amyaka iili ciloba, alimwi weelede kumwaya cipaililo ca Baala eeco uso ncajisi akugonka musemu wacisamu wakukomba* uuli kumbali ancico.+
26 Wamana kuyakila Jehova Leza wako cipaililo atala aacilundu eeci, akwaayala kabotu-kabotu mabwe, mpoonya ubweze mupoho muniini wabili akumutuula kali cituuzyo cuumpwa kubelesya nkuni zyamusemu wacisamu wakukomba* ngoogonka.”
27 Aboobo Gideoni wakabweza babelesi bakwe baalumi bali kkumi akucita mbubonya Jehova mbwaakamwaambila. Pele wakayoowa kucita boobo masyikati akaambo kabantu bamuŋanda yabausyi alimwi abantu bamumunzi, aboobo wakacita oobo ciindi camasiku.
28 Bantu bamumunzi nobakabuka mafwumofwumo buzuba bwakatobela, bakajana kuti cipaililo ca Baala camwaigwa amusemu wacisamu wakukomba* iwakali kumbali ancico wagonkwa, alimwi amupoho muniini wabili watuulwa acipaililo icakayakwa.
29 Mpoonya bakatalika kubuzyanya kuti: “Ino nguni wacita boobu?” Nobakamana kuvwuntauzya bakati: “Ngu Gideoni mwana wa Joasi wacita boobu.”
30 Aboobo bantu bamumunzi bakati kuli Joasi: “Komuleta mwanaako anze ajaigwe, nkaambo wamwaya cipaililo ca Baala akugonka musemu wacisamu wakukomba* iwali kumbali ancico.”
31 Mpoonya Joasi+ wakaambila bantu aabo boonse kuti: “Sena mweelede kumwiiminina buya Baala? Sena mweelede kumufwutula? Kufwumbwa uumwiiminina weelede kujaigwa mafwumofwumo ngaonya aano.+ Ikuti kali leza, amumuleke aliiminine mwini+ mbwaanga muntu umwi wamumwaila cipaililo cakwe.”
32 Eelyo mubuzuba oobo wakaulika Gideoni kuti ngu Jerubaala,* kati: “Amumuleke Baala aliiminine mwini, nkaambo muntu umwi wamumwaila cipaililo cakwe.”
33 Bana Midiyani+ boonse abana Amaleki+ abantu ba Kujwe bakalibunga-bunga;+ alimwi bakazabuka mulonga akunjila mu Kkuti* lya Jezreeli akuyaka nkambi.
34 Mpoonya muuya wa Jehova wakaselukila Gideoni,+ aboobo wakalizya mweembo,+ eelyo bana Abiezeri+ bakalibunga-bunga antoomwe akumutobela.
35 Kumane wakatuma batumwa mucilawo coonse ca Manase, eelyo abalo bakalibunga-bunga antoomwe akumutobela. Alimwi wakatuma batumwa mucilawo ca Aseri, Zebuloni a Nafutali, abalo bakaboola kuzooswaangana anguwe.
36 Mpoonya Gideoni wakati kuli Leza mwini-mwini: “Ikuti naa ulafwutula bana Israyeli kwiinda mulindime mbubonya mbookasyomezya,+
37 ndilabikka boya bwambelele acuumino camaila. Ikuti mume ube buyo kuboya bulikke pele ansi oonse kakuli kuyumu, nkokuti ndilazyiba kuti uyoofwutula bana Israyeli kwiinda mulindime kweelana ambowasyomezya.”
38 Eelyo cakacitika mbubonya oobo. Naakabuka mafwumofwumo buzuba bwakatobela akubukanya boya bwambelele, kwakazwa maanzi manji aazuzya mutiba mupati.
39 Nokuba boobo, Gideoni wakati kuli Leza mwini-mwini: “Utandinyemeni kaka, kondileka ndaambe alimwi ciindi comwe buyo. Kondileka ndisole alimwi ciindi comwe buyo aboya bwambelele kutegwa ndikasinizye kaambo aaka. Akaka, akube mume ansi oonse, pele boya bwambelele bulikke kabuli buyumu.”
40 Aboobo Leza wakacita oobo masiku aayo ngoonya; boya bwambelele bulikke mbobwakali buyumu, eelyo ansi oonse kwakaba mume.
Bupanduluzi buyungizyidwe
^ Naa ambweni, “malyango aakuyobweda zintu.”
^ Mu Chihebrayo, “tiimwakaswiilila jwi lyangu.”
^ Mu Chihebrayo, “Cuulu.”
^ Malita aatandila ku 22. Amubone Makani Aayungizyidwe B14.
^ Bamwi baamba kuti “cinzuma.”
^ Nkokwaamba kuti “Jehova Nduumuno.”
^ Amubone Bupanduluzi Bwamabala.
^ Amubone Bupanduluzi Bwamabala.
^ Amubone Bupanduluzi Bwamabala.
^ Amubone Bupanduluzi Bwamabala.
^ Nkokwaamba kuti “Baala Aliiminine Mulubeta (Alilwanine).”
^ Naa “Cibanda.”
